唔到你唔信邪,30年前10月19日黑色星期一,香港股市下跌420点;30年后嘅同一日,恒指跌552点,成交1165亿元,吓亲唔少人。不过,30年前系一日跌一成,今次只系跌2%,其实湿湿碎,离股灾水平甚远,如果跌五六百点就惊惊,你都系唔好炒股票。
冧市有两类人最惊,最有实力同最冇实力嘅人。最冇实力嘅人通常问最有实力嘅人借钱,用资产抵押。冧市,资产价格大跌,最冇实力嘅人还唔到钱畀最有实力嘅人,沽咗啲抵押品都收唔番条数,你话系咪佢哋两类人最怕冧市?反而实力普通嘅人,过去一年得个睇字,佢哋唔知几想冧市,可以扑出嚟执啲笋嘢。除非打仗,或者中美政府出现重大财金决策错误,否则见唔到会出现一蹶不振嘅冧市。
温哥华有房屋空置税,任何房屋半年都冇人住,即收1%空置税,但其实温哥华空置率只有0.7%。反而香港空置率3.8%,空置税就谂都唔使谂。D类同E类嘅大单位,空置率仲高达10%。所以话,香港房屋供应缺乏,好大程度系房屋落入了强者之手,佢哋整体响心有灵犀嘅情况下夹份造市。只要大家实力够,明白唔好出现人踩人,个个都企硬唔减租,宁愿丢空,租金楼价必定托到飞起,齐齐玩资产增值游戏。
政府要楼价同租金下跌,其实唔系冇方法,重手抽15%空置税,保证你今日抽签嘅中环楼盘好难超购十几倍。但系政府一定唔会咁做,因为冇一个社会可以捱得住楼市大冧,原因系楼市充斥着最有实力同最冇实力嘅一群。楼市大冧,政府善后要花嘅精神,较楼市大升如何安置市民,高出不知多少倍。还有,而家香港有楼嘅人,其实比计划买楼嘅人更多。所以,政府几时都系想稳定楼价多於推低楼价。
有实力嘅人而家系向外搵紧笋嘢,所以你见到咁多海外楼盘嚟香港卖,因为对比起香港楼价,任何地方嘅房屋都可以包装为笋盘。但系呢个世界系冇咁大只蛤乸随街跳,笋嘢系唔会咁易畀你求其响Facebook见到。有实力嘅人,唔代表唔会买错。佢哋而家最挣扎嘅系,应该留响度等,还是走出去搏。