呢几年政府频频批地，市场新盘多咗，近排销售气氛又急速降温，新盘货尾开始积压，特别系供应多嘅地区，刘Sir睇见代理一份报告，上季屯门、元朗呢两区新盘货尾加埋按季急增1,590伙，去到1,944伙，占咗全港货尾量7,509伙嘅26%，而全港新盘货尾数目亦按季多咗333伙，创近八个季度新高。
刘Sir老友中原黄良升话，旧年第四季选取咗全港193个新盘，总数有63,558伙，已登记卖咗56,035伙，扣重覆登记等，货尾单位有约7,509伙，占比重约11.8%，货尾量按季增加约333伙，系近八个季度新高。
屯门元朗共涉1944伙
而货尾都几集中喺新界西北，屯门同埋元朗嘅货尾分别按季多咗850及740伙，最新有857及1,087伙，系全港最多货尾嘅地区，而两区加埋约1,944伙货尾，就占全港约26%。
黄良升就话，咁系反映咗区内新盘销售唔理想，出现货尾积压，未来区内还有多个大型新盘推出，会构成颇大销售压力。以发展商做单位统计，佢话恒地（00012）新盘货尾有1,542伙，新地（00016）及长实地产（01113）就分别有762及750伙。
娉廷开放示范单位
刘Sir知道嚟紧元朗都有新盘部署推出，长实地产封海伦话，元朗娉廷示范单位开放咗畀VIP参观，有机会今个礼拜公布销售安排，农历新年后推出，暂时未决定推售单位数目。远展（00035）方俊就话，元朗洪水桥洋房项目申请紧预售，预计六至七月推出。
此外，长实地产油塘东源街5及8号早排向城规会申请兴建5座分层住宅，提供536个单位，呢个综合发展区部分土地拆咗出嚟做住宅用途，所以规划署唔反对。
至於英皇国际（00163）屯门新安街15号及同区建发里4号两幢工厦项目，早前申请改装做商场同商厦用途，规划署亦都唔反对。
另外，规划署修订坚尼地城及摩星岭大纲图，修订多幅土地用途，包括3幅土地做私宅用途，提供1,000伙，其中域多利道与加多近街交界用地将提供约63.7万方尺楼面。中原又表示，一月份整体楼宇买卖登记3,122宗，涉额218.56亿元，宗数创有纪录以来25年历史新低。
刘Sir
App下载
