「阿妈，我得咗喇！」呢句陈年口头禅相信系唔少居屋买家嘅心声，事关今时今日上楼仲难过上青天，尤其系居屋申请动辄超额几十倍，有幸中签兼成为首批拣楼人士，难度堪比中六合彩o架
强台风「天鸽」吹袭本港，新一期居屋延至寻日拣楼，但一样无阻拣楼人士嘅兴奋心情，其中一位选购彩虹彩兴苑单位嘅男士喜形於色，话之前三次抽居屋都抽唔中，今次得咗，终於可以同女朋友拉埋天窗嘞。至於另一位选购梅窝银蔚苑嘅教师就坦言，家阵想搵六百万楼下嘅上车盘基本上系唔使旨意，即使梅窝交通冇咁方便都惟有照杀喇。
咁又系呀，楼价高处未算高，唔止一手楼售价惊人，就连二手楼平均售价都升至近七百万元史上新高，二、三百万嘅居屋成为抢手货，一啲都唔出奇。好似呢批位於彩虹及梅窝嘅居屋咁吖，前者有噪音问题，后者位置隔涉，但一样争崩头，超额申请逾四十八倍，申请者要过五关斩六将先至能够成为买家，唔开心就假。问题系新居屋单位只有二千余个，相对数十万无壳蜗牛，直头连杯水车薪都称唔上罗。
讲起就唏嘘，住屋明明系市民基本生活所需，偏偏喺香港变成高不可攀嘅奢侈品，居屋买家只系少数嘅幸运儿咋，就连危机四伏嘅劏房，租金动辄六、七千元起跳，好多基层早已负担唔起。就算系大学毕业生，有正当职业兼唔饮唔食，「冇父干」嘅话，上楼一样遥遥无期。小学鸡政客话年轻人连扑嘢嘅地方都冇，如果唔因人废言，都唔系冇道理o架，愈来愈多年轻人走上街头，咪就系房屋问题变成政治问题嘅写照罗。
难为港府将协助年轻人置业挂喺口边，讲咗N年，有乜实际成绩先？就讲青年宿舍吖，出发点唔系唔好，但六个选址只提供二千几个单位咁大把，部分仲要五、六年后先至落成，蚊都瞓蛇都死喇。再讲吖，想置业嘅点止年轻人，好多家庭都好心急上楼，但实情系公屋轮到死，私楼贵到死，捱生捱死都系两头唔到岸。港府谂到冇嘢好谂，学人搞咩「良心劏房」喎，简直唔知丑字点写。
讲嚟讲去，惟有增加房屋供应先至系正路，可惜吖，港府拓土建屋寸步难行，而且系都要弃易取难，舍近求远，唔系打填海主意，就系郁郊野公园用地，即系自寻烦恼啫。港府家阵又话要成立专家小组，就拓土凝聚全民共识喎，怕就怕筑室道谋，三年无成，重蹈「议而不决、决而不行」嘅窠臼。冇符喇，旧政府冇灵魂，新政府又系冇灵魂，仲话「好打得」，吹牛唔上税吖嘛！
App下载
