倒錢落海硬上弓 何不搞好新界北

新聞資訊 > 地產新聞 返回
瀏覽人次 : 1331
地產新聞
倒錢落海硬上弓 何不搞好新界北
(東方) 2021年11月24日
時運高,博番鋪!鴻運當頭,把握時機,無可厚非;之但係,當今時勢,完全不確定,一個疫情又殺出個變種病毒,玩殘專家玩殘全世界!此時此刻,若然好高騖遠,唔肯務實,仲要拚死透支未來,分分鐘變負資產,冇得玩吖!

嗱!俗語話盲婆餵奶亂咁塞,分分鐘嗆到個BB回唔到氣,咁就大檸樂!依家亂世桃花逐水流,腳踏實地就少啲愁。之不過,呢個吹水政府就唔係咁諗噃!喺一片社會反對聲音下,仍然要盲擲逾6,000億港元硬推一個雲深不知處嘅「明日大嶼」!追求與捨棄,人各有不同。「是非有處,得其處則無非,失其處則無是」。意思係是非標準都有一定嘅條件,得到合適嘅環境就冇錯,失去呢就分分鐘錯到一裙一褲都係!

各位,「明日大嶼」嘅相關環評工程項目正進行公眾諮詢,聽日先至結束,而15個環保及關注團體見政府一意孤行硬推「明日大嶼」,乃聯合請願批評政府迴避公開完整嘅策略性環評,甚至偷步提交簡介硬闖環評程序,同時未有將填海氣候影響納入考慮,漠視《香港氣候行動藍圖》嘅碳中和目標,令「工程凌駕環境」。

阿哥!高山給我們情懷,藍天給我們夢想,大海給我們遐思!政府使唔使急成咁,火燒城隍廟就話急死鬼啫!依家政府喺可行性研究報告尚未出爐前,就已急不及待開展顧問工作簡介,喂,美孚九華徑無牌燒烤場都可以忍受畀佢非法經營18年喇,點解環評報告未出又偷步急到交叉腳呢?疫情下,大家仲有個大海遐思吓,不亦樂乎!

環保團體指出,政府有必要喺開展法定環評前,先進行全面策略性環評,研究所有可行嘅替代選項,譬如話係唔係只有填海嘅選擇等,以及檢視各項與鄰近工程嘅環境承載力,包括三跑、東涌新市鎮拓展、石鼓洲焚化爐等大型填海工程,否則難以估計對周邊環境累積影響。環團又指政府將簡介分拆三份,非整體衡量會出現偏差,盲推填海毀生態,政府忽然「有作為」,霸王硬上弓,其實係鬼鬼祟祟偷番薯,個樣好難睇!

要解決香港土地及房屋問題,功夫茶大早已指出應聚焦發展新界北,發展落馬洲河套地區,善用其區位優勢,以點帶面促進港深邊境地區;事實係新界北有現成土地,收地即可發展;有別於「明日大嶼」,填海造島等到地老天荒,倒錢落海又如無底深潭!孟子話齋:盈科而後進,放乎四海!冇錯,水要先填滿小河小溝,然後可從容奔向大海!發展新界北可坐言起行,只爭朝夕,話咁快就可起十幾廿個太古城、麗港城、YOHO TOWN 呢類屋苑啦!政府捨正道而弗由,哀哉!