地產博客 > 樓市散打王 返回
瀏覽人次:9393    回應:0
樓市散打王

白居二勢誕居屋樓王

 

方卓如

2017年10月14日 (信報)

  綠置居如果唔會增加公屋輪候時間,前設係政府對公屋富戶冇計,冇辦法令公屋富戶交回房屋福利。用綠置居令公屋富戶擁有長住公屋嘅權利,的確係令有需要而冇能力嘅草根階層輪候時間增加。而如果公屋富戶現在住响市區公屋,政府又冇能力趕佢哋離開公營房屋,佢哋又點會願意放棄咁好嘅福利,走去新界買綠置居?

  白居二上兩輪共四千幾個配額,並非全數合資格申請者都有買二手居屋。肯出讓未補地價居屋嘅,一係佢哋有錢可以進入私樓市場,一係老早已經違法出租居屋,另有居所。前者只係購買力換購買力,用唔夠實力嘅購買力引出了夠實力嘅購買力,提供俾私樓市場。如果係後者,居屋必定善價而沽,企硬唔會減價,因為計劃恒常化,唔似得以前只有兩輪配額,蘇州過後冇艇搭,唔敢賺盡。有理由相信,白居二恒常化,居屋售價會進一步推高,因為只此一次機會,購買力唔會有限額,作為有居屋在手嘅利益者,一定要賺盡先離場。最後,居屋嘅售價會追貼私樓。唔好忘記,居屋無論面積同配套,都會優勝過賣得更貴住得更細嘅納米樓,未來一年,你會見到更多居屋樓王誕生。

  置業係好多市民安居嘅方法,唔使怕加租,唔會俾趕走,仲可以有自訂嘅生活空間。但係用公營房屋嚟滿足市民置業要求,一係就學新加坡,購買公營房屋本身就係社會主流,而唔係將現有公營房屋嘅模式,一下子變成置業市場。唔單止令政府資源無法用來幫助有需要嘅人,亦令早期受惠嘅市民突然多了一筆橫財,早享福利嘅有更大福利,受害嘅依然係而家需要福利,卻從來無法享受福利嘅一群。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼