近排唔单止大埔有官地因为司法覆核要延迟截标，就连私人旧楼业权拍卖都卖唔出。刘Sir知道，寻日透过中原测量师行拍卖嘅北角远东大厦85%业权同埋中原大厦72.5%业权，喺无竞投者出席情况下而流拍，有业主觉得同市况转弱有关。但投资者林子峰寻晚拆售嘅屯门兆麟苑车位，就好热闹，有成千名准买家到场，三个钟卖晒449个车位。
刘Sir寻日去咗旧楼拍卖现场，今次系由市区重建中介服务有限公司委托中原测量师行拍卖旧楼业权，两项旧楼分别系北角七姊妹道187至193号远东大厦85%业权、同埋七姊妹道195至199号/健康东街23至25号中原大厦72.5%业权，拍卖开价6.5亿元。
屯门449车位闪电沽清
老友中原张竞达负责今次拍卖，原定寻日下午三点开始，但现场所见，竞投区座位空无一人，张竞达将时间押后五分钟，都无竞投者到场，最后收回拍卖物业。张竞达同刘Sir讲，一直都有发展商查询，对结果都几意外，可能因为中原大厦业权唔够80%，未达强拍门槛有关，大厦仲差3伙先够八成业权。佢话开价已经考虑各项因素，唔算进取。
有到场嘅业主就唔觉得失望，担任业主立案法团司库的中原大厦业主邓先生话，未有太大失望，只系预料唔到无发展商嚟竞投，或者同市况转差有关。远东大厦业主沈先生都话，唔失望，市建局处理得好，原先计划出售单位换楼。
另外，中原工商铺潘志明同刘Sir讲，资深投资者林子峰持有的屯门兆麟苑停车场车位，喺寻日拆售，之前收到5,500张认购入票，原先首批100个车位，售价由49万元起，其后加推全数，并在3小时内沽清。利嘉阁商铺黄国柱表话，该批车位共449个，吸引逾千名准买家到场认购。
汤文亮吼机会执平铺
另Q房网跑马地旗舰店寻日开幕，个铺位嘅业主纪惠集团行政总裁汤文亮话，租金较浴足店旧租倍增，佢话最近市道调整，相信整体铺市明年会跌唔多於10%，一线街租金跌幅会严重啲。佢仲话集团有约150间街铺，佢话会趁市道回软物色平货，遇啱靓铺会锄价，因业主会急放。
刘Sir
App下载
