踏入九月份，市场除咗非常关心边个会做香港证监会下任主席之外，该会办公室喺二○二○年约满后会否搬离中环，亦系市场话题之一。
证监：最紧要地方啱
日前证监主席唐家成话，已委托顾问研究有关办公室安排，佢个人认为最重要系搵到适合嘅地方，唔排除会迁离中环咁话！
证监会大本营长期都喺中环，如果真系搬出，会有乜境况呢？哈哈，远离「金鱼缸」集中地，第日会否收唔到咁多风或冇咁贴市，咁班蛊惑仔咪好开心？丝丝讲笑啫，唔通离开中环就唔查案咩！
但有口痕友就话，好似近期内地「假疫苗」风波，吉林长春长生生物科技（长生生物）嘅股民，齐齐喺北京嘅中国证监会总部抗议痛哭，又话要尽快复牌、又话要追讨损失咁。而本港证监会当年亦因雷曼迷债事件遇过唔少示威，所以口痕友话搬远啲亦有好处，好似去黄竹坑或九龙东等。
其实睇番其他金融监管、谘询或半官方机构，近年都已陆续搬离中环及金钟核心地带。好似保险业监管局，旧年十二月搬咗去黄竹坑香叶道，租用5万平方尺。主席郑慕智曾话，有啲地区租金太贵，实在不能长期落脚，黄竹坑都好方便啫！
至於强制性公积金计划管理局（积金局）早喺二○一六年初，已将其本来位於九龙环球贸易广场嘅总办事处，与本来喺葵芳新都会广场及中环盈置大厦嘅办事处，陆续搬去葵涌九龙贸易中心。
仲有香港金融发展局（金发局）同金融纠纷调解中心亦都各自搬咗去湾仔阳光中心，依家两个机构做埋邻居。
金管拥国金物业唔使烦
不过金融管理局就肯定会继续留守中环「最高点」，事关佢哋○一年买入国金二期55、56、77至88楼自用，唔需要受租约困扰。不过，金管局亦都好均真，就算系「亲生仔」按揭证券公司租用80楼，都要交市值租金，结果按证二○○四年都顶唔住租金开支，最后要将办公室搬去上环中远大厦。
余丝韵
App下载
