四,政府好多嘢,都係搵來搞;但有時候,表面上搵來搞嘅,又可能有其他 agenda 。用定息來講呢,銀行如果搞,梗係要有錢賺;但假如本來都有錢賺,又駛乜要你個區區十億?
五,原則上,做銀行借錢出去,只要債仔還錢,實賺,而且一定係暴利。定息按揭喇喎,其實重點係唔駛做加息壓力測試。
六,嘩,咁都得?點解唔得。話明定息,即係唔駛睇加息因素啦,係咪?但假如加息呢?茂波咪話預咗唔會囉。咁,一旦真係加呢?
七,燈燈燈等,金管局管風險,所以有壓測,但旗下嘅按揭證券公司,就幫銀行做擔保。按揭證券公司,又點管理風險?賣啲 interest rate swap ?邊個買返呢?銀行囉。咁點分散風險呢?唔知呀。零八金融海嘯點發生呢?唔知呀。
八,完全對沖晒風險,就不如唔好做。最搵錢嘅風險管理操作,就係「公就我贏,字就你輸」;「你」就係廣大市民,而呢個現象,叫道德風險。
九,又咁講,正常情況下,銀行都會管理風險嘅,但如果有人擔保,咪再大膽啲;如果係有央行做 The lender of last resort ,又再大膽啲。
十,學 Walter Bagehot 話齋,央行做 The lender of last resort 都得,但係要用高息去懲罰啲管理不善嘅銀行家。Fair enough?
十一,不過,香港有個特點,就係聯繫匯率,所以金管局話接美元賣港紙就多多都有貨,但係調返轉,人哋攞港紙問佢攞返美金,咁就大鑊啦。即係話,the lender of last resort 其實都唔係頂得到幾多。
十二,太平盛世,又真係冇乜問題,甚至乎連咩 the lender of last resort 都唔需要。
十三,不過,正所謂,唔怕一萬,至怕萬一。假設,港匯兌其他主要貨幣升,而且係急升;尤其係人民幣。之前買落港元資產嘅人,尤其係大陸人,覺得打個折頭都除笨有精,沽出港元資產,將港紙兌返美元再兌其他貨幣,然後去其他地方執平貨,咁會點呢?
十四,資產價格受壓,港元求供都減,亦都會出現去槓桿;咁都唔死得人嘅。但呢個時候,就要睇聯儲局嘅情況。1997 年,聯儲局就係要加息,美元亦都一路強落去;假如歷史重演喇喎,呢啲定息按揭就即刻變有毒資產。
十五,當然,我講嘅係 once in a blue moon ;正如 2008 年都係百年一遇,武漢肺炎亦都係。
十六,呢個時候,一定有人提出「脫勾」;1997 / 98 都有人咁講過。
十七,又不過,香港融資,正路都係用美元,因為個資金池夠深,亦因為呢個原因,香港做融資比任何一個地方都更有優勢。
十八,脫勾,借落美元嘅大財團,真係多得你唔少。當然你可以話:「鬼叫你唔借港紙呀?」實情係,當香港出現經濟危機,就最缺乏脫勾嘅條件;最有條件脫勾,就最缺乏動機。
十九,所以,一直以來,每任財政司都話要發展香港債市;但其實最想發債同玩公開市場運作嘅,係政府。終有一日,香港會結構性財赤,政府都要借。但聯匯嘅限制下,政府發債規模有限,甚至乎,港元債嘅規模都有限。
二十,話說回頭,香港政府可唔可以借美元呢?恐怕咁做全世界會多好多 Kyle Bass ;債港紙,依家都要落唔少 sweetener ,好似咩銀債、通脹掛勾債券,都係賣晒大包,亦都賣得晒,但講真要再做大,就難少少囉。
廿一,最不方便嘅真相係,香港嘅銀行金融制度設計,你可以話穩健保守,亦好賺錢(睇匯控業績就知啦)。另一邊廂,政府同監管機構,可以干預嘅嘢好少,但出事嘅時間,可以做嘅就更少。
廿二,我相信金管局入面嘅技術官僚,都好明白佢哋面對嘅限制,可以唔搞,都唔搞。不過,政府過去成日都要金管局配合做埋啲逆週期嘢;定息按揭,通脹掛勾咪呢隻囉。
廿三,政府怕樓價跌,茂波都唔止一次咁講,但又唔敢叫金管局放寬壓測(或者金管局都唔贊成),咁咪出定息按揭;一來可以試吓變相放壓測有咩效果。
廿四,其實唔係冇風險,只係邊個承擔相關風險嗟。十億,真係濕濕碎。不過呢十億,都已經見到金管局同政府嘅矛盾。
廿五,我成日話,貨幣政策嘅獨立,重要性絕對唔低過司法獨立;希望金管局可以頂得住啦,往後嘅政府,更差嘅日子,對呢個機構嘅政治壓力將會更加大。