囍雨 |
| 出生於七十年代未,成长於八十年代。缅怀所谓的Good Old Days,对香港部份人时常嗟天怨地感无奈,认为香港仍然是「只要努力,仍有出头天」的福地,不擅书写中文,宁写口语。 |
最近,网上有条都几「爆」下嘅片,写到政府好似有好多空置官地之余,仲话政府可以随时引用《收回土地条例》(下称《条例》)收晒啲私人土地发展。骤眼睇落去真系好吸引,不过谂深一层就知冇可能啦,真系咁EASY的话,今届政府又使乜搵地搵得咁辛苦,仲无啦啦畀人闹「盲抢地」吖,真系贪好玩咩。囍雨放假得闲,即管睇睇条《条例》讲咩先,睇吓呢条法例系唔系真系咁「无敌」,一出就可以解决香港土地问题,而完全唔使保护「私有产权」先!
过去数年 收地面积小
先讲《条例》内容啦,简单而言,大约意思系话,政府可以藉住条例,收回私人土地作公共用途,就算业权人唔同意都冇用。听落就好大权,实际又系点呢?
由政府嘅公开文件可见,政府过去几年收嘅地好少,加加埋埋10公顷都唔够。根据一份地政总署答立法会议员提问嘅文件,喺2013、2014同2015年,政府总共只收回5.592公顷嘅土地,用嚟兴建公共房屋同社区设施,啲人成日用维园作为衡量土地面积嘅指标,5.5公顷嘅土地,真系连半个维园都唔够呀!
可能有人会质疑,政府有引用过《条例》收地,即系有办法收番啲地嚟起楼,只系唔敢郁地产商或者土地拥有人啫。囍雨对呢种讲法不敢苟同,试想下,如果政府喺理据不足或者滥用收地机制,被收地嘅业主会点?梗系司法覆核挑战政府决定啦,好似之前上环「丹顿街/永利街」项目咁,除咗收集业权嘅困难,本身就因为司法覆核、城规争议等足足拖咗超过十年!
另一例子就系2015年政府想引用《条例》收深水埗同林街土地畀市建局发展,一样畀人入禀司法覆核。如果认为《条例》存在,所以政府可以好容易收地,呢种想法未免有啲天真。
仲有喎,班反政府人士唔系成日闹政府「有权用尽」咩?政府而家真系有权,不过系备而不用罗,动用《条例》之前,一定要经充份沟通,绝对唔系想点就点!咦?乜政府咁做又唔啱呀?唔系咁得意呀?
自由市场 须平衡公众利益及私有产权
再者,如果政府随便收回私人土地,咁外国投资者对香港仲有冇信心先?唔单只系投资土地嗰啲投资者喎,简单如买咗办公室谂住开业嘅外国机构,可能都会有所顾虑,呢一层大家又有冇谂过呢?随便动用《条例》,到时真系唔会人心惶惶,仲敢投资?我唔信罗!
冇错,政府系可以引用《条例》收地,但《基本法》第六条亦写明政府要依法保护私有财产权,虽然《基本法》第一百零五条亦列明,香港特别行政区依法保护私人和法人财产的取得、使用、处置和继承的权利,以及依法徵用私人和法人财产时被徵用财产的所有人得到补偿的权利,但总体而言,香港《基本法》对私有产权保障仍然系十分严格,其中终审法院喺希慎兴业控告城规会案中就讲明,《基本法》第6及105条均对财产权所赋予的保护问题,考虑有关条文时,须透过「相称性分析(proportionality analysis)」,应审视上诉人在社会所得的利益,与侵犯其受宪法所保护的权利之间,是否取得平衡。
睇到未呀,《收回土地条例》唔系大晒架,如果政府唔喺私有产权同公众利益中取得平衡,上到法庭一样会输!话政府可以随时收地嘅讲法,根本就系以偏概全!!
房屋近年系最困扰香港人嘅大问题,如果大家真系咁想解决土地、房屋问题,点解唔认真了解下政府提出嘅种种建议,有商有量倾下点解决问题呢?闹人、屈人系痛快,但永远都解决唔到问题罗!
原图:takungpao