最理想嘅理由,当然系本栏有影响力,所以阅文(00772)同雷蛇(01337)在上市首日有不同嘅股价表现;次一级嘅理想理由,怕且系本栏同一众有货嘅人都人同此心,所以说法大致与市况同步;但真实同残酷嘅理由,可能只系巧合。姑勿论边个理由,雷蛇同阅文系唔同级数,股价表现反映咗。
对於同时有用大约银码入飞抽两只股票嘅投资者,最佳嘅策略,就系用羊毛出自猪身上嘅方法,沽雷蛇揸阅文,咁你手上阅文嘅货应该系零成本,坐几耐都得。
早前提到有楼市分析员讲得出楼价会跌嘅理由,佢仲有一个理由我讲漏咗,就系佢话美元会升。美元升,港纸都要升,咁港元资产好易会跌,否则港元升港元资产又升,以非美元计,香港资产咪好贵?咁冇理由世界上有自由市场嘅资产可以比其他市场超前太多而没有沽压,大致上理由应该如此。
不过,货币作为一种资产类别,佢嘅价值除咗同其他资产比较,亦同其他货币对手比较;一只货币平定贵,好难用一个数字定夺。美元兑日圆升值,兑人民币可以贬值,兑美股又贬值,咁你话美元系升咗定跌咗?
港元跟美元升值,咁港元兑其他资产类别又是否一定升值?港元可以换多啲外币,是否表示少啲港元一定可以换同一层楼?
如果港元供应太多,虽则兑换其他货币有着数,但是否等於换层楼返嚟同样着数?
分析员读书太多,认识世界流於理论化,但系世界比理论行得更前,结论系好多分析同市况脱节。例如环球股市大升,冇人可以解释到。香港楼市升完又升,抛几多加息预期恐吓论都无助减低恐慌性买楼,到最后用不理性去解释一件要好理性才会够胆做嘅事情,以致无人可以信服。
都系嗰句,要学让思考不理性为理性,你至会赢。