城市发展，人才同土地都系不可忽视嘅因素。工程界议员卢伟国日前出席一个网台节目，指毗邻香港嘅深圳巿之所以发展神速，除昔日受惠於港人嘅资金同技术，汇聚大量人才亦系原因之一。尽管香港亦都积极「抢人才」，但若然未能够提供理想嘅居住环境，赴港发展嘅意欲就难免打折扣。所以话开发土地、兴建房屋，不止系纾缓港人嘅居住问题，仲系关乎吸纳人才咁话。
卢伟国指政府统计处嘅最新数字，香港人口跌至729万，较一年前同期相比少咗12万有多；原因系近年移民流失人口多过移入香港，加上出生率低过死亡率，客观而言劳动力系一路下降中。同时间，香港劳动力嘅流动性相当低，好多行业深受人手不足嘅困扰，莫讲话建造业缺少生力军，就连医护界、金融界都嗌救命。因应目前种种嘅现象，政府须制订整体同完善嘅人口同人才政策，另一方面，亦要进一步完善本地嘅培训同晋升阶梯，以及向境外招揽人才。
讲起吸纳境外人才，卢伟国坦言话有啲担心，毕竟人才来港当然系希望事业上有一番发展，但随行家人嘅起居需要，亦往往系决定是否来港嘅重要考量。香港人普遍都住得又逼又细又贵，对於好多境外人才嘅老家而言，无疑系降咗级。虽则话大都会嘅生活就系咁，但如果居住问题未能加大力度去改善，难免影响到人才来港发展嘅吸引力。
倡移山填海拓地建屋
卢伟国强调，有面粉先至做到面包，要纾缓房屋问题就必先开发土地。虽然话搵土地系要多管齐下，但佢认为最有效嘅方法，不外乎沿用咗百几年嘅移山填海。尤其系依家绿色嘅地方所占嘅比例较高，系咪可以拨出些少地方？卢伟国指昔日嘅沙田同马鞍山都系一片绿油油，后来都系靠开山劈石同填海，依家先至可以居住接近全港十分之一嘅人口。佢话其实香港有好多地方，都系咁样开发出嚟㗎。
至於「北部都会区」嘅发展策略，卢伟国形容系「正途」，不过改变土地用途方面政府宜三思，譬如棕地上面嘅作业取缔与否，可能会牵涉到某啲行业嘅「中流作业」。佢话建造业若欠缺土地摆放材料或大型器具等，恐怕难以运作。目前香港嘅货运虽然唔及得深圳盐田咁大规模，但仍然系本地举足轻重嘅行业，实在需要地方摆放或处理货柜。
卢又提到环评同城规条例，指环评条例喺98年推出以来，项目往往因环评嘅研究同评估而拖慢，至於城规方面，若果某规划方案提出而有人反对嘅话，就要搞听证会等一大轮，做完微调之后又再进行谘询，结果一个简单嘅发展项目要拖好多年。佢认为环评同城规方面，政府需「的起心肝」睇吓点样去压缩流程。
App下载
