政府高調催谷佢哋嘅「起動九龍東」發展概念，有代理話，近一個月該區嘅二手樓問盤量已經即時顯著上升20%，預期遲吓成個東九龍大興土木，逐步打造成全新嘅商業核心區，東九龍一帶住宅樓市勢成市場矚目新「星」，借鏡西九龍發展經驗，相信區內住宅樓價有望升到呎價過萬元水平。
美聯物業九龍區董事何銘培同劉sir講，根據土地註冊處數據，今年頭十個月東九龍區二手住宅買賣註冊約9,100宗登記，同舊年全年創紀錄嘅超過1.5萬宗比較，交投量跟整體氣氛影響縮減咗四成一。
九龍站樓價跑贏大市
不過，東九龍區住宅佔全港二手樓交投比例，由舊年12.6%升到今年頭十個月約13.3%新高水平，升幅0.7個百分點，比起樓市最旺嘅九七年，更加高咗3.8個百分點，睇嚟東九龍樓市愈來愈舉足輕重。
事實上，自從政府十月下旬起催谷「起動九龍東」發展概念，呢區樓市亦都即時起動，問盤量升咗20%，而觸覺最敏銳嘅投資者當然係查詢最多、最積極。
劉Sir回顧過去十年，傳統核心商業樓面除咗中環，就集中响尖沙咀同西九龍一帶。而受惠九龍站ICC落成，呢區住宅樓價由○五年初每呎5,700幾元，升到今年九月嘅13,500元，升幅逾1.3倍，比起同期九龍區樓價只係升87%，明顯跑贏大市。
發展概念締「雙東」效應
佢公司嘅港島區董事楊永健就話，受惠九龍東新商業區發展，一海之隔嘅港島東亦可望受惠，締造九龍東與港島東嘅「雙東」效應，港島東住宅由依家平均呎價超過8,500元，有望升至每呎萬元水平。
借鏡西九龍發展，何銘培仲話，九龍東最大潛在商廈樓面估計有5,800萬方呎，比起預計一四年完成嘅上海浦東新區甲級商廈樓面約3,300萬方呎仲要多，有機會問鼎全中國商廈樓面最大。
然後再配合啟德發展計劃有約莫兩萬個私人住宅單位供應，九龍東可以講係前景無限。
劉Sir
App下載
