主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 6243
地產新聞
樓市出更:北角兩幢舊樓打孖流拍
(太陽) 2015年11月27日
近排唔單止大埔有官地因為司法覆核要延遲截標,就連私人舊樓業權拍賣都賣唔出。劉Sir知道,尋日透過中原測量師行拍賣嘅北角遠東大廈85%業權同埋中原大廈72.5%業權,喺無競投者出席情況下而流拍,有業主覺得同市況轉弱有關。但投資者林子峰尋晚拆售嘅屯門兆麟苑車位,就好熱鬧,有成千名準買家到場,三個鐘賣晒449個車位。

劉Sir尋日去咗舊樓拍賣現場,今次係由市區重建中介服務有限公司委託中原測量師行拍賣舊樓業權,兩項舊樓分別係北角七姊妹道187至193號遠東大廈85%業權、同埋七姊妹道195至199號/健康東街23至25號中原大廈72.5%業權,拍賣開價6.5億元。

屯門449車位閃電沽清

老友中原張競達負責今次拍賣,原定尋日下午三點開始,但現場所見,競投區座位空無一人,張競達將時間押後五分鐘,都無競投者到場,最後收回拍賣物業。張競達同劉Sir講,一直都有發展商查詢,對結果都幾意外,可能因為中原大廈業權唔夠80%,未達強拍門檻有關,大廈仲差3伙先夠八成業權。佢話開價已經考慮各項因素,唔算進取。

有到場嘅業主就唔覺得失望,擔任業主立案法團司庫的中原大廈業主鄧先生話,未有太大失望,只係預料唔到無發展商嚟競投,或者同市況轉差有關。遠東大廈業主沈先生都話,唔失望,市建局處理得好,原先計劃出售單位換樓。

另外,中原工商舖潘志明同劉Sir講,資深投資者林子峰持有的屯門兆麟苑停車場車位,喺尋日拆售,之前收到5,500張認購入票,原先首批100個車位,售價由49萬元起,其後加推全數,並在3小時內沽清。利嘉閣商舖黃國柱表話,該批車位共449個,吸引逾千名準買家到場認購。

湯文亮吼機會執平舖

另Q房網跑馬地旗艦店尋日開幕,個舖位嘅業主紀惠集團行政總裁湯文亮話,租金較浴足店舊租倍增,佢話最近市道調整,相信整體舖市明年會跌唔多於10%,一線街租金跌幅會嚴重啲。佢仲話集團有約150間街舖,佢話會趁市道回軟物色平貨,遇啱靚舖會鋤價,因業主會急放。

劉Sir