骗子专向输家埋手

　　我家姐同我讲，有人用我名义在Facebook 或者IG卖广告叫人跟我投资就算，但现在连佢都有，我家姐话自己根本唔出名，点解骗子会用佢个名叫人投资，如果有人输钱，会不会赖佢。

　　我话不用担心，现在大家都知道那些利用知名人士叫人投资的是广告，甚至是有欺骗成份广告，如果信那些广告就贵客自理，不过为了安全起见，最好去警署备案，而且仲唔好出post叫人投资，讲吓分析当然可以。

　　我家姐话仲唔止，那些广告话佢自少家贫，投资又失利，不过，靠几只股票打了一个翻身战，赢了过千万，讲到佢咁惨，其实，佢两、三日就可以收到过千万租，真系未见过大蛇屙尿。

　　我家姐可能唔明白，骗子很少向赢家埋手，大多数是向输家埋手，话打了一个翻身战，即是曾经输到贴地，与输家产生共鸣，便会跟著他们投资，所以，如果唔想有人影响你的投资决定，最紧要唔好话输，几时都话赢，既然赢紧钱，就不用改变投资方法，所以，不少人叫我投资基金，买债券，我话投资地产已经赢到条裤著唔落，唔想改变我的投资方法，原来我咁样讲，最后竟然避过一劫，否则我一定买债券，坐响度已经有8-10%回报，点解要买楼收租，仲要被政府打压，好人当贼扮。

　　骗子除了向输家埋手之外，仲会向那些急功近利者埋手，有不少人手上资金不多，希望可以在短时间内搵大钱，唯有向那些冷门投资产品埋手，赢了又多了一个神，正式名利双收，输了当然唔会讲俾人。不过，有些人真系蠢到加零一，明知那些冷门投资输多过赢，仲会同投资公司做广告，有乜依郁，投资公司甩身，那些替人做广告的人就上身，骗子亦很喜欢向那些好出风头者埋手。