成都武侯祠有副对联，下联系咁写嘅：「不审势则宽严皆误，后来治蜀要深思。」计功夫茶话斋，点止治蜀要审时度势，治港更须如此，尤其系房屋政策必须宽严合度，否则楼市逆转，唔止拖累经济民生，仲随时演变成政治危机o架。
讲开楼市问题，唔可以唔提市建局首个资助出售房屋「焕然壹居」，首日开售竟然遭遇冷场，高达七成申请人甩底，同年初录得逾三十六倍认购率嘅火爆情况不可同日而语。市建局不得不打定输数，话「甩底率」咁高，同市场睇淡后市有关，万一单位最终无法全部卖出，不排除以市价发售喎。
讲真，「焕然壹居」位於启德发展区，位置理想，加上沙中线年后开通，照计对市场有好大吸引力，地产中介都睇好楼盘潜力添。殊不知近期经济转差，楼市下跌，区内平盘涌现，买家有大把选择，变成皇帝唔急太监急，就算市建局作出应变措施，包括提前一个月安排拣楼，按最新楼价调整折扣率，由原定以市价八折出售修订为八六折，都系聊胜於无，帮助唔大。
曾几何时，香港楼市长升长有，连平时乏人问津嘅凶宅都争崩头，简直唔理好丑，但求就手。好似去年初当局推出首批新居屋咁吖，超额认购六十一倍，其中白表认购更超逾百倍，中签仲难过中六合彩，边个谂到唔够一年楼市就呈现冰火两重天喎。
鬼咩，香港经济自去年逆转，楼市顺势调整，迄今已经跌近一成五，连地产商都唔睇好后市，有人扬言最多可能跌价三成，负资产噩梦挥之不去，仲边有买家敢贸然入市吖。屋漏偏逢连夜雨，国际评级机构近期调低香港信贷主权评级展望，加上股市风高浪急，有「大笨象」之称嘅滙丰跌至七年前低位，市场趋於审慎。市民一动不如一静，留个钱傍身好过喇。
再讲吖，家阵嘅楼市话就话以用家为主，刚性需求仍大，同九七金融风暴前夕炒风炽热有明显分别，但正如有人话斋，唔理市场需求几咁刚性都好，亦冇可能唔受经济大环境影响。家阵市场最关心就系港府几时「减辣」，高官一味推说未系时候，坚持维持辣招，再拖落去，楼市会唔会进一步下挫，真系话唔埋o架。
大家一定记得，老董年代嘅八万五政策碰上亚洲金融风暴，搞到楼市崩溃，哀鸿遍野，老董就系咁「脚痛」发作嘞；曾荫权爵士上台后无视经济好转，坚持少建公屋、停建居屋，终於埋下今日房屋问题嘅祸根。所以话，一本通书读到老并唔系办法，因时制宜至系正路，港府听到未呀？
App下载
