在投资论坛遇到了东瀛游创办人之一,禤国全,听佢讲分享个人投资之道,几有启发性,充份反映过去四十年香港人向上流搵到钱嘅情况,但正如禤老板所讲今时唔同往日,佢之发达途径未必再行得通咯。照左丁山睇,禤老板与拍档(别号五郎)之创业及奋斗精神,永远值得年轻人学习,但个人搵钱途径又系几似苏州过后冇艇搭嘅。
想当年,小YY还是两岁左右,冬天到日本旅行,遇上一位好年轻导游,在「日光」雪地上,五郎抱住小YY掷雪球。多年之后,东瀛游成为著名日本旅行专门店,左丁山初次认识禤老板,多口讲一句:「旧时有个导游叫做五郎」,禤老板大笑:「咪就系我个拍嗱罗,我地在东京学日文,为生活费与学费,兼职做导游,多数系做纵横游嘅旅行团。返到香港,仍然做导游,后来索性胆粗粗创办东瀛游,一路砌到依家,五郎负责内部营运,我负责外交,外拓业务!」这是一个白手兴家,从无到有的成功故事,好有狮子山精神。
但扩充资本从何而来呢?就系把握,抓紧本港楼市只升不跌嘅神话。禤老板话佢与父母同住,初住西环旧楼,买价二十几万,升咗一倍,卖掉,买康怡花园,升咗,卖掉,买比华利山(五百几万),升到千二万,卖掉,在温哥华买一间屋,在香港买一层楼,而每次卖楼所得,拿出换楼嘅一成首期,供按揭供九成,余款就摆晒落生意度做资本,如此这般,一路顺风,得到大收成。
禤老板话:「现在此路不通,按揭只限借五百万,年轻人冇法子抄我条桥咯。」确实系嘅,年轻人见到楼价升到上天,楼按有严格限制,储蓄三成至五成首期,似乎难以登天,咪索性死咗条心,有余钱咪一年去日本五六次罗,益晒日本及类似东瀛游嘅公司。禤老板对年轻人有忠告:「成日去日本嘅话,年轻朋友最好晚上去新宿睇吓,去了解吓点解有咁多人在外瞓纸皮箱过夜,无家可归嘅!好多日本人年轻时积蓄不够,或做散工,无退休福利,又或者年老失业,境况十分不堪。现在香港年轻人亦钟意活动自由,钟意做长散工,唔希罕公司医疗福利,我唔敢话佢哋唔啱,不过做freelance够free之余,要记得储蓄呀!」顺口问佢一句,在日本买楼如何?禤老板话:「日本楼价好难升嘅,自住无妨,放租就要睇location,唔好乱咁买!」