丝丝讲场：汤文亮输完又嚟赌过

「细价楼爆煲论」半年前一出，纪惠集团副主席兼行政总裁汤文亮人气爆灯，可惜佢嘅预言唔应验，寻晚出嚟做找数真汉子，喺湾仔福临门摆咗九围「细价楼不爆煲夜认输宴」。不过汤文亮输完又嚟赌过，寻日朝就已经喺自己网志上再挑机，搵科达地产主席汤君明嚟多场牙骹战，由寻日起计三个月为限，话楼价必跌。

细楼未爆煲 摆酒认输

今次每席要1.88万元，计埋酒水同贴士加加埋埋大约30万元落楼。食乜？红烧排翅、三十头原只吉品鲍咁罗。

开席时，汤文亮话输都输得开心，事关见到咁多朋友。丝丝在场亦见到美联（01200）主席黄建业、摸王黎汝远、岭南大学经济系教授何泺生、投资者蔡志忠同股神陆东等仲有好多位。

汤文亮寻晚话摆酒容易请客难，咁边个有请又冇嚟到？有两位，一位系林一鸣，汤文亮就因为挑机佢而搞出呢场认输宴；另一位就系汤文亮寻日嘅新挑机对象汤君明。

汤君明被挑机懒得理

被挑机，咁汤君明点？汤君明一於懒理，佢话觉得汤文亮净系针对细价楼，又冇充分理由支持，汤君明认为成个楼市牵涉住宅、工商铺、以至农地等咁多瓣，唔可以一竹篙打一船人，虽然佢并唔反对楼市会跌，但就话依家未系时候咁话。

有份饮呢餐认输宴嘅又点睇？蔡志忠话唔太睇淡后市，仲话细价楼唔会跌，永远都好多人要买。而黎汝远就话贵租撑住楼市，所以楼价难跌。睇嚟，汤文亮今次又系以寡敌众喎。

余丝韵