不做中，不做保，不要介绍装修佬

　　我老婆有大妈朋友来我们屋企食晚饭之后，见到装修唔错，叫我老婆介绍替我们屋企装修的公司畀佢，我老婆不知几开心，於是问我装修公司名字，我话不做中，不做保，不要介绍装修佬，我老婆话应该是不做媒人三代好，介绍装修公司又唔系做媒人，点解不要介绍装修佬。

　　做媒人唔系一定是男女婚姻的事，介绍人买嘢，例如买虚币，赚钱冇人会多谢，蚀钱一定会畀人闹，如果有介绍费，更加可能会惹上官非，介绍装修佬畀人，轻则老友都冇得做，重则被人告，做介绍人做到俾人告，十分不值。

　　我又唔系未试过介绍装修佬俾人，很久之前，我介绍一个装修佬畀朋友做装修，不久之后，收到装修佬一个非常名贵礼物篮，打电话畀装修佬，佢话我应得，我唔敢收，将礼物篮转送畀那个朋友，并且同佢讲，请佢跟紧装修工程，有甚么事我不会负责任，如果他唔满意，可以唔用那个装修佬，我负责所有损失，朋友话冇问题，我於是放心。

　　结果是装修工程烂尾，老友梗系话装修佬做得唔好，接驳唔得，收口又差，唔打算畀尾期装修费，装修佬则话老友 奄尖声闷，经常改意见，令佢做多不少功夫，而且又唔肯加钱，如果唔畀尾期，装修佬会告老友，我知道之后都话自己好彩，如果我收了那个礼物篮，今日就畀双方埋怨，好似那些JPEX玩家，如果收了介绍费，今日就震过猫王。

　　我有多少不明白，老友脾气很好，要求不高，点解装修佬话佢 奄尖，后来我知道，老友不时带朋友去睇装修，老友冇意见，但是他的朋友有意见，本来已经做妥，又要拆过重做，现在老友对那些朋友亦有意见，老实说，别人装修，如吹绉一池春水，关你鸟事，讲多句都有机会得罪人。