时运高，博番铺！鸿运当头，把握时机，无可厚非；之但系，当今时势，完全不确定，一个疫情又杀出个变种病毒，玩残专家玩残全世界！此时此刻，若然好高骛远，唔肯务实，仲要拚死透支未来，分分钟变负资产，冇得玩吖！
嗱！俗语话盲婆喂奶乱咁塞，分分钟呛到个BB回唔到气，咁就大柠乐！依家乱世桃花逐水流，脚踏实地就少啲愁。之不过，呢个吹水政府就唔系咁谂噃！喺一片社会反对声音下，仍然要盲掷逾6,000亿港元硬推一个云深不知处嘅「明日大屿」！追求与舍弃，人各有不同。「是非有处，得其处则无非，失其处则无是」。意思系是非标准都有一定嘅条件，得到合适嘅环境就冇错，失去呢就分分钟错到一裙一裤都系！
各位，「明日大屿」嘅相关环评工程项目正进行公众谘询，听日先至结束，而15个环保及关注团体见政府一意孤行硬推「明日大屿」，乃联合请愿批评政府回避公开完整嘅策略性环评，甚至偷步提交简介硬闯环评程序，同时未有将填海气候影响纳入考虑，漠视《香港气候行动蓝图》嘅碳中和目标，令「工程凌驾环境」。
阿哥！高山给我们情怀，蓝天给我们梦想，大海给我们遐思！政府使唔使急成咁，火烧城隍庙就话急死鬼啫！依家政府喺可行性研究报告尚未出炉前，就已急不及待开展顾问工作简介，喂，美孚九华径无牌烧烤场都可以忍受畀佢非法经营18年喇，点解环评报告未出又偷步急到交叉脚呢？疫情下，大家仲有个大海遐思吓，不亦乐乎！
环保团体指出，政府有必要喺开展法定环评前，先进行全面策略性环评，研究所有可行嘅替代选项，譬如话系唔系只有填海嘅选择等，以及检视各项与邻近工程嘅环境承载力，包括三跑、东涌新市镇拓展、石鼓洲焚化炉等大型填海工程，否则难以估计对周边环境累积影响。环团又指政府将简介分拆三份，非整体衡量会出现偏差，盲推填海毁生态，政府忽然「有作为」，霸王硬上弓，其实系鬼鬼祟祟偷番薯，个样好难睇！
要解决香港土地及房屋问题，功夫茶大早已指出应聚焦发展新界北，发展落马洲河套地区，善用其区位优势，以点带面促进港深边境地区；事实系新界北有现成土地，收地即可发展；有别於「明日大屿」，填海造岛等到地老天荒，倒钱落海又如无底深潭！孟子话斋：盈科而后进，放乎四海！冇错，水要先填满小河小沟，然后可从容奔向大海！发展新界北可坐言起行，只争朝夕，话咁快就可起十几廿个太古城、丽港城、YOHO TOWN 呢类屋苑啦！政府舍正道而弗由，哀哉！
App下载
