市区重建局今季推出两个重建项目，其中规模相对大一些嘅马头角九龙城道重建项目会喺听日截收发展意向书。呢个项目预计提供约莫216个单位，已经系近一年以嚟伙数最多嘅市建局项目。而项目有未来沙中线嘅优势，有测量师老友估计项目可以收到20几至30份意向书，而项目嘅估值分歧颇大，介乎约7.37亿去到12.9亿元不等。
政府早排公布咗会喺本季推出两个市建局项目，刘Sir知道，听日截收发展意向嘅九龙城道/上乡道重建项目，地盘面积大约1.49万方尺，住宅楼面就约莫11.17万方尺，将会提供大概216个住宅单位，另会有大约2.23万方尺商业楼面。
至於另一个深水埗海坛街「蚊型」需求主导项目就经已喺较早时间推出，并将於下月八日截标。呢个项目喺海坛街205至211A号，占地只系4,553方尺，预计可建总楼面约40,946方尺，只系提供69伙，今年十月嗰阵收到22份意向书。
提供216伙 反应料热烈
刘Sir知道，市建局喺过去一年合共推出咗5个住宅重建项目，但多数系提供几十至百多伙嘅蚊型发展，所以九龙城道项目提供216伙，已经系过去一年规模最大嘅市建局项目。
市场就觉得呢个项目听日截收意向书会有唔错嘅反应，老友理想城市张圣典就话，项目将来拥有铁路沿线优势，加上呢区具有重建概念，都几有发展潜力，对发展商嚟讲都有一定吸引力。
佢估计可以收到20几至30份意向书，预计每方尺楼面地价大约5,500元，计番成个项目估值大约7.37亿元，而市场嘅最高估值约为12.9亿元，计番每方尺楼面地价大约9,621元。
同区多旧楼 二手市呆
呢个地盘邻近一带物业以旧楼为主，而主要屋苑就只系得土瓜湾翔龙湾及傲云峰，受到邻区新盘销售影响，最近二手买卖表现比较呆滞。
老友中原叶文浩话，翔龙湾同埋傲云峰今个月合共有约5宗成交，翔龙湾占咗4宗，最近叫价回软，屋苑平均实用尺价约1.3万元，比起之前跌咗约1,000元。
刘Sir
App下载
