南方人大多饮食清淡，一食辣嘢就满头大汗，「微辣」都顶唔顺，要「BB辣」至掂。北方人就唔同讲法嘞，直头无辣不欢，愈辣愈叹。其实市场对港府推出楼市「辣招」嘅反应都系一样，打工仔上楼就话愈来愈难，但完全无碍有钱人嘅扫货意欲，你话系咪吹胀吖！
呢，港府月初推出加强版「从价印花税」，针对购买第二个住宅物业划一徵收百分之十五印花税，原本谂住压抑市场需求，阻止楼价狂飙，点不知适得其反，辣招呢头推出，多个屋苑嘅成交价嗰头应声打破历史新高。其中红磡一个楼盘，据闻就有内地买家大手笔扫货，净系买家印花税同新印花税，加加埋埋超过七百万元，问你怕未。
出现呢个情况，其实一啲都唔令人意外。喺人民币贬值以及内地楼市调控等情况下，内地资金外流嘅压力愈来愈大，本地投资客及内地豪客将辣招影响计埋落成本，计过度过发现有so，自然照样重锤出击喺香港入货。咁就难怪大部分接受「东方报业民意调查」访问嘅市民，都认为新一轮加辣对楼市只有短暂影响，部分受访者甚至担心新辣招杀错良民，最终弄巧成拙。
市民嘅担心绝对唔系多余。大家有眼见，以往所谓「辣招」出笼，好快就被市场适应，楼市静完一轮又试掉头回升。最惨系买卖成本增加，投资者待价而沽，放盘数量减少，真正用家反而更难上楼。正如上述民调显示，大部分受访者认为辣招治标不治本，根本无法解决供求失衡问题。
话时话，人民币贬值、国际热钱寻求避险，本港的确无法喺呢啲「大气候」下独善其身，但如果唔系港府拓土建屋寸步难行，房屋单位长期供不应求，楼市都唔会好似今日咁火上加油，癫处未算癫喇。港府成日吹嘘私楼供应达标，实际上好多一手新盘都系不设间隔嘅「纳米楼」，所谓「达标」，水分多於一切。市场预期未来供应继续短缺，「有买贵，冇买错」咯喎，楼市想健康发展都难。讲到尾，房屋系刚性需求，点样加辣都系无用，盏扭曲市场、加重无壳蜗牛痛苦嘅啫。上述民调又显示，近七成受访者直认无法安居乐业，已经放弃置业梦想，即系哀莫大於心死喇。
不过又唔使咁心灰嘅，市民难圆安居梦，催生另类畸形住屋市场，家阵啲劏房愈来愈细，猪栏、鸡窦改装嘅固然可以住人，下厕上房嘅「夜来香」亦有价有市，仲有净系够瞓一个人嘅太空舱，月租四千零银就有交易，不妨谂谂佢吖！
App下载
