今个礼拜会有三幅发展地皮截意向同截标，打头阵系今日截意向嘅港铁（00066）将军澳日出康城第七期，系日出康城首个设有商场期数，刘Sir相信会有唔少财团递交意向了解咗条款先，有测量师老友觉得最少都有10几份意向书。另马鞍山落禾沙里住宅地同埋九龙湾祥业街商业地就紧接喺今个礼拜五截标，呢两幅地估值最高加埋超过44亿元。
刘Sir知道，今日截意向嘅日出康城第七期，商场部分系项目嘅最大卖点，老友理想城市张圣典都认同，项目嘅亮点无疑系佢嘅商场元素，相信可以吸引到各类财团竞投，估计意向书数目最少都有10几份。其实新地（00016）早排都表态话会参与竞投。
呢个项目住宅楼面约莫75.6万方尺，另有约47.9万方尺嘅商场楼面，综合市场估计，住宅部分每方尺补价大概1,800至2,300元，商场部分就约3,500至6,000元，预期项目补地价金额大约34.29亿去到42.35亿元，拉返匀嚟计，每方尺补价约莫2,776至3,428元。
马鞍山住宅地周五截
另外，今个礼拜五仲有一幅住宅同埋一幅商业地截标，包括近住帝琴湾嘅马鞍山落禾沙里住宅地。
张圣典话，呢区系新发展地区，地价可以看高一线，不过地皮位置上唔及之前批出嘅两幅马鞍山白石地皮，佢估计每方尺楼面地价约莫5,000元水平，计返估值大约11.29亿元，系市场下限价。
九龙湾商业地估29亿
至於，同日截标嘅九龙湾祥业街、常怡道与伟业街交界商业地，张圣典就话，项目无加设禁止拆售条款，位置亦邻近规划紧嘅九龙东行动区，系未来区内发展核心地带，应该可以吸引有意喺该区立足嘅财团投标，估计每方尺楼面地价大约6,000元，即系估值约29.41亿元，系目前市场估值上限。
其实，近年政府都批咗唔少九龙东嘅商业地，刘Sir相信已经喺区内「插旗」嘅发展商都有一定机会入标，好似领汇（00823）同埋会德丰地产等，因为佢哋将会有比较大嘅协同效益。
刘Sir
App下载
