地產博客 > 絲絲細語 返回
瀏覽人次:17665    回應:2
絲絲細語

早期納米樓

 

左丁山

2018年4月23日

  4月19日經濟日報A2版大字標題:「沙田河畔呎價估值2.5萬,超太古城」,睇到都嚇了一驚。乜咁貴呀?沙田河畔花園係香港最早期嘅「納米樓」,落成於1980年代初,記得當時左丁山任職於一間加拿大銀行,曾經奉命審視銀行是否應該參與建築貸款;嗰陣時,好運中心、沙田中心、河畔花園、翠華花園相繼興建,同是細面積單位,河畔花園算係細中之細。可恨當年無老經驗高人指點,情願住在排頭村村屋,也不肯買入「細單位」,從自住博升值或投資角度嚟講,左丁山直情係笨蛋。

  呎價2.5萬嘅河畔花園單位係連埋天台嚟計,或者因此估值高一啲,但打番個八折,中層單位咪都要2萬元一呎?實用面積242呎,就要484萬咯噃,想當年,每間只係賣十幾二十萬,直至到1990年初,左丁山姐姐(已故)仍然住在洗衣街殘破唐樓,業主不肯維修,天花石屎不時脫落,露出鋼筋,內牆滲水,破璃窗難擋風雨,整體環境比左丁山讀書年代更加惡頂,於是計好條數,走去河畔花園睇樓,諗咗買一間畀姐姐住,講好價二十幾三十萬之後,叫姐姐去睇睇,點知佢好唔鍾意,話太細無空間,睡房張床要「度身訂造」,用埋窗台先至可以擺下一張床。彈完又彈,業主唔高興,透過經紀講:「賣咗嘞」,於是買唔成。

  一位鼎鼎大名嘅投資高手,今天入住幾億元嘅豪宅,曾在微時(大家都在銀行界工作,同是經理級)同左丁山吃午飯,聽咗一個電話就買咗一個跑馬地單位,左丁山問佢:「喂,你唔駛睇樓嘅咩?」F君大笑:「只要係認為個yield合理,可以租出去由租客代你供樓嘅話,又唔係自己住,買樓唔駛睇樓嘅!」真係一巴畀佢冚醒。香港樓係要來炒,不是要來住的。習近平所講:「房子是用來住的,不是用來炒的」,與香港情況剛剛相反。

  當日如果有理無理,即使姐姐唔肯住,自己買來租出去,河畔單位可以幫自己賺唔少啦,今日身家同F君相差太遠,一個小原因就係衰在堅持買樓之前先睇樓囉!

  細樓呎價高,當然反映一個道理,就係「細細粒容易食,只要銀碼總數唔係大,還是有人負擔得起,總係要上到車先」,直接反映出一種恐慌性需求心態,還未受到加息影響。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 儒來 2018-04-23 13:52:01
左兄,

布衣中問英雄,皇圖霸業成何用?禾忝高低六代宮.....

兄巳是隨心所欲之境界,只有被羡慕,人上人啦!
2. 狗頭猫 2018-04-25 09:18:30

 心安吟            宋  邵雍

 心安身自安 , 身安室自寬 ,
 心與身俱安 , 何事能相干?
 誰謂一身小?其安若泰山,
 誰謂一室小?寬如天地間。