政情：首间酒店变身青年宿舍 杨政龙：已接300份申请

楼价高企，年轻人想置业安居都难，同屋企人住又冇私人空间，搞到好压抑。政府搞嘅青年宿舍计划，近年扩展至酒店，香港青年联会就搞咗首间由酒店变身嘅青年宿舍，已经有年轻人入住嘞！

住客需做社会服务

青联主席杨政龙话已收到约300份申请，亦会一路接受申请，一路有人入住，现时有10人已签约，当中4人已入住。佢话入住宿舍嘅青年要做社会服务，若然有青年系健身教练喺宿舍教人健身，都可以计分。分数计算都有弹性，青年可以任意选择做服务嘅时间，只要一年入面储够200分就得，若得分超过200就有租金等优惠畀佢。

咁点解青年宿舍叫BeLIVING Youth Hub？佢话有一日望住棵树就谂到不如叫Beliving，系生活同居住嘅意思，加埋Youth就寓意系相信青年、相信未来。

同场嘅民政及青年事务局局长麦美娟话，政府决心协助青年解决「4业」问题，预期第二季会有多几个青年宿舍接受申请，位处市区同新界都有，详情会适时公布。被问及地方行政检讨进度点？佢都系重复答适时公布。