富二代千祈唔好同人拍档做生意

　　有老友知道我认识不少有钱佬以及富二代，问我现在的富二代是否烂滚烂玩，我话据我所知，现在的富二代不但教育水平比富一代高，唔会烂滚烂玩，反而很用心做生意，希望青出於蓝，但富一代想法有些少不同，在烂滚烂玩与热衷做生意，大多数富一代都希望富二代烂滚烂玩，或者烂滚烂玩唔好听，应该是识饮识食。

　　有老友最近愁眉苦面，我以为畀银行call loan，原来唔系，是佢个仔与人拍档做生意，他只是小股东，以为玩吓，又冇签担保，点知拍档知道佢系富二代，横掂有人垫底，唔乱咁使钱就笨，最后欠租欠粮欠货款，俾人贴街招追数，搞到佢个仔都唔敢见人，日日在屋企躺平，其实，所欠的金额不是太多，找数就可以，最怕找完一笔又会出现另一笔，现在唯有搵追数公司拆掂佢。

　　老实说，我所识的富二代大多数不但教育水平很好，而且很有魄力，又唔烂滚烂玩，本来非常完美，但可惜他们是富二代，是一个原罪，不时有人搵他们拍档做生意，那些人很多都是心术不正，赚到钱认为是自己功劳，点解要分俾富二代，蚀了钱就关人个关，叫债主追富二代，所以，我一向主张富二代唔好同人拍档做生意，如果一定要，就要做大股东，因为做大股东还可以控制，做小股东没有话事权，任由其他人摆布，输了钱就要富二代孭飞，千祈唔好以为投资些少，玩玩下冇问题，输哂都有限，其实可能是无限大，做小股东就已经输了，拍档与债主就是赢家。

　　老友话，佢个仔答应，如果将欠债事件搞掂之后，就返公司帮手，我话如果系咁，就唔好咁快搞掂，一定要个仔受到教训。