地产市道近来看似甚为疲弱，成交量大跌，细价楼成交价动辄从高峯价下滑十几二十巴仙。早已上岸嘅代理P属於元老级人物，到马场捧自己只马，在沙圈上面又碰到左丁山，顺口问佢只马有冇机会，佢话：「练马师话志在轻舒步头，开吓气先，跑多两场就有WQ机会。」於是买四重彩时拖脚冇拖佢只马，点知好惨情，佢只马最后五十米冲得好劲，啱啱跑第四，杀咗左丁山条四重彩。
於是在大看台地下捉住地产P哭马丧，地产P冇表情咁畀左丁山睇佢张飞：六只互串四连环，就系冇自己只马。佢素来精於计数，绝不浪费注码嘅，如果唔系，点会咁多年来，凤凰无宝不落，买楼致富吖。
输马乃小意思，大件事系楼市，地产P话加息阴影，中美贸易战阴魂不散，经济增长放缓系表面因素，直
接影响因素系资助居屋以五二折出售，比较以前嘅七折，即系政府居屋带头劈价18个百分点，立即打击可转手公屋、居屋嘅售价，之后祸延细价楼上车盘。还有一个长远心理因素，就系大规模填海，莫讲明日大屿有1700公顷，即以发展局局长最近不断强调交椅洲填海1000公顷计，未来土地供应大增，点都会压抑地产商累积土地储备嘅意欲，而且同时急於在填海地推出市场之前（2030年左右），将手头上嘅新界农地尽量加快发展，即系意味未来十几年房屋供应有增无减。
讲讲吓，又有老友出马。要走番去沙圈，地产P加多一句：「或者纯属巧合，今次跌市，CCL指数连跌9个星期，在10月10日施政报告发表之前开始下跌，你话是否凑巧！」哦，实属巧合啩。究竟香港人喜欢楼价升，还是喜欢楼价跌呢？狂升之时，不少评论大骂土地霸权，辣招无用。现在楼价下滑嘞，又有评论叫人宁买当头起，跌市时不可入市。楼价升六成影响梁振英任内民望，假若林郑任内，楼价跌四成，林郑民望是否会急升，有利2022年连任？呢个问题都几深奥，唔识答。
地产P跑多一场立即揸车（有粤港牌）去珠海，佢话前星期第一次去，揸车好爽神，大路任佢行，沿途只见到巴士，少见私家车，更不见货柜车，系令佢觉得拥有粤港牌私家车最威风时刻，临行佢幽左丁山一默：「等到你都可以揸车上桥去珠海，我就唔去趁热闹咯！」即系话，港珠澳大桥非常方便，但回本遥遥无期。
App下载
