近排楼价插晒水依然交投冰封，连丝丝行过地产代理行都感受到寒意。
话说有日行过代理行，发觉啲卖楼标语变晒样。之前市道好时嗰啲「一闪即逝」固然已经逝去咗，不过连平时见开嘅「四房望海」、「家庭最啱」、「还价即成」都变晒做「不要炒鱿」、「嫁入豪门」、「老公听话」！何止系新年愿望，直头绝对反映代理心中所想。
近呢几个月，二手价闲闲哋跌过百万已经唔罕见，但都仲系唔觉有人争买，有开咗十几年嘅细行话已经四、五个月冇开个买卖单，话呢行「没有明天」。连业界人士都预计，农历新年之后会有500至600间地产代理要摺埋。
变成「不要炒鱿」「嫁入豪门」
咁嘅时势，有边个唔谂住「不要炒鱿」，最好就系「嫁入豪门」，入咗门就梗系想「老公听话」。睇见咁绝望，丝丝行过都差啲停低祈祷。
但最终敌唔过寒意，走快两步过咗港岛区，点知见到吉铺街招个代理名叫「方开单」！佢阿爸系咪咁有先见之明帮佢改个咁嘅名就唔知，不过佢好想开单就系人都知罗。嗰一刻，丝丝好想打电话去慰问吓佢开到单未。
余丝韵
App下载
