今個禮拜會有三幅發展地皮截意向同截標，打頭陣係今日截意向嘅港鐵（00066）將軍澳日出康城第七期，係日出康城首個設有商場期數，劉Sir相信會有唔少財團遞交意向了解咗條款先，有測量師老友覺得最少都有10幾份意向書。另馬鞍山落禾沙里住宅地同埋九龍灣祥業街商業地就緊接喺今個禮拜五截標，呢兩幅地估值最高加埋超過44億元。
劉Sir知道，今日截意向嘅日出康城第七期，商場部分係項目嘅最大賣點，老友理想城市張聖典都認同，項目嘅亮點無疑係佢嘅商場元素，相信可以吸引到各類財團競投，估計意向書數目最少都有10幾份。其實新地（00016）早排都表態話會參與競投。
呢個項目住宅樓面約莫75.6萬方呎，另有約47.9萬方呎嘅商場樓面，綜合市場估計，住宅部分每方呎補價大概1,800至2,300元，商場部分就約3,500至6,000元，預期項目補地價金額大約34.29億去到42.35億元，拉返勻嚟計，每方呎補價約莫2,776至3,428元。
馬鞍山住宅地周五截
另外，今個禮拜五仲有一幅住宅同埋一幅商業地截標，包括近住帝琴灣嘅馬鞍山落禾沙里住宅地。
張聖典話，呢區係新發展地區，地價可以看高一線，不過地皮位置上唔及之前批出嘅兩幅馬鞍山白石地皮，佢估計每方呎樓面地價約莫5,000元水平，計返估值大約11.29億元，係市場下限價。
九龍灣商業地估29億
至於，同日截標嘅九龍灣祥業街、常怡道與偉業街交界商業地，張聖典就話，項目無加設禁止拆售條款，位置亦鄰近規劃緊嘅九龍東行動區，係未來區內發展核心地帶，應該可以吸引有意喺該區立足嘅財團投標，估計每方呎樓面地價大約6,000元，即係估值約29.41億元，係目前市場估值上限。
其實，近年政府都批咗唔少九龍東嘅商業地，劉Sir相信已經喺區內「插旗」嘅發展商都有一定機會入標，好似領匯（00823）同埋會德豐地產等，因為佢哋將會有比較大嘅協同效益。
劉Sir
App下載
