在投資論壇遇到了東瀛遊創辦人之一，禤國全，聽佢講分享個人投資之道，幾有啟發性，充份反映過去四十年香港人向上流搵到錢嘅情況，但正如禤老闆所講今時唔同往日，佢之發達途徑未必再行得通咯。照左丁山睇，禤老闆與拍檔（別號五郎）之創業及奮鬥精神，永遠值得年輕人學習，但個人搵錢途徑又係幾似蘇州過後冇艇搭嘅。
想當年，小YY還是兩歲左右，冬天到日本旅行，遇上一位好年輕導遊，在「日光」雪地上，五郎抱住小YY擲雪球。多年之後，東瀛遊成為著名日本旅行專門店，左丁山初次認識禤老闆，多口講一句：「舊時有個導遊叫做五郎」，禤老闆大笑：「咪就係我個拍嗱囉，我地在東京學日文，為生活費與學費，兼職做導遊，多數係做縱橫遊嘅旅行團。返到香港，仍然做導遊，後來索性膽粗粗創辦東瀛遊，一路砌到依家，五郎負責內部營運，我負責外交，外拓業務！」這是一個白手興家，從無到有的成功故事，好有獅子山精神。
但擴充資本從何而來呢？就係把握，抓緊本港樓市只升不跌嘅神話。禤老闆話佢與父母同住，初住西環舊樓，買價二十幾萬，升咗一倍，賣掉，買康怡花園，升咗，賣掉，買比華利山（五百幾萬），升到千二萬，賣掉，在溫哥華買一間屋，在香港買一層樓，而每次賣樓所得，拿出換樓嘅一成首期，供按揭供九成，餘款就擺晒落生意度做資本，如此這般，一路順風，得到大收成。
禤老闆話：「現在此路不通，按揭只限借五百萬，年輕人冇法子抄我條橋咯。」確實係嘅，年輕人見到樓價升到上天，樓按有嚴格限制，儲蓄三成至五成首期，似乎難以登天，咪索性死咗條心，有餘錢咪一年去日本五六次囉，益晒日本及類似東瀛遊嘅公司。禤老闆對年輕人有忠告：「成日去日本嘅話，年輕朋友最好晚上去新宿睇吓，去瞭解吓點解有咁多人在外瞓紙皮箱過夜，無家可歸嘅！好多日本人年輕時積蓄不夠，或做散工，無退休福利，又或者年老失業，境況十分不堪。現在香港年輕人亦鍾意活動自由，鍾意做長散工，唔希罕公司醫療福利，我唔敢話佢哋唔啱，不過做freelance夠free之餘，要記得儲蓄呀！」順口問佢一句，在日本買樓如何？禤老闆話：「日本樓價好難升嘅，自住無妨，放租就要睇location，唔好亂咁買！」
App下載
