別人的逢三退一

　　有老友問我是否教人買新樓，佢話以前新樓定義是實用率低，樓價高，當時，買了新樓的人在收樓時都一殼眼淚，地產霸權的名字亦由此而起，佢話我教壞細路，應該買二手樓，因為二手樓可以實地視察環境，同業主有商有量，幫了別人又幫了自己，無謂益那些地產商，仲問我有沒有攞地產商著數。
 
　　老友一輪咀，我都插唔入搭咀。不過，我首先承認我叫有意買樓的人不如考慮買新樓，我當然沒有攞地產商任何著數，我想有一些地產商因為我的爆煲論而要他們平賣新樓而嬲左我，不過，我只是做分析，心想果句就寫果句，同意與否我無權話事，亦唔能夠迫人同意，大家要明白這點，但我老友的表情話俾我知，佢唔明白。
 
　　於是我問老友是否打算採取逢三退一策略，賣走一些物業，佢直認不諱，而且話，唔趁市道大旺的時候賣走一些物業，就對唔住太公。咁奇怪，又關太公事。於是我又問，在佢手上十多個物業當中，是否會賣走最優質，收租又好的兩三個，咁樣，買的人又的確幾開心。佢唔講我都知道答案。佢立即話我傻，梗係賣走最劣質的，又經常空置，或者租客欠租的物業，這亦是我的“逢三退一”精髓，問我是否唔記得。我就是因為記得才這樣問，我老友當然唔知道。
 
　　其實，每一個賣樓的業主都人同此心，如果非迫切性賣樓，唔賣走手上最差的物業真的是對唔住太公。現在反過來說，買樓的人變成買入別人最差的物業，逢三退一退出來的物業，既然大家都知道實情，點解要買二手樓，何不買新樓。我老友當然唔同意我的說法，佢話賣樓的人可能只得一層樓，佢只不過是樓換樓，我同意，但現在將自住物業賣走的人若果不是財困，最大機會是他剛剛買了一層新樓，打一個“單檔”將自住舊樓買走，任何買了他的物業，都是間接買了新樓，點解唔直接買新樓，今次買唔到就下一次買，新樓盤陸續有來，只要有心，總會買到，我老友無話可說，不過，我覺得佢依然唔同意。