當磚頭失緊流動性

　　最近有朋友搬屋，從離島搬去大埔近沙田佢個仔屋企對面嘅屋苑，面積細咗，聽講話就五十平方米左右，房租二萬蚊。朋友年紀有番咁上下，搬屋為咗身體有乜病痛有親人第一時間照顧。以佢單身要俾呢份租金，月收入冇五萬蚊打底都難維持佢嘅日常生活支出。如果係大學畢業冇幾耐，加上老婆同佢一樣學歷，舊年平均都就係賺呢份人工，教書嘅可能賺多少少。

　　以六百萬買我朋友租嘅呢間樓，呎價萬二蚊，回報率得4%，仲低過銀行按揭貸款。如果樓價唔升，買呢層樓收租仲要每月貼錢，不如去炒股票，仲多個流動性。如此推論，年輕人就算大學畢業結咗婚，都冇任何激勵同迫切需要去置業。講開又講，對於磚頭嘅迷信，係呢二十年中美從談戀愛到結婚過程嘅結果。呢世紀初，大陸入世貿組織，香港作為中美或中西投資貿易嘅必經樞紐，啱啱吃正條水。依家中美鬧離婚，破鏡重圓冇乜希望，我估計就算大好友中原老細老施，佢嘅座右銘系“滄浪之水清兮，可以濯吾纓；滄浪之水濁兮，可以濯吾足”，今日咁講明日都會隨時轉軚。

　　呢幾年中港融合更加緊密，去珠海雖然有一水之隔，但有港珠澳大橋通咗車，香港早就無聲無息地同大灣區融合。老化嘅香港人口更有傾向北上養老苗頭，大灣區樓價物價遠比香港為低，人工都係。目前香港人北上消費已成風氣，大陸網購平台又大舉進入香港零售市場，而另外一方面支持香港經濟嘅金融、貿易物流以及已經在失血嘅房地產嘅繁榮景象，可能已經係夕陽無限好只是近黃昏。唔好話我對香港嘅前景持悲觀態度，重要嘅係以平常心對待時代潮起潮落嘅變遷，面對現實。估計香港嘅磚頭正在經歷佢二十年嘅泡沫爆煲，如果係舊樓仲失緊佢嘅流動性，可能遭遇自由落體。