果然羅文唱“知否世事常變?變幻才是永恒”的確係金句。

上回寫咗一大串前言，睇怕都可以入正題啦，不過見有網友話「贈慶、贈言 = 攞景、寸爆」，咁我就姑且澄清一下，順便吹多少少「悶蛋」嘢。我唔喺講笑，今日呢篇，將會悶到抽筋，因為對於完全明白我上文嘅人，解話，其實喺冇必要。 

坦白講，要攞景、寸爆嘅，《股樓篇》就應該响匯豐 60.35 果排出街，而唔喺响依家恆指上返三萬點至嚟發表啦！都喺果句，淡市寫衰嘢，即喺贈慶；好市寫衰嘢呢，就喺贈言。話說《股樓篇》出文後，隔日湯生就寫咗篇《真心真話但沒有說出真相》，內容隱含委屈，彷彿喺申訴緊，點解人家只著眼於佢預測嘅對錯，但就睇唔見佢提過果啲樓市背後嘅「真相」喎！ 

唔睬人嘅世外高人

其實佢講果啲「真相」，我當然睇得到，唔喺又點會以「不忘初心」作為果節嘅標題呢？引刀兄提到「唔睬人嘅世外高人」，唔知喺唔喺指我？但如果喺嘅話（跟手引刀兄已經否認咗，但既然已經出文，內容唔改啦），我就只能慨嘆，過咗咁多年，閣下對我都仲喺一啲都唔了解。認識我嘅人都知道，我一開筆就收唔到手，頻密嘅筆戰，會對我造成好大負擔。尤其當「昔日良朋」走得八八九九，我就難免成為爭拗嘅焦點，呢個先至喺我當年，告別回應箱嘅主因。況且我嘅身心狀態，亦已經大不如前，所以希望引刀兄明白，我唔喺「唔睬人」，只不過唔會隨便對任何議題，都貿然開筆回應啫，特別喺有沒完沒了爭拗風險果啲。 

仲有，唔好話我同邊個「助陣」，磚家响我眼中，都喺冇分別，湯生如是，汪生亦如是。我既唔喺湯生讀者，又唔喺汪生粉絲，撐邊個，踩邊個，對我有乜好處？我寫嘢，從來對事唔對人，LIKE 就 LIKE，唔 LIKE 就唔 LIKE，話知你喺乜水。不過如果你講十樣嘢，八樣我都唔 LIKE 嘅話，你自然會誤以為我成日針對住你，咁呢個就真喺冇辦法。睇返《股樓篇》裡面提到，我喺非常反對啲評論，聚焦哂响個樓價度，但家陣喺邊個語出驚人咁話，未來 18 個月樓市升 30%？如果夾硬話，我喺寸緊某位磚家嘅，咁又應該會喺邊個？ 

所以話呢，唔好以為我只喺撐啲好友，實情我對好友嘅批評，唔會少得過淡友，只不過有部份好友喺我認識嘅朋友，所以寫得冇咁白啫。我嘅文章，好多時都喺多刃刀，要從多角度至睇得明，單從撐邊個、踩邊個去解讀嘅話，就一定觸礁。就好似《成魔之路》篇，好多人以為只喺針對淡友寫，其實我喺借淡友為例，告誡某啲好友，但好可惜，最终都喺有人成咗魔。引刀兄，我對果位魔友，批評之狠，絕對不下於當年寸自醉扮專業果篇架！ 

電筒定喺明燈

《股樓篇》針對嘅，唔喺啲磚家、評論員本身，而喺佢地嘅讀者。湯生話，錯還錯，又有唔少 FANS 喎！不過我想問，當年嘅《細價樓將會在三個月內爆煲》，究竟你啲 FANS，只喺著眼於「爆煲」呢兩個字，定喺會咁神心，走去深思文中剖析財仔問題嘅「真相」呢？所以當時我回應話，玩曲線，同玩火冇分別。結果，湯生响一夜之間爆紅；正所謂，成功非僥倖，有得必有失，既然湯生選擇咗語出驚人，又何必去計較人地，睇唔睇得見你講升跌以外嘅果啲「真相」呢？磚家，就喺磚家；財演，就喺財演，有乜嘢咁委屈？「不忘初心」咪得囉！ 

磚家也好，財演也好，個個有名有利，使鬼我地呢啲小角色去「助陣」咩。我關心嘅，喺佢地嘅讀者、粉絲，因為羊群，往往喺盲目嘅。所以點解我話，對任何評論員嘅文章，都要當「散文」咁去睇，千祈唔好當佢地明燈。如果你响一條黑漆漆嘅小路上面行緊，你會信你手上揸住果支電筒，定喺信老遠一個，三唔識七嘅唔知乜「磚家」，拎住嘅果盞「明燈」？人地根本就唔知道你想去邊，甚至連你喺乜水都唔知，講得衰啲，根本就唔知道有你呢個人存在，咁叫人地點樣照你？你將散文當明燈嘅，就真喺十條命都唔夠死！ 

簡單嘅因果關係

講到羊群，記得上文提過，有報導話，港樓貴絕全球，跟著全港各區，都充滿著慘叫聲。我以為呢啲慘叫聲，主要喺嚟自盲目嘅羊群啦，點知原來類似嘅慘叫聲，响湯生果篇《真心真話但沒有說出真相》裡面都揾到。湯生話，高樓價令到生活艱苦嘅人比新加坡多出以倍數計，呢個先至喺香港市民嘅可悲。佢仲話有人沾沾自喜，以為高樓價反映香港價值，簡直喺掩蓋咗真相，高樓價只會令香港漸失競爭力喎！ 

恕我直言，家陣冇人話要乜嘢沾沾自喜，不過香港嘅高樓價，的確喺反映咗香港嘅價值，唔單止喺咁，佢仲反映埋香港嘅競爭力添，呢個唔喺掩蓋真相，而喺「確確實實嘅真相」！點解？好簡單，因果關係囉！正正就喺香港，有咁嘅價值同競爭力，先至搞到咁多人，就算喺生活艱苦啲，都要湧過嚟呢度落地生根，從而推高哂啲樓價。如果香港冇咁嘅價值，冇咁嘅競爭力，根本就冇人有興趣住响呢度，咁我想問，就算啲地產商，出盡混身解數，包括你所講果啲，持貨不賣、高成數按揭、高回贈，之類之類嘅所謂「真相」，推得高個樓價咩？ 

真正嘅競爭力

提到競爭力，大家有冇留意，講到樓價，香港喺會同啲「城市」比。呢個好正常，因為香港喺一個城市，而每個國家裡面，個個城市都唔同，當然喺以城市嚟做單位去比較。但講到競爭力呢，唔知點解，香港就要同啲「國家」比喎！可能有人會話，香港喺一個獨立經濟體，但話雖如此，我地實情都只喺國家裡面嘅一個城市，極其量只能擔當著一個角色，點同一個獨立嘅國家，無論响資源上、經濟民生、甚至喺主權、外交、軍事上，都一定要具有，全面嘅競爭力？莫講話香港曾經試過，榮登榜首，但响呢啲國家級嘅排位之下，就算只喺榜上有名，個競爭力都已經爆哂燈啦！ 

記得我曾經多次強調，競爭力，喺來自競爭，而競爭，從來都喺艱苦。响香港，生活艱苦嘅人，比新加坡多出以倍數計，即喺話，香港嘅競爭力，同樣比新加坡，多出以倍數計囉！但如果香港嘅年輕人，大部份都學湯生話齋，生活艱苦，就等於「可悲」嘅，又或者學曹伯話齋，要有個「車房」至可以創新嘅話，咁香港，就真喺漸失競爭力啦！我又想問一問大家，住劏房，慘唔慘？其實有啲人住劏房，都喺自己嘅選擇，就好似一啲年輕人，為咗所謂「私人空間」，唔肯同父母住，就走咗出去租劏房，咁你地話，佢地算唔算慘？又好似每日 150 個家庭圑聚，有部份可能要住劏房、排公屋。圑聚，點解一定要揀香港？點解唔揀大灣其他地方？今時今日，揸住張香港身份證，都唔一定要住香港啦！呢啲咪又喺，佢地自己嘅選擇，就算喺艱苦嘅生活，都要追求响呢度生活，咁你地話，又算唔算慘？ 

朱晨麗
 
最近唔覺意睇到，朱晨麗嘅專訪，話說人地住足幾年劏房，都喺自己揀，亦冇話覺得悽涼。相比世界上好多其他地方，香港人，其實已經好幸福，亦有好多選擇。真正慘嘅，喺响先天方面冇得揀，就好似啲傷殘人士，或者年老無依果啲，而唔喺阿爺唔肯送隻乜普選毛公仔，就大吵大鬧，瞓哂街嘅果班費青！有手有腳，尤其喺年輕人，响香港大把機會，問題喺，你心頭有幾高，想追求啲乜嘢生活。唔喺個個都含住金鎖匙出世，要活得更好，就唔可以介意，先過下啲艱苦嘅生活，咁先至算喺真正嘅競爭力嘛！ 

離題嘅交待

寫到呢度，又要同引刀兄交待一下，費事佢又以為我唔知針對邊個。記得告別篇裡面，我呢頭讚汪生貼地，轉個頭，就批評佢「增加香港競爭力一定要有平地」呢個睇法。嗱嗱嗱，都話我從來對事唔對人，就競爭力呢味嘢，冇話因為由邊個磚家，或者邊位網友提出，就抱唔同立場啦！ 

今次返嚟，我都不忘 SEARCH 下呢個網站，CHECK 一 CHECK「珍港」、「珍兄」、「珍惜香港」、「珍惜兄」呢啲 KEYWORDS。原來响我唔在場果排，無啦啦會提起我嘅，就只有引刀兄，同埋自醉兄兩位。雖然都喺講埋哂啲衰嘢，但佢地咁掛住我，都已經算喺好有心。最近我又見引刀兄，同自醉兄兩位，似乎各自揾到自己嘅定位，真喺可喜可賀！ 

至於「珍哥」，除咗呢個回應箱嘅 53/F、72/F、82/F 之外，成個地產網，從來都冇人對我用過呢個稱呼。但其實現實生活中，的確有認識我嘅人，稱呼我做「珍哥」喎！我唔排除有人想同我開下玩笑，所謂，哥前哥後三分險，有啲嘢，真喺唔到你唔信。 

哈哈！越寫越離題，下篇一定要入正題啦！

（待續 ...）

轉個頭，又過咗足足一個月。 

有朋友唔太明白，我已經寫咗一大串前言，點解唔直接入正題，反而仲要花咁多時間，去加多篇悶到抽筋嘅解話。其實我今次返嚟，雖然只喺响個小小嘅回應箱度寫下嘢，但呢個網站，始終喺網主同湯生嘅主場，返到嚟都唔打聲招呼嘅，就實在太冇禮貌。 

不過，兩大篇招呼，我諗已經俾足哂面，再唔入正題呢，就恐怕太對唔住果寥寥幾位啦！ 

五個半股神

記得我寫《股樓篇》果排，恆指正喺响三萬點上下徘徊，唔上唔落。我叫大家唔好開心得太早，仲舉咗李澤鉅講嘅，話外圍風大浪大，藉此提點一下啲磚家，從來股市都喺首當其衝，而樓市只喺守尾門。點知唔夠一個月啫，特佬就出招，响全球都預期中美會達成協議嘅臨門一腳之際，淋下一大盆冰水，港股即日大跌 871 點，一星期累跌千五點，而全球嘅股市呢，就唔見咗近兩萬億美元，到咗啱啱個禮拜尾，恆指終於跌穿兩萬八啦！ 

哈哈！我喺咪好「準」呢？原來做股神，一啲都唔難。我話「淡市寫衰嘢，即喺贈慶；好市寫衰嘢呢，就喺贈言」，咁嘅態度，梗喺揾唔到食。不過只要改成「淡市唱好，好市唱淡」，就即刻唔同哂啦！因為股市呢家嘢，升完總會跌，跌完亦總會升，所以「準」只喺時間問題，再加返少少 MARKETING 技倆，要充當一下股神，應該冇難度，反正有啲財演、磚演，都喺用緊呢一招，亦行之有效。當然，如果要做到數字上嘅「準」，就真喺唔容易，且要碰一碰運氣；但唔緊要，只要你中一次，就可以大做文章，即刻成為股神，皆因人，喺善忘嘅！記得當年我個聯「匯」機制，將匯豐嘅低位 SET 响 50，結果跑出咗 44.5，睇嚟，我距離股神之名，都仲差五個半！ 

講開股市，我話股票呢家嘢，我從來唔 BUY，而响呢個網站，我亦曾多次提過，自己從來唔玩股票。不過我想澄清一下，唔 BUY，同唔買，雖然字面解釋一樣，但實際上喺兩回事。當日我寫過聯「匯」機制之後，就俾一個朋友寸，話我公開講 50 蚊喺底，搞到佢入咗貨喎！真喺唔知佢講真定喺講假，總之我為咗舒一舒佢道氣，就買咗一手咁多匯豐。不過，呢件都只喺小事，後嚟我亦有買過股票，當然唔只喺一手呢啲 SIZE，唔好問我贏咗定喺輸咗，因為呢個喺商業決定。我嘅投資，喺一盤生意，做生意講嘅，喺賺錢，唔喺贏錢。 

2018 投資成績表

其實我呢盤生意，自三個十倍之後多年，經歷一系列進化，當中亦涉及唔少關鍵嘅商業決定，先至發展到今時今日嘅規模。我無意响呢度晒嘢，所以有關數字上嘅，我唔透露啦！總之我嘅資產，仍然喺以債券及有關債券類別嘅高息金融項目為主。話說 2018 年，响中美貿易戰打得火紅火綠嘅環境之下，香港除咗磚頭以外，任何資產持貨，都喺必然蝕價，無一倖免。但如果你問我 2018 年個業績，我可以答你，喺賺錢。咁賺幾多？兩個字「可觀」！有幾可觀？哈哈！唔好意思，我唔喺果種為咗要威威，就隨便洩露自己私隱嘅唔知乜演。不過我可以俾啲 FIGURES 大家參考一下，話說金管局操嘅外匯基金，去年（即喺 2018 年）少賺 94%，當中只有債券賺錢，其他全蝕，而債券賺果 574 億呢，仲高過 2017 旺市果年，外匯基金債券部分嘅 343 億喎！咁我呢條債船，就算冇九分釘，最保守計都有五、六分嘛？ 

至於點解債券响淡市會賺到錢，如果你問啲傳統主流經濟學嘅信徒，佢地又梗會拋埋啲 RULES OF THUMB 出嚟，話乜嘢「避險」啦！不過作為一個前線債券投資者，我可以好肯定咁答你，完全唔喺果回事。呢啲所謂「避險」資金流，主要出入於投資級別嘅低息債。2018 年個市場咁波動，呢啲資金流向，喺好難觸摸，睇得咁準嘅，就倒不如走去炒股，都好過同呢啲資金流玩捉迷藏。尤其我呢種長期 KEEP 住高槓桿嘅長線投資者，玩埋哂啲蝕息之餘，仲咁高風險嘅投機操作，簡直同自殺冇分別。 

2018 債市回顧

記得我曾經話過，我呢盤生意，之所以賺到錢，喺基於對自己市場角色嘅充分了解同體現。縱使經歷咗一系列進化，低息港幣融資，投放高增長市場，仍然喺我今日投資嘅基礎，而我嘅持貨，都仲喺以高息內企債及相關嘅金融項目為主。其實 2018 年，內企債市，尤其喺內房，經歷咗一段都幾艱難嘅時期；年頭就已經有消息話，內房年內將步入還債高峰期，而內地嘅金融去槓桿政策，又導致多間內房响內地嘅發債，遭到中止。新債發唔成，舊債又到期，自然就引發債務違約嘅危機，再加上中美貿易戰，打得火熱，真喺可謂四面楚歌。 

當時我地的確就自己投資嘅調整策略，作過審慎嘅評估，因為內企以新債蓋舊債，似乎有違我地借錢俾人發展，而唔喺攞嚟燒呢個大原則。我地必須搞清楚，自己嘅市場角色，有冇變得模糊，否則勢必面臨無法承受嘅風險。不過，我地最後都一致認為，呢個喺機會，因為內地違約潮涉及嘅，都喺一眾無法境外融資，或實力較弱嘅地方企業，但就拖累到其他有境外融資能力嘅龍頭內房債價，大幅下跌。呢個明顯喺市場錯判，而呢個錯判，就令到新發嘅美元債，趨向高票息、短年期。就睇恆大，舊年年底發 18 億美元債，平均票息 12.6 厘，但自己就食返 10 億，即喺實質成本，可以低至 5.74 厘，呢招低成本頂爛市，啲行家真喺多得佢唔少。 

一個誠字

講開又講，上年六月中，就有個冇乜聯絡嘅點頭之友，突然 WHATSAPP 我，一開波就問功課，仲話七、八月會請我食飯添。其實我呢份人，一向好 NICE，你唔使話乜請食飯，我都會樂意回答你，不過你既然要咁講，我當然唔介意開著個 COUNTDOWN，睇清楚你嘅為人。佢問有乜嘢高息債可以介紹，我就提到一啲龍頭內房債，價格回落到吸引水平，不過我亦提醒佢，槓桿要留 MARGIN，皆因銀行有機會收槓桿，而中美貿易戰亦會令到價格波動，要熬得住短期可能發生嘅問題至得。跟著六月底，佢又 WHATSAPP 我，話入咗我有提過嘅龍頭內房債，就「馬上跌兩三蚊慶祝」，仲問我，最近有乜嘢因素主宰債價。坦白講，我真喺有啲唔高興，我喺話可以撈抵，唔喺撈「底」！不過我仍然好有禮貌咁，再一次重申，LV 要保守，因為呢期債價唔會有運行，平貨可以入，但要守得住跌嘅風險。 

到咗七月底，我又收到佢 WHATSAPP，話佢有啲「friend」，買咗兩隻唔知乜地方債，跌咗兩成，問我可唔可以繼續持有喎！呢次我簡直喺把幾火，叫你買受內地違約潮影響到市場錯價嘅龍頭內房債，你啲「friend」（唔知喺咪你自己）竟然唔知做乜貪平撞入去個風眼度，搞埋啲開緊違約 PARTY 嘅地方債！仲好意思問我，可唔可以繼續持有？結果我隔咗成半日至覆佢，我話，早排要撈抵嘅，有好多選擇，唔使揀到呢類嘢啦！跟住佢就潛咗水，不過老老實實，就算佢再蒲頭，都唔使旨意我會再睬佢，反正佢有冇將啲錯價疑似垃圾，換咗做真垃圾，我又冇興趣知。總之舊年年底，啲龍頭內房債已經升返哂，守得住嘅，可謂賺息兼賺價。 

其實我對朋友，都算喺咁，要求亦唔算高，甚至可以話冇乜要求，而我惟一重視嘅，就喺一個「誠」字。不過唔好誤會，人皆有私隱，我唔喺要你誠實；我指嘅喺「誠意」，因為我都喺以誠待人。正如你有嘢想問，我只會視之為分享，唔好講乜請教，大家都喺對等，但如果你响我面前玩嘢，我喺會睇得出。例如我提債，你就話自己買咗好多債；我提槓桿，你就吹噓自己啲槓桿，都唔知攞得幾盡；未入正題，就讚自己好眼光，睇中咗隻唔知乜股。我唔介意你拋，但既然你吹到自己咁勁，咁我就真喺冇嘢可以幫到你。不過要強調嘅，喺如果你未試過，連續兩年或以上，同時持有過百張廿萬美元為單位嘅債券，就最好唔好响我面前，話自己買咗好多債；又如果你未試過，連續兩年或以上，維持著超過八成嘅 LV，亦最好唔好响我面前，吹噓自己槓桿攞得幾盡。 

肥叔變帥哥

唔好誤會，我冇話以上所講嘅，喺代表我有幾多持貨，或者幾高槓桿，呢啲嘢我唔會透露。我只喺想講，要我覺你勁呢，以上就喺最基本嘅水平。咦？咁 1.5 億買匯豐又點？上次我話，呢啲叫做 SCALE，真喺唔好意思，呢句只喺客套說話。吓？客套說話？哈哈！YES！都話頭兩篇，喺用嚟打聲招呼囉！莫講話 1.5 億買匯豐，唔算得喺乜嘢 SCALE，就算 15 億買匯豐，都唔算喺 SCALE，只能夠叫做 SIZE。SIZE 同 SCALE，聽落去，好似冇乜唔同，但响實質意義上，就喺天地之別！ 

SIZE，即喺得個大字。一個阿叔炒股、一個大叔炒股、一個大大叔炒股、同一個肥叔炒股，都喺炒股，有乜嘢分別？你買一隻股票，諗住財息兼收，點知到依家都仲未返家鄉，如果喺果種「命格」嘅，早就忍唔住「止蝕」沽咗佢。不過，話說果對年輕夫婦，喺要靠啲股息交租喎！即喺話，沽咗就一定要換貨，咁換啲乜嘢呢？吓？又喺股票？個貿易戰咁難估，臨門一腳都可以撻 Q，容乜易換下換下，個本金 SIZE，越換越細，賺唔夠租金，住嘅 SIZE，仲越租越細，到時搞到萬劫不復，就真喺大大鑊啦！其實，要破呢種「命格」，一啲都唔難，換返件磚頭咪得囉！我唔喺講笑，當年我都喺用「成仙」嚟形容果啲肯面對現實，懸崖勒馬，重新置業嘅人。「命格」一破，成個人即刻醒神哂，連說話、態度、立場，甚至喺樣貌，都可以逆轉，就好似 IQ 博士變身咁，肥叔，都可以變帥哥！ 

寫到呢度，我又要發一發聲明，因為話說湯生最近，以近億首置買豪宅。我唔想俾人誤會，以為我唔知影射邊個，所以要鄭重聲明，上兩段只喺為咗解釋乜嘢喺 SIZE，而作出嘅一啲比喻同假想，完全唔喺事實，亦完全冇影射成分。況且，以湯生嘅 SIZE，億億聲攞出嚟，根本就冇難度，使鬼蝕水沽貨咩！ 

SCALE（規模）

斷億咁買入、沽出大藍籌，FP 買豪宅，呢啲東東，都只能夠叫做 SIZE，得個大字，對市場基本上冇乜影響，做與唔做，都喺好個人化。不過你可能會問，1.5 億唔夠，咁 15 億呢？呢個 SIZE，仲大過匯豐一日嘅成交金額喎，莫講話影響市場，直頭可以操控股價啦！咁點解我上面仲話，15 億買匯豐，都唔算喺 SCALE？原因好簡單，你用一個巨 SIZE，去達至一個相同，甚至更細 SIZE 嘅影響，而所謂嘅影響，又只喺曇花一現，咁算乜嘢 SCALE？至於點先至算喺 SCALE，我可以舉一個例子，你攞十萬出嚟，去 RUN 一盤一百萬嘅實業生意，呢個就喺 SCALE。 

車！講到尾，咪即喺槓桿！非也！如果槓桿就喺 SCALE，咁你用十倍槓桿抽新股，豈不是咪又喺 SCALE？單純嘅槓桿，只喺將個 SIZE，依既定嘅比例放大，但對事物嘅各方面影響，就唔一定會依相同嘅比例放大。真正嘅 SCALE，喺基於你嘅原始能力同付出，通過造成對事物各方面嘅相對影響嚟衡量嘅。所謂各方面，唔單喺講錢，而喺包括一切有形及無形嘅影響，所指嘅，亦唔單喺呢啲影響本身，更涵蓋埋佢地嘅廣泛性、連鎖性、深層性、深遠性等。 

喺唔喺好難明？我舉一個極端例子，美國總統，毫無疑問，喺操控著一個龐大嘅 SCALE，而呢個 SCALE，唔止喺講錢、GDP，或者喺經濟體之類。一個短線投機者，登上咗美國總統嘅寶座，喺會帶嚟災難。就睇特佬，2017 年宣佈，承認耶路撒冷為以色列首都，佢嘅原始付出，都只喺彈指之間，但至今造成咗幾多生靈塗炭？又正如你攞十萬出嚟，去 RUN 一盤一百萬嘅實業生意，相比你金錢嘅付出，你個 SIZE 乘大咗十倍，變成一百萬，但你個 SCALE，又何止呢一百萬？你喺影響緊你一眾雇員嘅生計同前途，你嘅客戶、供應商、合作伙伴、融資伙伴，以及相關嘅大小企業，呢一切，成就咗你個 SCALE，喺廣泛性、連鎖性、深層性、深遠性。 

對你自己個 SIZE，你可以唔使負責，就好似億幾買匯豐，蝕幾千萬，大不了咪沽咗佢囉！使鬼負責咩？但對於你嘅 SCALE，就唔可以唔負責，所以點解我話，創業唔難，守業唔難，停業，先至喺最難，而好多生意人，到最後都喺過唔到呢一關。記得多年前，我曾經响度分享過，一個海外客嘅故事，個客俾你三成訂金，你就走去訂料、做貨，交貨後佢找埋果七成俾你。我用果三成訂金做貨，當然唔夠，即喺要靠啲下游供應商放數俾我，以及同銀行融資。我放數俾個客，個客又唔知放數俾邊個，啲供應商放數俾我，而佢地又有自己嘅下游供應商，放數俾佢地，而大家又有自己嘅長期或短期嘅融資渠道，例如銀行或者財仔。呢條產業鍊個 SCALE，對比於當中涉及嘅每個單位，各自嘅原始能力同付出，都唔知倍大咗幾多。之後，個數期越拖越長，由交貨後即找，到交貨後 30 日、45 日、甚至 90 日至埋單，而換嚟嘅，就喺更大同更頻密嘅訂貨量。個 SCALE 做到咁大，要剎停佢，唔使蝕錢之餘，仲要對得住條產業鍊當中嘅每個單位，我用「巧妙」一詞，講就輕鬆，實質上有幾艱難，壓力幾大，真喺非筆墨可以形容。 

SHIELD（盾）

講返 2018 年，我話內地嘅債市，可謂四面楚歌，而我嘅金融資產組合，就正正喺以內企債及相關嘅高息金融項目為主，加上我嘅槓桿比例，近年都喺連續維持响極高，MARGIN 近乎零嘅水平。我諗大家唔使點計都知，理論上，我喺應該搞到損手爛腳，但點解我話，仲有「可觀」嘅利潤？如果你問啲傳統主流經濟學嘅信徒，佢地只會諗到一個答案：高沽、低入囉！ 

冇錯，高沽、低入，彷彿喺 MARGIN 近乎零嘅槓桿投資者，响大跌小升嘅環境之下，賺到錢嘅惟一可能，但對我而言，情況當然唔喺咁簡單。因為我嘅投資，喺一盤生意，發展到今時今日嘅 SCALE，我嘅一舉一動，除咗影響自己嘅利益之外，仲會影響到好多人。再者，我有水晶球嘅話，倒不如走去做「股神」好過啦！ 

記得我曾經多次提過，我喺以現金流抗風險，縱使經歷一系列進化，時至今日，呢個仍然喺我投資嘅重要基礎，只喺形式略有不同。2015 年，我將一部分現金流，以非槓桿模式購入資產，將借貸比率，大幅下降至安全水平；但到咗 2017 年，金融市場大旺，我加大増持資產嘅力度，令借貸比率又重回極高水平，不過同時我亦通過調整現金流以及資產擴張嘅比例同模式，建立咗一個我地稱之為「盾」（SHIELD）嘅防禦機制。 

所謂，養兵千日，用在一時，2018 年中，呢個防禦機制，正式啟動，我將投資利潤鎖定响預期嘅水平，同時平衡咗各方利益。踏入 2019 年，內地債市開始回復，而我就只喺用咗一季嘅時間，就將現金流提升返到甚至超越我全盛時期嘅水平。對於呢個「盾」（SHIELD）嘅防禦機制，基於商業機密，我就只能夠透露咁多。 

真正嘅投資

記得响呢個網站，我曾經就投資嘅定義，同網友討論咗成半年，之後又俾人屈轉軚。其實，如果你對投資嘅理解，脫離唔到低入高沽呢個模式，而對於投資物嘅判定，又超越唔到金錢、貨幣嘅局限，咁我就算再同你討論多十年八載，都冇可能令到你明白，乜嘢先至喺真正嘅投資。 

《真正嘅投資，喺增持有值之物，同沽走即將喪失值之物。而最重要，就喺持有果一段時間內，必須充分行使投資物嘅值，以帶嚟最大嘅利益》 

所謂，有值之物、即將喪失值之物，唔一定同錢有關，而喺包括人世間上，一切有形及無形之物，所以「值」所代表嘅，亦唔一定只喺講錢。投資物嘅值，喺包含一切可以衍生利益嘅作用同功能，咁即喺話，「入」同「沽」呢兩個動作，只不過喺對投資物嘅值，作出嘅第一個同最後一個「行使」。呢兩個動作之間，即喺「持有」果一段時間內，其他一系列對「值」嘅「行使」，反而先至喺投資行為嘅最重要部分，以及為投資者帶嚟最大嘅利益。至於所謂「利益」，自然亦唔單止喺錢，而喺涵蓋一切有形及無形嘅利益。 

回望自己嘅辛路歷程，基層出身，為咗理想，自學寫程式，進身電子工程界，受雇高科技企業，到 2000 年創業，打過官司，2009 年結業，之後通過磚頭融資，建立一盤投資生意，再發展到今日個 SCALE，當中涉及咗幾多投資行為？就連我自學寫程式，都可以話喺一項投資，為我帶嚟，响猛車邊嘅 A LEVEL 成績之下，進身理想專業嘅機會，呢個就喺無形嘅「利益」。增持自己嘅技能、行使自己嘅技能，回報咗除金錢以外，學業、事業、專業地位，以及發展自己獨有嘅性格、理念、社交群，呢一切回報，又成為新嘅投資物，繼續增持、行使。而當自己嘅技能、生意，「即將喪失值」之際，就只能無奈沽走，再將過往儲備咗嘅，有形及無形嘅回報，包括資產、經驗、理念、伙伴、融資聯繫等，再投放一盤新嘅生意。諗返轉頭，如果當年我冇自學寫程式，真喺未必會有今時今日。 

投資真喺好忙

近兩個月前，我同朋友會面，當中有人問我，做投資應該好閒，點解我會話自己好忙？唔喺講笑，我真喺好忙，試問有邊個生意人會好閒？有邊個生意人，唔使日日為自己盤生意跑山？少幾分認真嘅，又點會有咁嘅先機，去造就個「盾」出嚟？而「盾」嘅建立，亦唔喺一朝一夕，就算有咗個「盾」，都要適時作出關鍵同火速嘅決策啦！今年第一季，市場回復，我真喺幾乎日日都買嘢。如果有人同你講，佢嘅槓桿比率喺七成，而佢嘅總資產，只要升一個價位，即喺 0.1%，就可以買一張可槓五成嘅美元債，咁佢嘅總資產，就喺廿萬美元乘 0.5 除 0.7 再除 0.001，即喺 1.4 億美元，或者 11 億港元，而淨資產呢，就喺 11 億乘 0.3 即喺 3.3 億。 

都喺果句，呢啲純粹喺數字例子，對我本身個 SCALE，絕對冇什何暗示或明示嘅成分，只喺你响我面前，最好唔好亂吹，因為我喺識計數。其實我想講嘅，喺如果你只識得買件貨返嚟，擺响度就有息收，升到咁上下就沽咗佢，咁你梗喺可以好閒啦！但倘若你能夠充分用盡你所持投資物當中，有形及無形嘅值，通過行使、回報、增持，循環不息，咁你擁有嘅一系列有形及無形嘅投資物，就會形成一個相互緊扣嘅產業鍊，呢個就喺你嘅 SCALE，而你亦須要為你個 SCALE 負責。所以點解我話，我嘅一舉一動，除咗影響自己嘅利益之外，仲會影響到好多人。 

隨著市場、政策跟著時勢進化，你嘅 SCALE 亦須要與時並進。記得多年前，我同朋友分享過自己嘅操作，當時就有人話，唔會將所有雞蛋，放埋响同一個籃度喎！唉！試問有邊盤生意，唔喺將所有雞蛋，放哂入同一個籃度？有邊個生意人，唔喺瞓身自己所屬嘅行業？有幾多個，可以做到綜合企業？你要做大個 SCALE，就唔可以介意將所有雞蛋，放埋响同一個籃度，同對你呢個籃，即喺你個 SCALE 負責。所以今日你同我講，攞件磚頭押俾銀行，融出嚟嘅資金，已經唔可以再槓桿，我都只能夠話，冇把握機會嘅，就唔好慨嘆時不與你。 

金融扭曲第三波

磚頭融資唔可以再槓桿，喺繼 2015 年頭嘅「金融扭曲第三波」之後，金管局一系列金融體系監管同優化政策嘅其中一項。「金融扭曲第三波」喺金管局針對企業、物業、以及金融三者之間嘅連鎖關係，推出嘅第一項措施，而呢啲連鎖關係，就正正喺金融風暴嘅催化因素，有幾關鍵，可想而知。所以點解响《股樓篇》嘅最後，我話如果唔喺多得金管局，真正嘅金融風暴，早就已經嚟咗至少兩次。第一次，喺 2015 後半年嘅中港股市大跌，而第二次呢，就喺 2018 年中美貿易戰嘅開打。倘若金管局，唔喺有效咁切斷咗企業、物業、金融呢三者之間嘅連鎖關係嘅話，咁究竟有幾大鑊，就真喺唔使多講。 

所以呢，如果好似《緣結．天璣》文中咁講，金融扭曲第三波，真喺由我當年嘅警告，觸發出嚟嘅話，咁令到香港倖免於兩次真正金融風暴嘅，原來我都有份喎！哈哈！我喺咪好威威？真喺有啲飄飄然，彷彿已經成為咗 AVENGERS 嘅一份子啦！真喺唔好意思，講下 SHIELD，又講下 AVENGERS，開始有啲語無倫次添。 

不過講真，有時候，真喺有必要自大一下。如果你唔了解，自己嘅某啲行為，個 SCALE 究竟可以有幾大，咁就最好謹慎啲。話說有網友，想我寫貿易戰，結果我考慮咗成年都未開筆。記得年幾前，响某 WHATSAPP 群內，我同朋友講，話自己唔會出可以引發核彈嘅文章，但當然，是否核彈，亦只不過喺一個機率問題。大家要了解貿易戰，坊間嘅社評，可謂多如繁星，問題喺你究竟 BUY 邊一套啫。 

中美嘅矛盾、核彈嘅文章

其實好多時候，我地縱使冇水晶球，都唔代表完全冇辦法，去擬定自己嘅長期投資方向。早於 2015 年底，我已經就《真正嘅第十個人》嘅揭盅，達至咗一個非常重要嘅結論，就喺美國加息，即喺代表呢位全球一哥，响環球金融嘅舞台上，已經喪失咗領導地位。雖然我冇去預測，美國對呢個轉捩點，會作出啲乜嘢具體反應，但呢項新嘅「現在嘅基礎因素」，已經足以令我之後，無論見到邊位生意朋友，都會不忘問一問佢，有冇同美國有生意來往，有嘅話，就要小心啲。直到特佬上咗場，我又再一次作出警告，仲叫大家真喺要 DIVERSIFY 下啲生意添。而跟手爆發嘅中興事件，簡直等同向大家發出咗最後通牒，再唔醒覺嘅，將來發生乜嘢事，就唔好怪我冇預先通知。 

總之，對中國人而言，任何同美國，以及美國盟友有關係嘅投資、生意，甚至喺交流，都已經變成極高風險，雖然都幾無奈，但呢個喺事實。中美貿易戰，只喺冰山一角，長期嘅中美矛盾，先至喺主菜。不過响我眼中，其實好簡單，三億幾冇乜進步空間嘅人口，對比近十四億大把進步空間嘅人口，勝負早已分，不過整個過程，將會好痛苦，亦會持續好多年，而個世界就會趨向兩極化，全球嘅人民都會受到傷害。 

香港喺中國嘅一個城市，所以唔好以為我地可以置身事外，或者從中取利。整個畫面，其實唔太複雜，一個中興事件，已經可以睇穿哂，包括我提過嘅「核彈」部分。我會再評估一下，喺咪適當時候，响下一篇發表呢個「核彈」部分。可能會有朋友覺得，我嘅疑慮喺多餘，甚至認為我自大。都喺果句啦，只不過喺一個機率問題，真喺自大嘅，一年前就已經寫咗。對於一個，自己唔了解嘅 SCALE，謹慎，反而先至喺謙卑同負責任。 

十條命都唔夠死

同樣地，作為投資者，對自己嘅 SCALE，喺要負責。仲記唔記得《市場嘅角色》一文最後，我問各位有冇深思過，自己嘅事業、生意、投資，擔當緊乜嘢角色？對社會，對市場，有乜嘢貢獻？責任同貢獻，喺相輔相成，你個 SCALE 越大，牽連越大，責任就越大，而貢獻亦會越大。 

對你嘅 SCALE 唔負責，莫講話你自己，十條命都唔夠死，你會累死嘅，更何止十條命！

（待續 ...）

多謝分享 ! 

曾經聽過二句話：「世上沒有無緣無故的成功」和「成功路上并不擁擠」。珍兄娓娓所道出的自身經歷對這兩句話給出了最佳詮釋。

講到scale, 我諗我的股票投資應該已經達到一定的scale. 以前我一直想不明白：為什麼我一個小小散戶竟能左右整個股市？不管之前漲勢多麼瘋狂，我一買入它必定下跌！我一賣出它就上漲。我一空倉大盤瘋漲，我一滿倉大盤狂瀉。一個超級大國的富豪總統和手握百億資金的莊家們竟死死盯著我手裡這幾萬蚊散紙不放。幾十年來屢試不爽，從未失手。你這篇文章終於幫我解惑。

感謝分享，靜待核彈。