大食唔穷倒算穷

　　公司同事问我申请一笔5万元旅游费，目的地是深圳，全公司同事以及家人可以在深圳享受一个晚上，大多数同事知道我并不主张无缘无故返深圳消费，认为太浪费时间，所以认为我一定会拒绝，但想唔我立刻大笔一挥，批准那笔旅游费，令到不少同事大跌眼镜，我话如果大家申请去深圳食一餐晚饭，我一定唔会批准，理由是太过倒算，我记得阿嫲经常话大食唔穷倒算穷，使钱唔紧要，但千祈唔好倒算。

　　我细个时，我阿嫲见我宵夜食云吞面，立刻将个妹仔闹了一餐，阿嫲并不是闹妹仔帮我买云吞面，而是点解碗面咁淋，失了云吞面爽脆特色，妹仔好似被人寃枉咁回答，她说见到隔离街的云吞面不但平一毫子，而且仲超过一両面，不是平时的九钱重，所以宁愿行多十分钟去隔离街买，阿嫲话今次真系大食唔穷倒算穷，冇错碗云吞面的确是大咗又平咗，不过面身淋咗，根本唔好食，叫妹仔立刻去买过另外一碗。

　　我阿嫲唔识字，但识做生意，而且好大开埋，不少人话佢很蚀底，但阿嫲从不为意，佢有一句口头禅，就是大食唔穷倒算穷，唔会打算一世穷，我亦学到皮毛，使钱冇问题，使多啲都冇问题．不过就要使得其所，唔好倒算。

　　近日有不少香港人去深圳食晚饭，理由很简单，就是平靓正兼服务质素很好，我绝对同意，但我唔支持，理由是很倒算，去深圳食晚饭除了多花交通费之外，最紧要是时间，就算可以6点钟放工立刻去深圳，去到酒楼最低限度是7点半，食完晚饭就要9点，即使直接回家都要成11点，是否倒算就真的见仁见智，有人话去深圳不单止食餐饭，大多数会去KTV或者按摸，比香港平很多，我绝对同意，但在香港去完娱乐场所，跳上的士半个小时就可以回家瞓觉，但在深圳，长途跋涉回到家，可能东方已既白，在回家路上，很多人会好后悔，以后都唔会北上消费，不过，生仔姑娘醉酒佬，唔使几耐又会再去深圳玩过。

　　有人问我有关大量香港人北上消费的意见，我话施比受更为有福，友人唔同意，佢认为香港人根本好穷，有136万人在贫穷线之下，所以才拣消费低的地方，我话今次真系寃哉枉也，香港失业率只得2.8%，又点会有咁多穷人。

　　由於有不了香港人经常对外媒话很穷，有136万人处於贫穷线之下，但没有讲失业率只有2.8 ％，差不多已经全民就业，并且要大量引入外劳与专才，点会有咁多人在贫穷线之下，这完全是自我菲薄心态，令到深圳人睇唔起香港人，认为香港人很穷，在自己的地方消费唔起，又要有心目中服务质素，所以才北上消费，其实香港人去深圳或者北上消费是没有问题，亦符合大湾区一小时生活圈，但不能以香港的消费太高，服务质素又唔好为理由，咁样讲是很倒算，应该话香港生活很容易，工作时间又不长，可以随时北上消费，你估如果有香港人咁样讲，内地人怎样睇那些人，我认为会多一些尊重，少一些鄙视。