大学宿位不足，刘Sir知道有3个本港大学生睇准时机，成立网站「漂乐居」，利用互联网做平台，将早前大包租形式承租嘅一批单位，分拆床位分租畀未有宿位嘅非本地学生。喺今个暑假佢哋就投资咗过百万元承租各区住宅，沙田同大围占约一半，喺短短两个礼拜已经租咗约30个租盘，占大包租单位嘅八成，涉及80至90个非本地学生租客，估计呢个计划回报率有10%咁高。
寻日「漂乐居」网站创办人之一、依家重喺科技大学读紧工业工程系3年级嘅90后林骏铭同刘Sir讲，喺旧年已经有呢个构思，创立一个大学生互联网平台，再承租邻近大专院校嘅租盘，然后拆细畀冇宿位或毕业咗但留喺香港嘅非本地学生，等佢哋夹份租单位住。
内地大学生占七成
佢仲话，知道赚钱唔多，但希望帮到部分搵唔到宿位嘅非本地学生，佢哋承租咗嘅屋苑有沙田第一城、大围名城、红磡海滨南岸及将军澳东港城等，透过网站将单位分拆租出去，好似每个床位月租介乎2,000至6,000元。
而家有约80至90个非本地学生已经网站成功搵到床位，当中六至七成系内地学生，其余来自日本及韩国等地区，涉及月租约50万元。
林同学举例，网站承租嘅一个大围名城四房单位，实用面积约1,300方尺，由六名非本地学生分租，每名学生月租约3,000至5,900元，月租共约2.8万元，较市值租金约2.6万元为高。
今次佢哋搵咗Q房网香港做顾问；Q房网董事总经理陈坤兴话，公司受漂乐居委托作做租务顾问，而每个单位嘅业主都知道单位会分拆出租。
名城高市价6%租出
踏入暑假租赁旺季，唔少内地学生四出抢租，中原林旭乐话，名城有唔少内地学生租楼个案，最新录得嘅名城1座南翼高层A室，实用面积679方尺，由4名内地学生夹份以每月2.55万元承租，比起市值租金高约6%，实用尺租约37.6元。
该行杜文俊话，沙田市中心刚过去周末连录4宗内地学生承租个案，包括伟华中心4座低层B室，成交月租1.36万元。
美联布少明话，今年上半年租务市场1万元或以下嘅住宅租务比率占整体仅约11.1%，料未来将会跌穿10%水平。
刘Sir
App下载
