地產博客 > 絲絲細語 返回
瀏覽人次:15772    回應:6
絲絲細語

填海無公關

 

左丁山

2018年10月22日

  到上海總會與朋友吃午飯,本以為係傾閒偈,點知一講就係東大嶼填海呢個熱門話題,逃不了。跟住隔籬枱又係熟人,走過嚟講Hello啫,聽見我哋講東大嶼,就企在旁邊發表意見,講到唔停口。幾位仁兄都係中環成功上岸人士,或正在上位之有前途人士,冇一個會上街遊行抗議嘅,但講起呢個話題,無論支持或唔支持,都認為林鄭操之過急,毫無公關籌劃可言,令人懷疑林鄭團隊是否完全唔理會公關作業。

  退休會計師以前係「碧科」合夥人,佢事業有成,一向支持政府,現在搞投資基金,連咭片都用埋簡體字,但對林鄭頗有微言:「點解唔開發大嶼山而要填海呢?大嶼山咁多地,移山便宜好多啫。」年青分析師答:「郊野公園地段嘛!開發綠色地段,反對聲音更大。」會計師講:「乜都有人反對嘅啦!要講埋銀紙成本效益先至得㗎,移山便宜好多㗎!」中年外滙專家話:「點解唔發展棕地,聽講話有千幾公頃噃!」分析師話:「我對此有少少研究,本想全新界逐幅棕地點算清楚,做一張細明表,配埋google上空地圖,放上網畀公眾人士了解,但因為太多,我做咗百幾塊地就因為冇人手、冇時間,於是放棄唔做,其實政府發展局應該做一張全港棕地laundry list,巨細無遺咁放上網,讓公眾評評道理。」公眾可以因此知道乜呀?

  分析師話:「我睇過幾百幅google地圖,知道有不少棕地位於荒野,出入不便,或三尖八角,好難起樓;或地面上有不少貨櫃車,建築材料,要搵安置辦法,講發展棕地就易,實際上有好多棕地得物無所用,還有好多經濟活動要覓地搬遷,去邊度搵吉地安置呀?技術上有好大問題,要搞好多年!」咪係囉,為免大家誤會,發展局真係要為咗公關作用,製作一張詳細棕地分佈表,以釋眾慮。

  大家都一致同意,填海係一個好強嘅選項,但林鄭為何要跳過土地供應專責小組,提早公佈填海?東大嶼係二三十年嘅大型項目,等多三個月,明年初先至公佈又有何不可,為何急在一時?林鄭不設新聞統籌專員,擺明唔要政治公關,唔知有乜理由。會計師話:「我哋班老鬼未必唔贊成填海,但林鄭話嚟就嚟,使乜咁急呀?」呢點大家都唔知,會計師似乎老馬有火,代佢個階級發聲:「如果拆咗粉嶺球場,徵收石澳球會,香港仲有乜樂趣,我臨老都要移民呀!」好彩香港會係私家物業啫,佢唔使驚,對佢哋嚟講,清拆粉嶺高爾夫球場,就好似睇到「情迷夏灣拿」套戲,1958年秋冬季嘅情景,古巴上流社會還在紙醉金迷,不知卡斯特羅就快入城,沒收資產階級資產!

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 十一哥 2018-10-22 11:25:34
D地散收收 ?  乜嘢叫開墾 ? 乜嘢係整合組織  ? 點都實際過~平過~快過~填海啦!咁都唔識…仲學人扮上流專業  ?   如果片片淨土…香港使乜扮冇地、土地收回條例…平民生息之地…知你地玩唔起…就唔怕覆核  ?  大錢袋哂太陽嘅地…就吹大覆核嘅威力 ! 

冇上水club就冇人生樂趣  ? 咁閉翳移民啦!慳番個位、老奉貴族就可以攞上水着數㗎 !


2. 笑咗 2018-10-22 16:31:59
冇咗個golf場就要移民(喂,放眼大灣區大把場打到手爛都得,作者係唔係想話俾我哋聽,有呢一班人唔支持大灣區發展?),班友仲大小姐過港女,不過,呢個論調係新奇嘅,我就真係想睇吓收番個場,導致幾多人移民。
3. 引刀一快 2018-10-22 22:48:24
香港何止有農地棕地?可以飛地嘛,一飛過去,三年內有樓俾人住,駛要等十幾年兼使錢駛到家空物淨?
4. morgan 2018-10-23 00:00:53
劉德華 : 200萬港人多謝你 !
來源:香港網 www123.hkw.com
公屋申請30萬,居屋申請26.5萬,4人家庭計共有200萬港人等上樓,200萬基層市民正租住劏房!他們受盡地產霸權的壓榨,地產霸權捐錢給所謂環保人士,以虛假的保護環境為理由,反對填海,反對收回粉嶺高爾夫球場、反對收回棕地、反對開發郊野公園,無視香港人住屋的迫切需求,無視香港人的悲慘現況,想港人世世代代,子子孫孫為奴,為地產商打一世工。

是你劉德華,站出來為200萬等上樓港人發聲! 為香港基層市名納喊! 香港網代表200萬等上樓港人多謝你! 700多萬香港人支持你! 全球16億華人支持你! 你住豪宅,關心200萬租住劏房香港基層市民,你頂住地產霸權僱用的打手對你的圍攻,你才是真正的香港人! 你是香港的驕傲 !

回望10月14日反對填海遊行,組織者收了地產商的巨額捐款,充當地產商打手,炮灰,只有5800人上街遊行,相對200萬等上樓的港人,反對者只佔少數,微不足道。

東大嶼填海5千億元,土地收益1萬億,填海後可賣地,收回相當於成本幾倍的收入!明日大嶼不止可以增大儲備,同時還可以解決100萬香港永久居民的居住問題,可以建成新中環( New Central ) ,新的金融中心,社會效益5萬億!同時,香港具有一百多年的填海經驗,維港兩岸的摩天大廈,都是填海填出來的,技術上也沒有太大的困難。


香港網呼籲香港政府 : 為了香港的利益,為了香港人的將來,勇敢地做出果斷的決定大規模填海,收回粉嶺高爾夫球場、收回棕地、開發郊野公園建屋 !
5. 引刀一快 2018-10-23 03:55:00
To 4樓

呢200萬人心急否?

心急就一定係支持飛地,三年上嗮樓,有咩好得過佢?
劉先生話嘅填海,200萬人等死咗100萬個,佢地真係“冥”感五內。
6. 引刀一快 2018-10-23 03:57:50
To 2樓

人地就係想移民南沙珠海中山增城惠州肇慶,住高球場隔離。