深水埗福荣街住宅地将会喺今个礼拜五截标。刘Sir屈指一算，原来同区已有超过二十年未有政府住宅地供应，不过呢个项目最「棘手」系规定咗发展商要负责重置垃圾收集站，同埋提供公众停车场。测量师老友都觉得咁会对发展商出价构成影响，之但系作为少有嘅市区住宅地供应，佢哋相信竞投反应唔会差得去边，市场估值就约莫由13.8亿元起跳。
刘Sir知道，呢幅深水埗福荣街、营盘街与福华街交界住宅地，占地约莫3.4万方尺，总楼面大约30.7万方尺，其中住宅楼面占咗大概25.6万方尺。
公众停车场纳总楼面
今次出售条款规定咗发展商须负责重置垃圾收集站，面积大约7,986方尺，不过政府就会向发展商畀返最多5,280万元作为建筑费，另外项目亦规定要提供公众停车场，相关嘅面积会纳入总楼面内。
唔少测量师老友都觉得，呢个项目最大考虑因素系强制兴建嘅垃圾收集站同埋停车场。
理想城市张圣典都咁话，对发展商嚟讲，最「棘手」系要负责重置垃圾收集站，仲要等新垃圾收集站完成后三个月，旧垃圾站先会交畀发展商自行拆卸，会延长咗项目发展期，增加发展成本，佢估计每方尺楼面地价大约4,500元。计番估值大约13.8亿元，系市场下限价。
美联测量师行林子彬都话，垃圾收集站同埋公众停车位面积要计入总楼面，发展商出价一定会反映。
邻近港铁站 仍属吸引
佢话地盘位处内街，铺位价值唔算高，但讲到底都系市区项目，又邻近港铁站，相信都可以吸引到各类发展商入标。
刘Sir发现，原来今次截标嘅福荣街住宅地，系呢区超过二十年来首幅政府住宅供应，不过，其实深水埗近年都有唔少市区重建局发展项目批出，单计过去两年就有五个咁多，好似最近期喺旧年年底由德祥地产（00199）投到嘅深水埗海坛街需求主导项目。
而数到呢区规模最大就系长实地产（01113）前年夺得嘅深水埗海坛街／桂林街及北河街项目，拟供约877个单位。
刘Sir
App下载
