早期纳米楼

　　4月19日经济日报A2版大字标题：「沙田河畔尺价估值2.5万，超太古城」，睇到都吓了一惊。乜咁贵呀？沙田河畔花园系香港最早期嘅「纳米楼」，落成於1980年代初，记得当时左丁山任职於一间加拿大银行，曾经奉命审视银行是否应该参与建筑贷款；嗰阵时，好运中心、沙田中心、河畔花园、翠华花园相继兴建，同是细面积单位，河畔花园算系细中之细。可恨当年无老经验高人指点，情愿住在排头村村屋，也不肯买入「细单位」，从自住博升值或投资角度嚟讲，左丁山直情系笨蛋。

　　尺价2.5万嘅河畔花园单位系连埋天台嚟计，或者因此估值高一啲，但打番个八折，中层单位咪都要2万元一尺？实用面积242尺，就要484万咯噃，想当年，每间只系卖十几二十万，直至到1990年初，左丁山姐姐（已故）仍然住在洗衣街残破唐楼，业主不肯维修，天花石屎不时脱落，露出钢筋，内墙渗水，破璃窗难挡风雨，整体环境比左丁山读书年代更加恶顶，於是计好条数，走去河畔花园睇楼，谂咗买一间畀姐姐住，讲好价二十几三十万之后，叫姐姐去睇睇，点知佢好唔钟意，话太细无空间，睡房张床要「度身订造」，用埋窗台先至可以摆下一张床。弹完又弹，业主唔高兴，透过经纪讲：「卖咗嘞」，於是买唔成。

　　一位鼎鼎大名嘅投资高手，今天入住几亿元嘅豪宅，曾在微时（大家都在银行界工作，同是经理级）同左丁山吃午饭，听咗一个电话就买咗一个跑马地单位，左丁山问佢：「喂，你唔驶睇楼嘅咩？」F君大笑：「只要系认为个yield合理，可以租出去由租客代你供楼嘅话，又唔系自己住，买楼唔驶睇楼嘅！」真系一巴畀佢冚醒。香港楼系要来炒，不是要来住的。习近平所讲：「房子是用来住的，不是用来炒的」，与香港情况刚刚相反。

　　当日如果有理无理，即使姐姐唔肯住，自己买来租出去，河畔单位可以帮自己赚唔少啦，今日身家同F君相差太远，一个小原因就系衰在坚持买楼之前先睇楼罗！

　　细楼尺价高，当然反映一个道理，就系「细细粒容易食，只要银码总数唔系大，还是有人负担得起，总系要上到车先」，直接反映出一种恐慌性需求心态，还未受到加息影响。