地產博客 > 文亮言 返回
瀏覽人次:11144    回應:12
文亮言
約翰遜之父,趙括之母
 
湯文亮博士
紀惠集團行政總裁
2021年1月8日

  近日有不少人同我講,香港樓市必定會大冧,最重要的就是英國推出BNO計劃,令到有300萬港人可以移居英國,未來幾年有數以十萬計業主將會放售他們的自住單位,就算沒有明日大嶼,供應量倍數於需求,樓市冇可能唔冧。

  老實說,英國的BNO計劃的確一絕,而英國佬的如意算盤是香港人賣樓移民,為英國樓市打一支強心針,亦間接振興英國經濟,但誰不知香港人要仔唔要乸,移民英國冇問題,當買一個保險,但賣樓就免問,最多將香港自住單位出租,在英國租樓住,而且,英國是非常保護租客,在英國所租住的地方有乜頭暈身㷫,就叫業主搞掂,如果是自置物業,那些維修費用都唔少,沒有太多人賣樓,香港樓市是不會大冧。

  我於是對那些人說,用BNO計劃移民是沒有問題,但最好睇定一些,現在英國剛剛脫歐,前途凶吉未卜,移民去英國很容易做錯決定,如果賣了樓以後要回流就很困難,但不少人認為,以香港現時形勢,契弟走得摩,早日到英國早日適應,他日我要流亡時可以接濟我,我話流亡是要講資格,我何德何能可以流亡,最多是逃亡。

  正當我詞窮理絕的時候,有一個人幫了我,就是英國首相約翰遜的父親,在講約翰遜父親之前,先講紙上談兵主角趙括母親,趙括熟讀兵書,連他的父親趙國大將趙奢都唔夠佢講,當其時,秦國派白起出兵入侵趙國,趙王派廉頗抵檔,兩軍對壘於長平,廉頗用守字訣,趙王不滿,派趙括替代,趙括母親知道之後,立刻去搵趙王,話要同趙括斷絕母子關係,因為她知道趙括是只懂得紙上談兵,如果趙王派趙括出兵,輸咗要誅九族就唔好預佢,趙王答應,結果趙括大敗,趙母有先見之明。

  今日約翰遜父親在英國脫歐之後申請入藉法國,可想而知英國在脫歐的情況有幾壞,約翰遜之父用行動話俾要移民去英國的人,以後有什麼不如意就唔好頼俾人呃。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. WWSG 2021-01-08 11:42:49
美國頭馬,信錯大佬,加速衰退,人民受苦。
2. 引刀一快 2021-01-08 12:29:54
移民去法蘭西斯坦,可能想娶四個老婆呢。
3. 元朗灣區人 2021-01-08 14:03:36
國家

!!應該取消有外國護照人的中國香港身份。

二選一,冇回頭。
4. 冇幾何 2021-01-08 15:57:19
侵侵剛被閹咗,佢小弟弟(Johnson)同佢分割開,仲嚴厲遣負佢,冇得駁番......
5. 鳥5 2021-01-08 22:15:00
冇脱欧就根本冇BN0的故事!易地而處!送比你博!就算紮唔到根!佢都唔會輸!贏硬!英國佬講義氣?哈哈!佢都係計自己數!但移民係咪一定輸,未必,睇際遇。只係蝕底行先啫!
6. 鳥5 2021-01-08 22:29:14
真正要呢班人沽貨!係要跌破(升市期望)!二八定律!跌穿2成後半年上5番!不過而家只排(善價而沽盤)未到(追沽盤)!演唱會,聽話n call先走!係截唔到的士。。。
7. 引刀一快 2021-01-09 07:27:48
鳥5兄

唔係幾同意你講法,唔理B唔BNO,從來出國都係一件攞嚟炫耀嘅事,邊個個仔留學,邊個移民,顧盼自豪。近十幾年,有互聯網之後,物離鄉就不及人離鄉貴,人生見識多啲歷練多啲,亦更豐盛。
不過非常同意你演唱會妙喻,截唔到的士事小,塞起上嚟巴士私家車齊齊走唔甩。
8. 講多無謂 2021-01-09 10:09:03
樓就唔買,人就走,大量租盤供應,回報率低D,大公司減下人手或人工,死唔去,只是不爽。
9. 毋悔 2021-01-09 12:31:41
中國國運如日中天,英國由日不落娈成日日落國,如果大把錢去退休又大把地方簡,有千個理由唔去念唔到一個理由要去
10. 引刀一快 2021-01-09 13:36:17
樓上,按你說法,大灣區去唔去?
11. 毋悔 2021-01-09 20:44:23
引引,香港已經係大彎區。
12. 鳥5 2021-01-09 22:24:10
刀兄!諗一諗!!你亦有其道理!我有個朋友真係去咗英國!他日唔難保回歸,再創高峰!