地產博客 > 絲絲細語 返回
瀏覽人次:11894    回應:2
絲絲細語
改建迪士尼
 
左丁山
2020年10月8日

  特區政府成日講要增闢土地,增加住宅土地供應,以便興建多啲公屋畀N無人士上樓,但講一套,做一套,曾經宣傳轟動一時嘅土地供應專責小組,交完報告畀政府之後,黃遠輝亦已裸退,但現時政府做過乜?旅遊餐飲就話畀疫情玩死啫,土地唔會喎,新樓盤銷售仍然暢旺,政府何不趁住經濟低迷時期,多推土地?啱啱相反,政府計劃在第四季推出兩塊地皮:可建單位合供630伙咁大把,連同其他地皮,即黃竹坑港鐵站上蓋1,000伙,私人發展與重建項目1,150伙,全季供應總數係2,780伙。如果講財政年度(今年3月至12月),三季供應總數加埋係7,400伙,係乜嘢概念?地產專家、萊坊(Knight Frank)執行董事林浩文認為目前市場需求估計,每個財政年度供應2萬至2萬3千伙較為適合,到咗2023年,市場就會出現供應不足問題,可能僧多粥少。

  即係咁,政府無力找到成熟地皮應市,只靠私人發展商拆舊樓重建,供應掌握在私人地產商手上,梁振英當特首時,曾埋怨曾蔭權政府凍結土地供應,不建房屋,曾蔭權之發展局長係邊位?當今特首林鄭月娥囉。

  地皮唔係冇,只是政府冇決心,政府在9月25日收回迪士尼竹篙灣60公頃土地,大可用作建屋用途。迪士尼一直唔願意,不積極將土地擴建樂園之用,丟空近二十年,政府收回有理,迪士尼近年已全力着重拓展上海迪士尼,對香港小市場興趣漸失,加上疫情打擊迪士尼全球樂園業務,已宣佈裁員二萬八千人,在此環境下,仲要喺香港霸住幅地做乜?政府收回之後,唔該盡快規劃改變土地用途,作住宅用地。改變用途須得城規會同意,算幾合理,但原來亦要得迪士尼董事局通過,咁就麻煩,有排都未掂,亦反映出當年董建華政府與迪士尼談判發展協議,幾咁被人佔了便宜。

  如被迪士尼玩殘,都冇辦法嘅啫,蝕底啲,用錢買起迪士尼樂園,賠錢送走佢,將土地合併興建一個新住宅區,面積共38公頃加60公頃,共98公頃,即98萬平方米,點都可以興建萬幾伙公屋、居屋啩?一定快過填海造島搞明日大嶼吖,迪士尼樂園對香港經濟之貢獻以後只會日漸萎縮,棄之不足惜,何況佢呢間公司掛住大陸,早已無心戀棧香港!

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 改建中大 2020-10-08 14:06:45
停辦害人子弟的暴大,把暴大幅地改建公屋及居屋,改安置幾十萬人。
2. 合理 2020-10-08 15:15:12
同意一樓睇法,衣家係大學數量太多,而品質欠奉。出品的學生,唔太切合社會需求,又霸佔大量社會資源。基於成本效益原則,花費大量社會成本而缺乏社會效益,就要節流,合理。