地产博客 > 资深会员专栏 返回
浏览人次:44089    回应:53
资深会员专栏

专业机构投资者(二)市场嘅角色

 

珍惜香港

法团专业投资者
SMIEEE.MSc(ICDE)
http://facebook.com/hongkongtruevalue/
2016年1月18日
上文提到,我会再同大家,分享自己嘅体验同体会,包括早前提过果三个十倍。但由於呢部份,曾经响近一年半前嘅「环球经济新常态之一(债嘅机遇)」回应系列中详述过,大家可以先 CLICK 番去重温一下,而我亦会尽量避免重复。不过,唔好意思,点写,呢篇嘢,都会好长。

寻觅商机嘅生涯

我喺一个生意人,2000 年创业,2009 年结业。之前打工、之后做生意,我都好悭,成世人跑到依家,除工干以外,都只喺去过一次旅行。我将所有赚番嚟嘅钱,放哂入砖头里面,所以结业之后,单靠收租除成本嘅净收入,已经可以养家。几年以嚟,我同战友,不断奔走,寻觅、BRAINSTORM 新嘅商机,除咗最熟嘅科技老本行,以及同互联网有关嘅创新嘢之外,仲计划过搞药房、找换店之类,真喺乜都谂齐。

对每一项计划,我地都好认真,自己出资,定喺搵投资者夹?生意模式、运作是否可行?只喺短线,定喺可以长远发展?唔熟行嘅,使唔使搵合作对象?而对方又信唔信得过?有时,唔喺信任问题,而喺响盘生意里面,自己会担当乜嘢角色?呢个角色,是否长远?成事之后,人地仲使唔使靠你?唔好以为我地只喺老吹,真喺物色咗合作伙伴,连计划书都出埋。就好似创新科技项目,有哂 SCHEDULE、BUDGET;而找换店呢,连内地对冲嘅人事,都随时可以商议。但到最后,呢啲计划,全部告吹,而大部份,都喺我地自己决定刹停。

后期,终於有咗结论,自己都唔再年青,又有哂家庭,响百业归边嘅大环境之下,复出搞实体企业,要面对嘅风险,始终唔喺我地可以承受,亦冇必要去搏。於是,我地开始谂下啲投资项目,用砖头融资,由扫几十个发展商拆售嘅车位,到买起一间教育机构嘅大铺,都考虑过。其实,响 BRAINSTORM 嘅过程中,包括上段提及嘅各项计划,都有同合作多年嘅银行,商谈融资嘅可能性同模式。所以,我地非常了解,所谓低息、QE,根本就落唔到去实体经济度。搞实业嘅融资成本,喺 P+;而购入金融资产嘅融资成本呢,就只喺 P-,甚至喺 H+。到最后,由搞实业,变成投资金融项目,只不过喺,势之所趋啫!

债券投资简述

我地选择投资项目,非常保守,要融资,就唔可以炒价图利,一定要有稳定,同可预期嘅现金流,为主要嘅收益。身为生意人,我地唔接受只喺响数字上,而唔了解自己实质角色嘅投资,呢一点非常重要,我稍后会解释。结果,我地选择咗高息债券,要留意,喺直接购入同持有债券,唔喺债券基金,呢两味,喺天渊之别,我稍后亦会解释。

投资债券,门槛高,一个单位要廿万美元。基於汇价风险,我地借港币,就唔会考虑美元以外嘅债券,果阵市场睇好人仔都喺咁话。记得我当时讲过,汇价始终喺相对嘅,升跌冇得估,家阵人仔点样,各位有眼睇。融资方面,个别债券要视乎评级,同银行内部嘅风险评估。投资级别嘅债券,可按六至七成;非投资级别嘅债券,可按五至六成;太低级嘅债券,喺冇得按。按得嘅,当然有杠杆风险,呢啲风险,主要嚟自债价,同违约呢两部份。

债价方面,每只债券,喺以 100 为发行基础,有升有跌。其实,买债,即喺借钱俾发行企业,只为收息,唔喺要赚价;反正到期之日,发行企业都喺以债价 100,即喺廿万美元,还番钱俾你。期间债价升跌,只喺基於市场对个别债券,实质收益率(YIELD)嘅评估,造成交易双方嘅转手价,偏离 100。例如,一只非投资级别嘅高息债,升级成投资级别,就会被市场追捧,直至债价升到个 YIELD 同市场其他投资级别嘅债券睇齐。又例如,一间企业有非常负面嘅消息,令市场担心佢还唔起钱,导致违约,咁佢嘅债价就会大插。一般债价,好少会跌破 90,跌穿 90 嘅,一定唔慌好嘢。企业违约,可以喺停止派息,以低於 100 还钱,甚至喺唔还钱,呢个就喺债券投资嘅最大风险。

第一个十倍:资产

我地买债,喺先用现金购入,再混合砖头一并融资,以投资机构模式运作,响融资方面,就有较大嘅弹性,同攞得到最尽。就以砖头为例,商业融资,可按高至八成以上,再加上杠杆投资,规模就会做到好大。假设你响后沙士期间,以 100 万买咗个两房单位,升到 300 万,已经供满,咁按八成,就即喺融资 240 万,再以五至七成,即喺平均六成杠杆买债,就可以买到 600 万债券,加埋市值 300 万砖头,总资产就喺 900 万,升咗九倍。不过,呢个只喺起动,扩大资产,即喺扩大咗现金流收益,再杠杆,再投资,运作几年,当然已经超过十倍啦!

果次我话,几年之内,将原始资产,由原来嘅三倍,再扩大至十倍,就喺咁嘅意思。100 万原始砖头资产,由原来升值咗嘅三倍,即喺 300 万,再通过融资同杠杆买债,先扩大至九倍,几年运作,已经超过十倍。但我嘅原始资产,可以令我结业后养到家嘅,当然唔止 100 万,至於个基数几多,SORRY,喺私隐,唔方便公开。再者,我以上嘅数字,已经比较粗略同保守,真正嘅规模,当然唔止十倍。

第二个十倍:现金流

既然喺以现金流,唔喺以赚价为收益,资产扩大,现金流就自然扩大。我嘅债券,都喺八厘以上,就当平均九厘;而银行对金融资产嘅融资,喺好低息,就当佢两厘,净收入都有七厘。用以上例子,600 万债券,每年净收益 42 万,每月就喺三万五千。当年 100 万嘅两房单位,租金除成本,收入都只得六千左右,依家租金升咗,就当一万啦,咁即喺,现金流收入,由六千,扩大至四万五千。咦?只喺七倍半,何来十倍?

都喺果句,呢个只喺起动,每年 42 万收益,再杠杆就可以买多一球债。大家唔好扮醒捉错,话债券单位廿万美元,一球喺买唔到。都话,呢个只喺数字例子,我嘅规模,何止咁小?回正题,每年多买一球债,复式上,运作三年,每月总现金流就会超过六万,即喺十倍啦!

第三个十倍:风险承受能力

大家都喺识得计数,今时今日,响香港,拥有市值几千万物业嘅人,为数不少;而租金净收入,只喺得果两至三厘,每月都唔够十万。呢盘生意,可以令佢地身家过亿,每月成球收入,边度搵?我早前话过,经营多年,之后衍生咗一系列抄袭同变种个案,而佢地经历过两个大浪之后,好多都搞到损手烂脚。

对风险嘅承受能力,呢个十倍,先至喺最重要!

近半年嚟,无论股市、债市,都大幅波动。恒指由二万八,跌至近二万,最近仲穿埋,直逼万九。咁债市呢?几乎全线下跌,连表现最好嘅债券基金,都下跌一成。市场一般嘅金融资产,普遍下跌三至四成,而我嘅资产市值,响最差果阵,都只喺跌咗 3-4%。呢个就喺我所讲,经历近期连串市场波动嘅试练,我对风险嘅承受能力,证实为市场一般能力嘅十倍。

大家可能会觉得,我有啲取巧,人地跌三至四成,我跌 3-4%,咁就叫十倍?好多人以为,手持现金嘅多少,先至喺对风险嘅承受能力,因为有事果阵,就睇你有几多现金自救。不过,作为一个生意人,我想问大家一句,依家你喺要自己果盘生意,可以承受到市场嘅风险;定喺要你自己,去承受你盘生意嘅风险?如果你盘生意喺唔掂嘅,就不如摺埋佢,好似我当年结业咁,唔好等到真喺唔掂果阵,先至抬自己副身家去救!

不过,话分两头,响 2015 年,我已经将一部份现金流,以非杠杆模式购入资产。我嘅增长,虽然慢咗,但借贷比率,已经大幅下降至安全水平。当然,增加咗嘅杠杆额度,随时又可以攞嚟买嘢,但有乜嘢好买?唔通喺股票咩!

正因为我盘生意,面对大市风险,具十倍嘅抗跌力,到市场资金醒觉,就自然流向我嘅资产类别。跌 3-4% 之后,跟手已经回升 6%。到依家恒指直逼万九,我嘅资产市值,仍然高企,当中手持重货嘅高息债,已经俾人抢到有价冇市。点解?因为阿爷减息之后,稳阵嘅高息债,已经唔会再有新货啦!

专业机构投资者:市场嘅角色

当日我讲三个十倍,即刻就有人出嚟,笑我做 MARGIN 买垃圾债投机。其实,传统银行肯做得杠杆嘅债券,就算喺非投资级别,都经过银行内部严格审视,不过,自己当然亦要对发债企业,作出评估。我以前都话过,买债,即喺借钱俾人,呢盘喺生意,喺投资,唔喺投机,唔喺炒股搏升赚价。简单嚟讲,借钱俾人,人地点风光,唔关你事,有啲人,有钱都唔想还。所以,我反而要睇佢点衰,佢衰果阵,点样处理危机,先至喺你对佢有冇信心嘅关键。基於呢个标准拣债,结果我手持最重货果只,由非投资级别,升咗上投资级别,债价急升,杠杆又由六成变七成,呢一剂,喺最经典。我嘅债券,已经唔再喺垃圾,或者正确啲讲,从来都唔喺垃圾!

响第五段度,我提过一个重点,亦喺呢篇文章,最重要嘅部份。

生意人赚钱,一定要清楚知道,自己赚嘅钱,喺点样嚟,俾嘅成本,去咗边。真正嘅投资,唔喺依赖啲乜嘢必赢投资法,或者乜嘢数字、流程、公式。最重要喺清楚自己,响市场里面,担当乜嘢角色,咁你就会知道,几时应该出手,几时应该收手。我之所以,花咁大篇幅,写自己买债之前,多项计划嘅告吹,喺希望大家明白,响一个发展成熟嘅经济体里面,创业喺好难,因为你好难搵到一个,可以长远生存嘅角色。搵到嘅,就喺机会难逢,捉唔住,未必会再有下次。

我好清楚自己嘅角色,喺为发债企业,提供发展嘅未来钱,收息,喺分享佢地发展嘅利润。点解我会响人地,享受紧美债基金嘅高收益果阵,叫人睇紧啲?家阵美债问题,芳间睇法,以为喺长期低息,令企业滥发债,但唔通啲企业,个个都想呃人钱?美国已经冇可能,好似发展中国家咁,有超过 5% 嘅经济增长,既然喺低增长,融资成本就一定要低,因为冇人俾得起。所以,新常态之下,长期低息,喺合理;唔合理嘅,喺点解咁低息,啲企业债,仲可以上十厘?即喺话,高息差,只喺嚟自投资需求,夹硬俾投资者瓜分,人地根本就俾唔起,咁点好嘅企业,都变垃圾啦!

所以,我投资嘅债券,都喺内地企业发嘅美元债,低息港币融资,投放高增长市场,享受高息差,先至喺合理。不过,内地企业,尤其内房,芳间嘅评论,都属高风险。ANYWAY,最近云云债基之中,似乎只有内房债基,表现最好。记得早前,对於为咗个楼市,死等烂等嘅人,我问:你究竟想买件物业,定喺要买个「市」

专业机构投资者,令人联想起基金,而基金嘅角色,喺帮客人,唔喺帮自己投资。所以,基金一定要分散投资,一方面,降低风险,另一方面,购入一篮子金融资产,即喺买个「市」。咁基金价格下跌,就梗喺因为个「市」跌,喺个「客」冇眼光,买错「市」啦!关只基金乜事?唔好唔记得,你赢又好,输又好,基金都喺咁赚你钱,人地喺「帮」你投资嘛!呢个,就喺基金嘅角色。

而我,呢个专业机构投资者,就要用自己嘅钱同资产投资。所以,规模几大,都喺集中哂响果几只债券度,至於债基,都喺用买债净低嘅零钱购入,占总资产少过一成,顺便勘探市场,唔喺点识咁多宏观嘢。呢种高度集中,有违一贯分散风险嘅做法,正喺因为,我唔喺投机,唔喺要买个「市」,一只都唔输得!呢个就喺我第五段尾讲嘅,天渊之别。我嘅角色,喺为企业,提供发展嘅未来钱,值得借嘅,唔介意借哂俾你一个!

后感

Alan打工仔,最近嘅文章,写得短,但我好欣赏。物业买贵咗,唔喺问题,但最紧要唔好唔记得,自己买嚟做乜。大家用股票同物业比,喺冇意义。买件物业嚟「用」,讲乜输赢?但股票,又可以「用」嚟做乜?自住物业,响生活上,担当住好重要嘅角色;收租佬,响实体市场上,亦有明确嘅角色。如果你炒股票,玩牛乜熊乜期乜,你又知唔知道,自己响实体经济里面,喺乜嘢角色?还是,只喺响一个大枱面上,同人对赌?

各位有冇深思过,自己嘅事业、生意、投资,担当紧乜嘢角色?对社会,对市场,有乜嘢贡献?

我写嘢,从来俾唔到大家答案,因为答案,每个人都唔一样。
 
 
我要回应
我的称呼
回应 / 意见
验证文字
 
会员登入
登入ID 或 网名
密码
1. 打工仔 Andy 2016-01-18 12:08:52
沙发先!
2. 望东楼 2016-01-18 12:44:07
High yield bond都系我嘅至爱资产类别,不过只系买fund(系驶入水雷区嘅航母)。
3. 打工仔 Andy 2016-01-18 12:46:14
珍兄

债券投资嘅学问的确比买楼收租高好多! 小弟学到野! 
多谢分享! 
4. 蓄芳待来年 2016-01-18 13:24:44
「买件物业嚟「用」,讲乜输赢?」貌似简单,实深得价值二字之精髓。
如果认为在香港「买楼住」系「必需品」,就无谓去谂乜赚蚀。反正都要「食」,视乎个人能力,有钱就「食」好d,冇钱就「食」平 d。成日谂住天日后日会平d,所以今日忍下饿吾食住,或者用「面包」顶住先,唉,人生何苦如此?
计较生活必需品之价格者,脑海除了钱之外,应该没有其他。
只要决定出於「量力而为」,心𥚃根本不需有任何包袱。

多谢珍惜师兄无私分享。
5. 占士 2016-01-18 14:21:23

谢谢珍港兄好文分享!您一直是我敬佩的师兄!我自己也有参与不同种类的投资项目,也有和朋友合作经营实业,有的现在还在进行,有的已经停止。这些年,很多做实业的朋友都艰苦经营,如果可以的话,我会继续经营,甚至不断拓展业务!所以在市场上,我有好几个角色,我会分配好自己的时间尽力做好每一个角色。

6. Taiwaner 2016-01-18 14:26:48
感谢,,这篇要看多几次才能体会, 我想大概的意思就是“眼光要好”
7. 请教珍港兄 2016-01-18 14:44:37
阁下提出的港元高息债,是否能在高开市埸买得到?谢谢。
8. AH-HO 2016-01-18 15:00:34
谢谢珍兄的无私分享。
3个10倍,等左甘耐终於知道了。
最同意就是:对风险嘅承受能力,呢个十倍,先至喺最重要!能够做到个scale甘大但又可以严控风险,确实厉害!

9. CDROM 2016-01-18 15:48:28
我知道珍兄既分享唔系志在掌声, 不过小弟睇完第一次忍唔住拍烂左手掌.
响近年财务自由之路几近断绝之际彷佛见到一线曙光, 多谢珍兄带来希望同正能量俾我地呢d新手走下去既力量.

10. Jerry 2016-01-18 15:51:32
谢谢珍兄分享!

要知道自己既角色呢一点真系好重要。

了解自己投资的是什么?能承受多少压测、风险?在别人恐惧时增持有价值之物,一直持有价值之物直到它失去价值。

了解多了债券操作,感谢! 赞
11. 向饭民说不 2016-01-18 16:41:10
今日研究了台湾的22k问题,结论就是台湾大学生根本唔值22k。虽然台湾人怨声载道,但是22k应该是比多左。
12. 向饭民说不 2016-01-18 17:16:39
我都话,PEG系统只会一次有一次的引大鳄攻击,今日见到了彭博系度煲,

CHKMA Pledges to Keep Currency Peg: These Are Some Alternatives

http://www.bloomberg.com/news/articles/2016-01-17/hkma-pledges-to-keep-currency-peg-these-are-some-alternatives
13. 无奈 2016-01-18 17:19:24
坦白说,可能今生都难有机会、胆量学珍兄这般在投资市场操作,服!
买基金,命运操作在别人的手𥚃,正确。小弟多年投资大陆物业,管理托他人,回报时好时坏,只是托赖地产价格水涨船高,如此说来也不算什么投资,要重新考虑下啦。

期待珍兄在后续文章里分享一下如何选择债劵,谢谢。
14. 望东楼 2016-01-18 17:27:14
饭民兄,以我所知,台湾99%年青人系学士,20%系博士。供求呀嘛?
15. 向饭民说不 2016-01-18 18:51:53
楼上,你说的有道理,但是也是显示22k
其实是ovetpaid。
国民党的失败其实是民进党将22k问题推给国民党,成功了年轻人对国民党失去信心。
看来,空心菜要解决问题,还是量化宽松,将台币贬值,同时解决18%问题。
16. 工商铺百厌星 2016-01-18 21:03:37
珍惜兄,

实在太好的一篇文,一定要入来支持吓!谢谢分享




17. 珍惜香港 2016-01-18 22:17:57
珍惜香港

TO:7/F 请教珍港兄

债市,唔同股市,唔喺公开市场,但银行、证券行之间,喺有一套系统做交易。客户可以通过佢地,点对点进行买卖,所以债价嘅透明度,喺比较低,以致各银行、证券行对债劵市值嘅估算,会有差异。但呢啲差异,都喺好轻微,对杠杆 MARGIN 嘅计算,影响唔大。

我讲嘅高息债券,喺美元债,唔喺港元债。内地企业,可以通过香港发美元债,向外融资。呢个就喺香港,作为国际金融中心,同时与内地接轨,一个好特殊嘅角色

同一个经济体里面,息差太高,投资者嘅角色,就会变成吸血鬼,蚕食市场,而唔喺为市场提供增长嘅资金。但香港呢个特殊嘅角色,造就咗跨经济体投资,令成熟经济体嘅低息融资,同发展中经济体嘅高融资需求,汇聚於同一个地方,再加上联系汇率嘅保护,去除埋美元同港元之间嘅汇率风险。结果,成就咗一个千载难逢嘅机遇,但呢个机遇,将会随著内地经济放缓,人行减息,以致息差收窄嘅大趋势,而逐渐消失。

息差收窄,喺后新常态现象。如果依家至起步,可能已经近水尾。

TO:16/F 工商铺百厌星

难得见阁下,一位咁资深嘅实力投资者,肯在此留字。

好荣幸!好开心!
18. anggie T. 2016-01-19 00:25:30
Thank you big brother.  Very inspirational!!!
19. 请教珍港兄 2016-01-19 00:25:55
多谢珍港兄指教。

正如13楼 无奈兄所说

期待珍兄在后续文章里分享一下如何选择债券,谢谢。
20. 感激 2016-01-19 01:51:42
你这编文章打通左我既脑袋同思维!谢谢您!
21. 神算 2016-01-19 09:09:18
感激珍港兄无私嘅分享投资心得!投资债券市场,控制得宜,的确会有稳健的发展。请问珍兄的组合里有否考虑欧元区国债?小弟相信阁下会灵活调动组合,息差收窄不会是大问题。
22. little property guy 2016-01-19 10:38:07
珍港兄, Thanks very much for your sharing!! You put money into my pocket!!
23. Taiwaner 2016-01-19 10:55:41
欧洲的利息低,息差应该会更窄吧??
24. 一命二运三风水 2016-01-19 13:23:43
珍兄高见,睇嚟都要系债卷方面做的投资,分散一的风险。

仲有今年属猴、属虎、属蛇、属猪嘅兄弟姊妹都要小心啲。

属猴的朋友今年值太岁,有『剑锋』、『伏尸』两星入宫,易受到锐器所伤。
属虎的朋友今年冲太岁,有『岁破”』凶星入宫,为2016年四大犯太岁生肖之首,要小心。
属猪的朋友今年害太岁,遭遇“亥申相害”流年,犯小人,轻者主口舌之争,重者有官司及牢狱之灾。
属蛇的朋友今年刑太岁,运势吉中带凶,工作往往节外生枝。
25. 砖家 2016-01-19 17:43:51
虽对债券不熟悉,经珍惜兄分享,可上一课
也非常认同说每个人应站在什么角色,自己需要什麽。
26. littlemun 2016-01-19 18:29:11
好强的文章,谢谢珍惜香港兄无私分享!

刚巧近期有缘听了一个私人银行负责融资的经理介绍他们的产品,配合珍兄的文章令小弟更了解当中操作。虽然小弟现在未有财力资产达到门槛,但未来日子会更留意此类操作并作部署。

再次多谢珍惜香港兄!!
27. 珍惜香港 2016-01-19 21:29:20
珍惜香港TO:21/F 神算

投资欧债,除咗汇率风险,同太低息之外,都喺最基础嘅,角色问题

借钱俾人发展,将未来嘅成就,拉到今日,咁人地得益,你分一杯羹,呢个喺双赢。

不过,人地唔够钱花,借钱俾人烧,我就冇呢个资格罗!

至於息差收窄,喺大趋势,无可避免,所以呢盘生意嘅模式,唔会喺永久。如君所言,调动组合喺必须,而寻觅投资机会,亦唔可以停。
28. 山高云低 2016-01-20 14:29:17
好久没见好文,真的要金睛火眼再睇一次。
29. 二少 2016-01-20 19:18:55
地产网最值得睇嘅文章,多谢珍惜香港!
31. Gordy 2016-01-22 21:44:10
谢谢分享, 简直大开眼!
32. 历史长河 2016-01-23 23:08:34
珍兄这篇文章已超越咗投资范畴,不如说人生分享更为合适。

人生的几次转型,皆顺势而为;拿得起,放得下,能放能收;不冒进,不保守,进退自如;兼顾家庭,携手战友,勇闯新高度。

志当存高远,路在脚下行。痛快!

33. 打工仔 Andy 2016-01-23 23:53:58
长河兄,

讲得好!
34. 幸运仪 2016-01-25 18:30:49
谢谢珍兄的无私分享,
请教珍兄如现在要投资高息债券, 那些是阁下认为现该段可买?
35. 亮剑 2016-04-10 14:04:15
虽然几年前已经知道珍惜香港兄的投资部署,但呢一刻再反覆细读,都有好大得益,讲真投资就如八仙过海,各显神通,而珍兄将历年投资心得大公开,真系普渡众生。 

不过呢个世界并无一条放诸四海皆准,又可适合不同人士既致胜方程式,珍港兄的灵丹妙药,别人可能觉得系山埃。

因为每一个人的际遇有所不同 ,因此所能承受的风险亦各有差异,有人希望搏一搏单车变摩托,亦有人只想晚上睡个好觉。

所以珍港兄最好加多几句:「上述文章所提的投资建议,并不构成要约,总之在决定投资前,要自己作出评估及承担,不要事后赖三赖四。」

哈哈!
36. 惜缘 2016-04-10 14:37:35
亮剑兄

好一句「 搏一搏单车变摩托」,妙!
37. 珍惜香港 2016-04-10 19:07:58
珍惜香港TO:35/F 亮剑

多谢剑兄捧场!不如响专栏出番篇嘢,咁大家就一定会好开心!

阁下嘅关心,先行谢过,但又无须太顾虑嘅。成就呢条方程式,真喺要过五关、斩六将,唔喺吹下就得。如果有人真喺照做,而又做得出嚟嘅,咁无论成败,都一定喺佢自己嘅责任,非我之功,亦非我之过

正如我早前话,鼓励人买楼,喺冇问题,唔通鼓励人买股?楼市买卖,门槛高,过程复杂。当中,有 N 咁多个理由令你却步,亦有 N 咁多个旁人指指点点。所以,成功买咗楼果啲,一定喺自己嘅决定,自己嘅责任。至於前人,肯将体验分享,睇嘅人,吸收到几多,理解到几多,达至乜嘢结论、乜嘢决定,就始终喺因人而异。

经过深思熟虑嘅,就喺自己嘅责任,冇经过深思熟虑嘅,更加喺自己嘅责任,关个前人乜事?

不过,如果我回答 34/F 果条问题嘅话,就真喺要加番你讲果几句啦!

所以,我从来都唔赞成,各位响网站度,评论个别嘅金融产品,应该只喺以分类为基础。例如,可以评论唔同类别嘅股票、基金、债券,但就唔应该讲埋喺边一只;而公开自己持边几只货,亦最好尽量避免。因为人地信你,先至会问你,即喺话,公开自己嘅持货,等同向对方推荐果几只货。公开得持货嘅,到自己沽果阵,喺唔喺又要公开提番先?莫讲话未必记得,你又唔知对方喺乜水、仲有几多人睇过,就算真喺记得提番,人地都未必会睇到啦!

曾经有人,响网站公开自己嘅持货,当中,有一只美债基金。不过,一段时间之后,佢开始对美债,作出负面评论,甚至讲到会爆咁,但偏又唔记得,自己推荐过一只美债基金喎!我绝对唔喺要怪责果位网友,因为佢只喺无私分享,出发点喺善意,我反而好欣赏。我只喺想话,随便公开自己嘅持货,真喺可大可小

股票、基金,入场门槛低,响网上 CLICK 下,或者俾银行录下音就买得。就算做杠杆,用股票、基金做抵押融资,手续都非常简单,边有楼按咁麻烦。特别喺基金,可按成数高,贷息又低,真喺好吸引。而果只美债基金呢,就算喺普通嘅银行,都可以提供到七成杠杆。

2015 上半年,喺银行嘅 CALL 客潮,佢地鼓励客户按股、按债、按基金,甚至按楼,去买金融产品,而高杠杆、低贷息嘅高息债基,更加喺力推。不过,到 2015 下半年,就变成银行嘅 CALL LOAN 潮啦!股票跌、基金跌;而果只美债基金呢,减派息之余,仲屡创新低,喺 CALL LOAN 潮其中一个重灾区。有人因为咁,搞到要资产重组,我唔喺讲笑,绝对喺真人真事!

至於我嘅投资业务,运作咗几年,到金融扭曲第三波,第一班车开走之后,尾班车,亦差唔多要开出。家阵,要启动呢条所谓方程式嘅门槛,已经高咗好多。我出文嘅目的,唔喺要提供乜嘢致胜投资法,或者乜嘢灵丹妙药,而喺想带出,无论做生意,定喺投资,一定要先了解自己,响市场里面,担当乜嘢角色

呢一点,喺非常重要。如果你,了解自已,响市场嘅角色,配合自己,响市场嘅角色,咁无论你用乜嘢生意模式,乜嘢投资方法,虽然冇保证一定会赢,但起码都唔会点输
38. 自我陶醉 2016-04-11 08:24:44
珍港兄,

点解叫人买股就有问题,叫人买楼就冇问题呢?  世界上跟本无一样投资系只会赚唔会蚀嘅, 包括楼。做任何种类嘅投资,都要先自己用脑分析,唔好靠贴士,唔好信有唔会蚀嘅投资,只要用正确嘅投资态度去分析,谂清楚值唔值得做,自己输唔输得起先去投资,不论楼、股、债、基金、货币都可以系好嘅投资。

我唔认为网友攞任何一只股,或基金出来分析讨论买与不买的理据有咩问题,有问题嘅只系嗰啲人有冇认真思考,认真分析,先作出任何投资决定。

博士上年公开同人讲自己买咗港交所,有人一听到就谂都唔谂仆去买,以为可以升足一世唔会跌,仲要做尽孖展,就算今日真系破产,都只能怪自己, 你认为这是博士的错吗?你上年同网友讲现在息口咁平无理由咁笨唔借,咁人哋真系信你话借到尽然后转头又被银行call loan, 搞到债务重组,你又觉唔觉得自己要负责任呢?呢度有人成日同人讲无论咩时候咩价位都可以买楼,如果有人真系信咗,点知有日发觉自己份工有问题,结果做咗空中飞人,又洗唔洗番嚟搵番嗰班人负责?

至於你讲嗰个会讲垃圾债爆煲嘅人,我谂除咗我呢度冇乜边个。 我仲记得我14年8月曾经提过几只美债基金,我亦好清楚记得我在提这些基金前,讲明两个月后股债都会因美国退市而有大波动,我亦讲到明自己2015年初就会减持美债。  我想请问如果真系有任何网友明知我对2015年美债睇淡,而且预早半年同佢讲咗,兼且我日日叫人减杠杆,佢仍然决定入市,仲惊死执输听你话借到尽去买而导致损失,应该关边个事?  我谂正常人都会知道呢啲只系个人投资决定,要怪亦只能怪自己,他们败也只是败於自己嘅贪婪。

同样,如果有人听我讲后在2015年初减持了自己嘅垃圾债同在CCL140以上减持物业,因而避过一刧,佢哋都唔洗嚟多谢我,因为呢啲系佢哋自己嘅英明投资决定。


以下系当时小弟在2014年8月时回覆toplight兄嘅内容,唔洗你搵得咁辛苦。

******

44 楼 toplight 兄

我唔介意同大家公开, 不过预先声明, 美国十月停买债后, 股债可能会非常波动, 小弟十月初会减持部分股票, 明年初亦会减持债券, 各位必需注意风险。

债券基金, 我较喜欢以下几只:
....

*******

最后,都要学博士咁买个保险先,如果有网友听我讲上年沽咗垃圾债同140楼上沽楼,现在任何时候买番都已经赚咗,所以各位自己执生,唔好因为楼市债市廿年后升番嚟搵我。

39. 引刀一快 2016-04-11 09:01:29
自我陶醉兄

叙利亚嘅宗教狂热份子,有好多派系,从人性角度出发,主要不外两种,一类以宗教约束自己,而另一类利用宗教约束别人。

楼市何尝不一样?
40. 自我陶醉 2016-04-11 09:37:03
引刀兄,

其实如果有人嘅投资会因为资产价波动一两成就要搞到资产重组,呢啲人应该谂谂自己到底系做紧投资,定系做紧赌博活动就当自己投资。无论佢投资啲咩资产,都只系死路一条。 哈哈!
41. 珍惜香港 2016-04-12 03:47:47
珍惜香港TO:38/F、40/F 自我陶醉

自醉兄,都话,唔喺要怪责你,反而好欣赏阁下嘅无私分享,唔止喺今次,上次都喺咁讲啦

经过深思熟虑嘅,就喺自己嘅责任,冇经过深思熟虑嘅,更加喺自己嘅责任

本来,就凭上面呢几句,理论上,我地响度公开点写都得,喺唔喺?咁嘅话,各位就唔应该互相指责,话鼓励人买楼,喺累人接乜棒、跳乜烧乜之类;或者话鼓励人买股票、基金、以及其他金融工具,喺累人输到 P 乜破乜之类啦!又喺唔喺?

当然,每个人,对自己嘅公开言论,都会有条底线。正如有啲嘢,我唔会写,因为市场本身,喺好敏感,尤其喺门槛低,容易成就果啲。推荐人买只嘢,人地转个头就买得,自己个责任咪好大?就算喺债券,门槛较高,但做七成杠杆嘅话,入场都只喺港币五十万有找。债市喺非公开市场,交投量同股票冇得比,我手持重货,如果公开自己嘅持货,令到多啲去人买,就可以推高债价,咁就算我唔沽,对我嘅 L/V 都好有利吖?咁点解我仲唔肯回答 34/F 果条问题?好简单,我嘅原则喺,如果要影响市场,就应该响市场度做嘢,同其他市场参与者交手,而唔喺通过一个公开渠道,兴风作浪。

我嘅文章,都喺好慨念性、宏观性。你见我讲拣债,都只喺谈慨念,唔会写埋喺边一只。我话果只升咗上投资级别嘅,就算俾你估到,佢依家个价,你都未必肯买。拣债,你估话咁易?又要高息,又要隐阵,做下功课,吹下水还可以,用到真钱,仲要做埋杠杆,你落得手咩?睇咗我啲似是而非嘢,到真喺成事,都要经历一个困难同复杂嘅过程,你做得到嘅话,关我乜事?我讲果三个十倍,你又试下搞间投资公司,搭呢个棚出嚟?你睇咗我篇嘢,可以好似买股票咁,响电脑 CLICK 几嘢就做得到咩?所以,亮剑兄讲果几句免责声明,在我嚟讲,根本就冇必要。

关於你回 toplight 嘅内容,其实冇乜问题,只喺如果唔透露喺边几只货,就会好啲。据我所知,买高息债基嘅人,好多都喺谂住长期收息,买咗唔会短时间内放,既然你都谂住几个月内沽嘅,写出嚟,就唔太适合。不过,呢个都只属我个人意见,千祈唔好好似,引刀兄话斋,乜嘢宗教约束别人之类。你点写,喺你自由,而我只喺发表意见,你亦可以唔接受,我都话过,喺 NO PROBLEM 嘅!

至於你提到,博士写 388,我当然亦有意见,不过冇乜触发点,又冇乜亲身嘅见闻,令我去评论。希望阁下明白,喺因为 34/F,再加埋亮剑兄嘅触发,先至令我又谂起果只基金。真喺要针对你嘅话,早就可以写,使乜等到依家?不过,如果因为引用到呢件事,令你觉得不快,我可以致歉

讲番果只基金,七成杠杆,你出三球,就可以买一千万。跌两成,就即喺要补一球四,或者得番一球。大唔大镬,就要睇你果三球喺点嚟,同埋有冇其他股票、基金嘅分散投资,做咗杠杆。我话,好多买高息债基嘅人,都喺谂住长期收息,唔会短时间内放,佢地自己赌紧钱都未必知。关於你 40/F 嘅回应,我只能够话,芳间嘅投资者,同埋呢个网站嘅读者,唔喺个个都好似你咁醒

所以,留多啲空间、门槛俾读者,自己思考、体验、选择

不过,都喺果句,个人意见,唔喺宗教约束。唔 BUY,NO PROBLEM
42. 自我陶醉 2016-04-12 08:52:22
珍港兄

请你唔好混淆,你讲嘅资产重组例子,重点唔系因为一只基金上落十几个%而造成,就算佢真系几个月后唔卖,基金每月派息,除息后亏损系几多?10%? 如果佢系长收息,基金一定系亏损?好明显唔系。

如果有人其中一样资产净亏蚀10%就要资产重组,呢啲唔系赌系咩?  所以我从来都反对年青人借到尽去买楼,6个月就冇15%, 有冇问过自己系咪输得起先?

你讲嘅例子,唔系败於所买嘅嘢,佢正正就系败於贪念和杠杆,亦系我一直最反对你成日话啲钱咁平唔借就笨呢个讲法嘅原因。 平就要借嘅咩? 你有冇问过自己输唔输得起先?  报纸同你讲澳洲纸长线会升值,你就去做尽20倍杠杆,结果一铺玩完,之后澳纸升几多都唔关你事喇!  

所以,真系好希望你认真检讨吓自己嘅言论系咪有问题,我认为息平唔系借钱嘅理由,输唔起的话就算唔收你息都唔好借。

43. 历史长河 2016-04-12 09:00:06
「请你唔好混淆,你讲嘅资产重组例子,重点唔系因为一只基金上落十几个%而造成,就算佢真系几个月后唔卖,基金每月派息,除息后亏损系几多?10%? 如果佢系长收息,基金一定系亏损?好明显唔系。」

哈哈,以为陶醉兄讲紧楼市,原来喺债。债可以从长计议,楼则一向短线思维。
44. 自我陶醉 2016-04-12 09:16:48
长河兄

买楼系用紧未来十几年嘅收入嚟投资,而基金系你现在有100万就买100万,输到尽都唔会多过100万。楼同基金有咩分别都睇唔到,我仲几乎以为你真系会醒过阿胃燶㖭!哈哈哈!
45. 历史长河 2016-04-12 12:20:10
陶醉兄这样的大户规模唔会咁细吧?唔使杠杆?
46. 自我陶醉 2016-04-12 13:07:10
长河兄,

我嘅建议一直都好简单,除非你打算同个市赌身家,否则,谂清楚自己输得起几多先杠几多,输唔起的话,千祈唔好因为息平就乱杠。呢个系避免火烧连环船嘅唯一方法。
47. 历史长河 2016-04-12 14:01:50
陶醉兄,这句话虽然冇咩错,不过也冇咩用处。借弓力兄话讲,即废话。哈哈
48. 引刀一快 2016-04-13 05:57:21
废话唔驶借,系永远属於长河san嘅
49. 自我陶醉 2016-04-13 08:31:15
48楼 引刀兄,

唔洗咁劳气嘅,如果有人废话得过佢,我都会好佩服㗎。 人哋有心有力呀嘛!怕咩赌大啲。 人哋系叻仔嚟(自以为), 你估好似珍兄讲嗰条友咁无脑咩!  哈哈哈!


50. 珍惜香港 2016-04-14 01:33:47
珍惜香港TO:42/F 自我陶醉

自醉兄,唔好扭曲我嘅言论

我话,债仔,最失败嘅,就喺低息唔借,高息先至嚟借,呢个只喺好基础嘅道理;同话,平唔买,贵先至嚟买,道理喺一样。

冇人话过,息平,就「一定要借」;借唔借,喺要睇你借嚟做乜。
正如价平,亦唔等於「一定要买」;买唔买,亦要睇你买嚟做乜。


仲有,阁下 38/F 第三段嘅理念,好有问题。借咗钱,一定要依时归还,呢个就喺借钱之道。你同银行借钱买楼,准时供款,就算个楼价点跌,银行都唔会 CALL 你。你喺绝对有责任,努力搵钱,去填番你,为咗今日要得到,本来他日先至可以拥有嘅嘢,而洗咗嘅未来钱。

所以,点解我成日话,物业嘅风险,从来都喺响业主嘅供款能力度,而唔喺响个价度

借咗,就喺借咗,抗风险,唔喺旨意你买咗果旧砖头,嘅所谓市价;因为市价,从来都喺冇保证。你喺要靠自己嘅「努力」抗风险,而唔喺靠「估」去抗风险。如果,你对自己嘅欠债,冇绝对承担嘅决心,而只喺抱住,到唔掂果阵,总可以卖走旧砖嚟填泵,嘅果种侥幸心态,咁我就奉劝你,呢一世,都唔好买楼,或者,到有钱 FP,先至谂买楼。
51. 引刀一快 2016-04-14 04:34:44
插下嘴先。


我话,债仔,最失败嘅,就喺低息唔借,高息先至嚟借,呢个只喺好基础嘅道理;同话,平唔买,贵先至嚟买,道理喺一样。

几时需要借钱,好多时系冇得拣嘅,绝大多数系时机问题,撞正低息,唔系叫成功而系好彩。

冇人话过,息平,就「一定要借」;借唔借,喺要睇你借嚟做乜。
正如价平,亦唔等於「一定要买」;买唔买,亦要睇你买嚟做乜。


仲有,阁下 38/F 第三段嘅理念,好有问题。借咗钱,一定要依时归还,呢个就喺借钱之道。你同银行借钱买楼,准时供款,就算个楼价点跌,银行都唔会 CALL 你。你喺绝对有责任,努力搵钱,去填番你,为咗今日要得到,本来他日先至可以拥有嘅嘢,而洗咗嘅未来钱。

所以,点解我成日话,物业嘅风险,从来都喺响业主嘅供款能力度,而唔喺响个价度

物业嘅风险,价同供款能力系相对而关联嘅,业主供款能力系衡量其中一把量尺如将业主供款能力视爲功率而价就系佢负载。不可能只看其一,更不能将供款能力视爲恒定,高负载个案尤甚。

借咗,就喺借咗,抗风险,唔喺旨意你买咗果旧砖头,嘅所谓市价;因为市价,从来都喺冇保证。你喺要靠自己嘅「努力」抗风险,而唔喺靠「估」去抗风险。如果,你对自己嘅欠债,冇绝对承担嘅决心,而只喺抱住,到唔掂果阵,总可以卖走旧砖嚟填泵,嘅果种侥幸心态,咁我就奉劝你,呢一世,都唔好买楼,或者,到有钱 FP,先至谂买楼。

呢段我睇唔明,自我陶醉兄讲过咩?
52. 珍惜香港 2016-04-15 02:01:56
珍惜香港TO:51/F 引刀一快

引刀兄,唔借唔得果啲,唔属讨论范围之内。

至於阁下唔明 50/F 尾段,喺因为你误解咗我成篇回应嘅意思。楼价越高,负载越大,呢点我当然同意,不过我唔喺讲呢部份。况且,负载亦喺相对於个别嘅能力,因人而异。总之,量力而为,唔好投机,我已经强调过好多次。而响呢度,大家鼓励买楼嘅各项言论,都冇话会好过份咁,叫人冇能力,借财仔都要迫上车。

50/F 后三段,主要喺回应 38/F 第三段之中,提到无论乜价都可以买楼,结果之后冇咗份工,做咗空中飞人嘅极端情况。首先我冇话过,无论乜「价」都可以买楼,我只喺认为,无论乜「市」都一样可以买楼。买唔买,喺睇个别人士嘅需要同能力,而唔喺睇个「市」。所以点解我话,97 买楼,HOLD 到依家,冇问题;有问题嘅话,都喺自己嘅问题。

买楼、冇咗份工、空中飞人,喺冇一个绝对嘅因果关系。发生呢三件事,当中嘅整个历程,涉及好多其他嘅选择同决定,而将最后嘅结果,完全归咎於买楼呢个决定,喺唔公平,同不负责任。你评估好自己嘅搵钱能力,借咗钱,买咗楼,就有责任保证自己可以依时归还。一个人嘅事业,主要喺掌握响自己手上,你搵份隐阵嘅工,定喺高危嘅工?你努力向上,定喺练精学懒?有冇得罪人多,称呼人少?对自己行业嘅前景,有冇不时评估?有冇部署?呢啲嘢,全部都喺自己控制。如果公司裁员,拣你唔拣第个,唔通喺你唔好彩?你冇咗份工,唔怪自己做得唔好,反而怪自己点解买咗楼

物业嘅风险,从来都喺响业主嘅供款能力度,而唔喺响个价度。

我成日强调上面呢句,讲嘅,唔单止喺事实,仲喺一种态度。如果你唔认为,物业嘅风险,喺响你嘅供款能力度,反而去相信,楼价嘅下跌,先至喺你面对嘅风险,咁就真喺好大镬。点解?我响 50/F 话,借咗,就喺借咗,就算楼价点跌,都喺要还。除非,你心存侥幸,谂住到唔掂果阵,总可以卖走旧砖头嚟填泵啦!咁即喺,你对自己嘅欠债,冇绝对承担嘅决心罗!你话大唔大镬?

唔难理解,呢种人,楼价一跌,就算自己冇事冇干,都会好惊青咁「止蚀」沽咗佢!

我买楼,从来都喺,买咗,就喺买咗;借咗,就喺借咗。做人,喺要向前看

专业机构投资者(二)市场嘅角色呢篇文章度,我反问咗大家一条问题。其实,无论你喺一个生意人,定喺一个借钱买楼嘅人,成败关键,在乎嘅,都只喺一个态度。

家阵你要自己果盘生意,可以承受到市场嘅风险;定喺要你自己,去承受你盘生意嘅风险?
家阵你要自己嘅竞争力,可以承受你借贷嘅风险;定喺要你旧砖,去承受你竞争力嘅风险?

53. 自我陶醉 2016-04-15 08:52:59
珍港兄,

所以我话你错:

债仔,最失败嘅,唔系,喺低息唔借,高息先至嚟借。

债仔,最失败嘅,系唔去评估自己嘅贷款风险,而只望住个息口平定贵嚟决定借定唔借。

你37楼举嘅例子,正正就系一个最失败嘅债仔例子,佢要债务重组,唔系因为佢买错一只有十几%价格波动嘅资产,而系因为佢嘅投资态度有问题。 


54. 珍惜香港 2016-04-16 01:25:38
珍惜香港TO:53/F 自我陶醉

我咪话过,唔好扭曲我嘅言论罗

除咗引刀兄讲嘅「被动目的」,即喺唔借唔得之外,任何人借钱,都有个「主动目的」,例如买嘢自用,或者作出投资。我几时话过「息平」就喺借钱嘅「主动目的」?而我又几时话过,为咗「息平」就可以借嚟「做乜都得」?

阁下所讲,唔评估自己嘅借贷风险,而作出借贷决定,呢个喺失误,唔喺失败。既然达唔到最基本嘅借贷要求,例如,唔量力而为,不惜越过金管局嘅限制,借财仔都要夹硬迫上车之类,咁呢种做法,就连「成败」嘅层次都讲唔上啦!

咁点解,低息唔借,高息先至嚟借,喺最失败

以做生意为例,低成本嘅时候,我地会主动寻找机遇,借势扩展业务。但如果成本上升,我地就会转趋保守,就算见到有生意摆响面前,都未必会肯上,以免过度增加成本,搞到收唔切制。有啲生意人,为咗急於求成,唔睇成本,结果过度扩张,最后搞到一败涂地。呢啲例子,大家都见唔少。

借贷,都喺一样。买楼,或作出投资,用 CASH 嘅话,当然冇问题。但如果要动用借贷,就一定喺低息环境果阵最有利。环球经济新常态系列一,第四节里面,我提到,行使杠杆嘅原则,就喺一定唔可以投机,唔可以凭溢价收益作为投资嘅目标,宁愿价格死牛不变,再以可观嘅现金流回报,抗衡仅存嘅价格风险。

或者简单讲,动用杠杆,就唔能够以赚价为目标。近年,响低息环境之下,通过行使杠杆,好多物业投资者都上咗位。表面上,佢地似乎因为资产价格上升,以杠杆倍大咗规模,但实质上,呢班人之所以咁成功,喺因为佢地嘅,原始投资目的,喺赚取孳息,而资产价格上升,只不过喺额外嘅惊喜。果啲以赚价为目标嘅投机者,晨早就已经沽咗货,边会 HOLD 到依家?

高息环境之下,借贷投资,喺赚唔到孳息,甚至要贴息,咁长期持货,就冇咗个诱因。赚价,成为咗借贷投资嘅惟一目的,咁投资目标,就自然放咗响价格敏感嘅投资物度。杠杆投机赚价,违反行使杠杆嘅原则,喺非常冒险嘅行为,但又正正喺,高息借贷投资,一个几乎必然嘅结果,咁你话,喺唔喺最失败?

买楼嘅情况,有啲唔同,但不同之处,唔喺你 44/F 讲果种,楼同基金,一样可以做杠杆。物业之所以唔同,喺因为有佢嘅「实用值」,同金融产品唔一样,而住宅嘅实用性,更为贴身。杠杆方面,只要依时供款,银行喺唔会 CALL 你 LOAN,响持货风险上,又可以睇成好似一件,价格死牛不变之物。

如果有人,用对股票、基金嘅态度,去睇物业嘅话,呢种人,喺唔适合持有物业;同样地,用持有物业嘅态度,去睇股票、基金嘅人,亦唔适合沾手呢啲金融嘢。

我响 37/F 提到果件,搞到要资产重组嘅个案,就正正喺后者。