昨日讲起之暂免每月供楼，行唔行得通呢？捉一位银行朋友问一问，佢话：「Mortgage Moratorium理论上可行，但要睇银行制唔制，小数怕长计，全香港咁多人供楼，每月现金流好大，若银行放弃呢笔现金流，都
几大牺牲㗎。美国啲银行之中，有啲专门Mortgage Moratorium，佢地就好难孭得起几个月冇现金回笼嘞。但香港银行体系稳健，照计唔怕，不过间间银行业务不同，要睇金管局有冇牙力至得。」
唔，一个意见啫，财政司司长办公室有大批经济师，金管局又有不少研究人员，请佢地研究可行性啦，又未必个个供楼人士会去要求延期供楼嘅啫，佢地有得拣㗎。
至於如何援助因疫情影响而失业冇钱交租人士（例如旅行社职员），比较困难，叫业主暂不收租六个月，明年冇疫情之后欠租再分12个月摊还，技术上未必得，难以一刀切，因业主未必个个系大富翁，一啲可能系靠收租嚟维持退休生活嘅啫，租客暂停交租，小业主会系受害者。
左丁山与几位朋友在午饭时吹水一轮，都无法谂得出一个实际上可以满足不同条件失业人士之租金方案，有待特区政府财爷去研究了。
呢次疫情带出几个重要教训：（一）唔好先使未来钱，总要积谷防饥，世界上有太多不可思议之突发事件，往往令人措手不及，手头无积蓄，随时要乞米。意思系，加强积蓄，买少啲无谓嘢，对甚么内需、零售额，以后必有结构性影响；（二）退休靠收息，原来不大可靠，滙丰银行都反口，除净之后居然撤销派息，跟住有欧洲保险公司，紧跟宣布唔派息，退休人士为之一壳眼泪，以后要重新估计食息策略；（三）去年初联储局本已开始加息缩表，后因贸易战，再来C19疫情，反而拚命减息，以后十年相信都系零息，存款至银行，眼光光蚀畀通胀，不如拿出一部份来买股票，至於如何买，是另一个要仔细考虑嘅问题。因C19源头责任问题，美国及欧洲政治风向趋於责难中国，慢慢变成China vs West嘅局面，亚洲／非洲国家多数保持中立，中国经济极大可能受损，倚赖内地人消费之生意（如旅游），前景不明。
App下载
