特区政府成日讲要增辟土地，增加住宅土地供应，以便兴建多啲公屋畀N无人士上楼，但讲一套，做一套，曾经宣传轰动一时嘅土地供应专责小组，交完报告畀政府之后，黄远辉亦已裸退，但现时政府做过乜？旅游餐饮就话畀疫情玩死啫，土地唔会喎，新楼盘销售仍然畅旺，政府何不趁住经济低迷时期，多推土地？啱啱相反，政府计划在第四季推出两块地皮：可建单位合供630伙咁大把，连同其他地皮，即黄竹坑港铁站上盖1,000伙，私人发展与重建项目1,150伙，全季供应总数系2,780伙。如果讲财政年度（今年3月至12月），三季供应总数加埋系7,400伙，系乜嘢概念？地产专家、莱坊（Knight Frank）执行董事林浩文认为目前市场需求估计，每个财政年度供应2万至2万3千伙较为适合，到咗2023年，市场就会出现供应不足问题，可能僧多粥少。
即系咁，政府无力找到成熟地皮应市，只靠私人发展商拆旧楼重建，供应掌握在私人地产商手上，梁振英当特首时，曾埋怨曾荫权政府冻结土地供应，不建房屋，曾荫权之发展局长系边位？当今特首林郑月娥罗。
地皮唔系冇，只是政府冇决心，政府在9月25日收回迪士尼竹篙湾60公顷土地，大可用作建屋用途。迪士
尼一直唔愿意，不积极将土地扩建乐园之用，丢空近二十年，政府收回有理，迪士尼近年已全力着重拓展上海迪士尼，对香港小市场兴趣渐失，加上疫情打击迪士尼全球乐园业务，已宣布裁员二万八千人，在此环境下，仲要喺香港霸住幅地做乜？政府收回之后，唔该尽快规划改变土地用途，作住宅用地。改变用途须得城规会同意，算几合理，但原来亦要得迪士尼董事局通过，咁就麻烦，有排都未掂，亦反映出当年董建华政府与迪士尼谈判发展协议，几咁被人占了便宜。
如被迪士尼玩残，都冇办法嘅啫，蚀底啲，用钱买起迪士尼乐园，赔钱送走佢，将土地合并兴建一个新住宅区，面积共38公顷加60公顷，共98公顷，即98万平方米，点都可以兴建万几伙公屋、居屋啩？一定快过填海造岛搞明日大屿吖，迪士尼乐园对香港经济之贡献以后只会日渐萎缩，弃之不足惜，何况佢呢间公司挂住大陆，早已无心恋栈香港！
App下载
