薪金中位数同楼价比较嘅把戏

　　据调查显示，香港楼价之贵，上年要18年不吃不喝才可上车，今年已经要19.4年，楼价高处未算高。这个用薪金中位数同楼价比较嘅把戏，只可以用嚟做宣传，贪soundbite够响，认真对待你就死得。薪金中位数，你认为一半打工仔嘅人工应该系可以足够轻松供楼？全世界嘅工资都系停滞不前，香港失业率可以创新低系异数，其他发达国家尤其是系年轻人都系冇嘢做。用工资去买大城市嘅楼，唔止系香港，其他大城市已经系赶绝新一代，令佢哋大部分都难以拥有房地产。

　　纽西兰直情想限制外国人买楼，因为本地人买唔起楼，甚至有人要瞓街。用人工嚟买楼，连首富都买唔起，因为佢攞嘅人工超低。大把人唔系靠出粮生活，呢啲能够买楼当食生菜嘅人，正正系楼市嘅中流砥柱。唔使等下年调查报告，我敢肯定，下年你要21年不吃不喝先买到楼，首次有城市突破20年。

　　我早前写过，香港唔系最难买楼。如果用薪金中位数去计，北京上海更加难，要40年不吃不喝先得。不过调查唔包括内地城市，先让咗个冠军宝座俾香港。但系你唔见北京上海楼价跌，政府操控咁厉害，禁买禁卖都出埋，都唔可以令楼市下跌，证明当人类唔相信银纸，能够保存财富嘅，最有效永远系砖头，中国人思想尤甚。

　　你要记住，楼价最难负担嘅城市，通常系最多人想生活、最搵到钱嘅城市。排名香港之后嘅，有悉尼、矽谷一带呢类城市。全部系生活一流，或者财富增长最快嘅地方。市场唔会呃人，楼价咁贵，呢啲城市都无话人口迁离，市民大逃亡，反而愈多人想住，愈多人想置业。又唔见大量人口迁往楼价甚平嘅喀布尔？楼价愈贵都咁多人涌入，梗有其原因，后果系楼价会更贵。

　　史上出现楼价一沉不起嘅，只有日本，得呢个国家，楼市泡沫爆破后继续长期沉沦，让香港人咁多机会走去买楼，变身民宿出租。原因系大部分日本人都系甘於打工，每月出粮。你睇吓日本地铁站，那种营营役役嘅气氛，全世界少见。用薪金中位数走去买楼，结果就系年轻人走向极简主义同无欲无求，反正一世都唔使旨意，不如将自己生活要求降低，咁就生活得写意。香港千祈唔好望份人工够你买楼，要先谂如何唔买楼去令你未来可以买楼，等於前辈话斋，望自己发达都唔好望楼价跌。