不知自己是霸王的霸王

　　唔记得几多年前，有新结婚老友话要到我家住一晚，原因是早一晚饮醉，被他的老婆赶了出来。我话香港地，留食不留宿，暂住一晚就恕难从命，不过，我有办法叫佢老婆铺红地毯迎接他回家。老友话如果做到，请我食珍藏四头鲍。

　　我同老友老婆讲，今次佢放生老友，以后后患无穷。老实说，咁辛苦结婚为了甚么，就是可以名正言顺要求老公返屋企瞓觉，如果因为佢老公饮醉酒而唔准佢返屋企瞓，以后佢老公唔想返屋企瞓就会早一晚饮醉酒，最好做法是立刻要求佢老公返屋企，并且保证，以后饮醉酒不但不会赶佢出街，而是唔准佢出街，这样做包保佢老公以后唔敢饮醉酒。

　　较早前美国白宫发言人黑人小姐在发言时表示，如果有国家唔用美元交易，将会受到制裁，佢唔讲还好，讲完之后各国立刻加速本币化，因为全世界国家都知道，可以随时被美国制裁，如果唔铺定一条后路，容乜易亡国。

　　美国同我老友老婆一样，唔知道自己是霸王，老友老婆最高的权力就是要老友每晚都要返屋企瞓，而不是唔准佢返屋企瞓。美国的霸权就是要求全世界用美元，而事实上美国已经做到，但唔知边个红须军师要求制裁俄罗斯，唔准俄罗斯用美元，俄罗斯当然是很惨，卢布一日下跌30%，效果似乎是很成功，但其他国家见状，就契弟走得摩，令到美国即使暴力加息，亦不能令美汇上升，其实，即使俄罗斯入侵乌克兰，美国仍然强硬规定俄罗斯用美元，美国就真正是霸王，暴力加息的效果亦会很显著，美汇现在应该是130而非101，美国可以大摇大摆割韭菜。美国真系一个唔知道自己是霸王的霸王。