胡百全律师事务所寻日起一连两日喺中环大会堂举行七十周年图片展，为儿童发展配对基金筹款。该律师行首席合伙人Moses郑慕智出席活动开幕时，话由入行至今已做咗四十二年，忆起当年初入行实习，首月人工为六百七十元，一个月后加至一千元，但佢都要等到一九七七年先首次置业。佢话当年供楼都唔容易，每月供款三千六百元，笑言好在有太太一齐帮手供，负担即时减半。
今次图片展除咗展出七十年前嘅旧照片外，Moses仲搵嚟一啲同事及朋友一齐拍摄作品用作筹款拍卖。Moses徒弟、该律师事务所合伙人黄嘉纯都有现身，与师傅相聚即互戴高帽。Moses形容对方青出於蓝，又做过律师会前会长。黄嘉纯则指自己一九八五年由Moses正式签佢做律师，仲好记得当晚大家食饭庆祝，食咗八千元，相等於佢当时一个月人工，可以话系「未见官先打三十大板」，但事后谂番，都觉得系超值嘅。
林月明观旧照惜光阴
同场仲有律师事务所合伙人林月明，佢同黄嘉纯一齐研究紧一张讲「租者置其屋」计划的相片，林月明话现时旧事重提，感觉时间过得好快。喺图片展之中仲见到一幅胡百全「攻打四方城」嘅旧照片，打得好兴奋；另外现场亦有展出办公室嘅古董打字机同契约用具，非常珍贵。
App下载
