填海无公关

　　到上海总会与朋友吃午饭，本以为系倾闲偈，点知一讲就系东大屿填海呢个热门话题，逃不了。跟住隔篱枱又系熟人，走过嚟讲Hello啫，听见我哋讲东大屿，就企在旁边发表意见，讲到唔停口。几位仁兄都系中环成功上岸人士，或正在上位之有前途人士，冇一个会上街游行抗议嘅，但讲起呢个话题，无论支持或唔支持，都认为林郑操之过急，毫无公关筹划可言，令人怀疑林郑团队是否完全唔理会公关作业。

　　退休会计师以前系「碧科」合伙人，佢事业有成，一向支持政府，现在搞投资基金，连咭片都用埋简体字，但对林郑颇有微言：「点解唔开发大屿山而要填海呢？大屿山咁多地，移山便宜好多啫。」年青分析师答：「郊野公园地段嘛！开发绿色地段，反对声音更大。」会计师讲：「乜都有人反对嘅啦！要讲埋银纸成本效益先至得㗎，移山便宜好多㗎！」中年外滙专家话：「点解唔发展棕地，听讲话有千几公顷噃！」分析师话：「我对此有少少研究，本想全新界逐幅棕地点算清楚，做一张细明表，配埋google上空地图，放上网畀公众人士了解，但因为太多，我做咗百几块地就因为冇人手、冇时间，於是放弃唔做，其实政府发展局应该做一张全港棕地laundry list，巨细无遗咁放上网，让公众评评道理。」公众可以因此知道乜呀？

　　分析师话：「我睇过几百幅google地图，知道有不少棕地位於荒野，出入不便，或三尖八角，好难起楼；或地面上有不少货柜车，建筑材料，要搵安置办法，讲发展棕地就易，实际上有好多棕地得物无所用，还有好多经济活动要觅地搬迁，去边度搵吉地安置呀？技术上有好大问题，要搞好多年！」咪系罗，为免大家误会，发展局真系要为咗公关作用，制作一张详细棕地分布表，以释众虑。

　　大家都一致同意，填海系一个好强嘅选项，但林郑为何要跳过土地供应专责小组，提早公布填海？东大屿系二三十年嘅大型项目，等多三个月，明年初先至公布又有何不可，为何急在一时？林郑不设新闻统筹专员，摆明唔要政治公关，唔知有乜理由。会计师话：「我哋班老鬼未必唔赞成填海，但林郑话嚟就嚟，使乜咁急呀？」呢点大家都唔知，会计师似乎老马有火，代佢个阶级发声：「如果拆咗粉岭球场，徵收石澳球会，香港仲有乜乐趣，我临老都要移民呀！」好彩香港会系私家物业啫，佢唔使惊，对佢哋嚟讲，清拆粉岭高尔夫球场，就好似睇到「情迷夏湾拿」套戏，1958年秋冬季嘅情景，古巴上流社会还在纸醉金迷，不知卡斯特罗就快入城，没收资产阶级资产！