近排新盘卖得咁好，发展商梗系食住个势部署推盘啦。刘Sir知道，单喺上个月就有4个项目入纸申请预售楼花，加埋有2,140伙，按月劲升四倍，好似新入嘅新地（00016）元朗东头德业街项目，就有523个单位申请预售，并命名为「映御」，估计项目会喺下季推出。至於长实前元朗邨限尺项目同埋恒地（00012）等嘅乌溪沙迎海第四期都分别入咗纸申请预售。
发展商积极推盘，特别系新地同长实两间大型发展商，刘Sir睇番地政总署嘅资料，喺上月有4个项目新申请预售楼花，涉及单位大约2,140伙，对比三月足足多咗四倍咁多，包括新地元朗东头德业街映御，提供523个单位。
26项目逾九千伙待批
至於同於上月申请预售嘅仲有本港第一个限尺项目嘅长实前元朗邨重建，同埋恒地等嘅乌溪沙迎海第四期，分别提供约1,129及474个单位，预计两个项目都会喺下半年推出。
虽然上个月有2,140个单位新申请预售楼花，但系依家合共26个待批项目，加埋约9,452个单位，只系比起三月多咗80个。整体待批项目无大幅增加，原因系上个月获批预售嘅3个项目中，合共多达2,060伙，按月增加逾两倍，创近七个月新高。
呢3个项目由新地同长实囊括，包括新地的东涌东环发展项目第二期、何文田佛光街23号天铸，分别占932及256伙最多，而长实将军澳峻滢II亦有872伙获批预售。
鸭脷洲地倡改住宅
刘Sir老友美联刘嘉辉话，上个月申请预售楼花单位数目大增，正正反映发展商加快部署卖楼，推盘意欲相当积极，预计唔少项目可望喺年内相继获批并推出市场，新盘市场势将百花齐放。另外，刘Sir发现，嘉里建设（00683）嘅屯门扫管笏青山公路第48区将会押后一年落成，最新嘅预计落成日期系二○一七年十二月底。
政府继续密密手搵地，根据区议会文件，规划署建议将鸭脷洲利南道现时用作香港驾驶学院土地，转为住宅（甲类）用地，最多可建楼面逾79万方尺楼面，提供约1,500伙住宅单位。
刘Sir
App下载
