上星期五晚，有老友話有多少煩惱，想搵我飲酒，原因是我是比較樂觀的人，經常可以將唔係幾好的事講到唔係幾差，即使結果冇變，但心裡都覺得舒服一些。
老友話收到一份死亡通告，唔係有人向佢追債，亦不是有銀行追差額，而是有一個生意合伙人要求開董事會商量供股集資，老友話本來冇問題，但經過三年疫情，他已經江郎財盡，再冇能力供股，但如果唔供，就會眼白白睇到生意在回復正軌之下被人溝淡了自己股份，覺得非常唔抵。
老友心態我相信很多領展股票持有人領略得到，在香港全面解除抗疫，市面開始回復正常的情況下，領展竟然七折集資供股，令到一些股票持有人要出售部份股票才有能力供股，供應多了，股價自然下跌，現在距離七折供股價不遠，包銷商的確是有先見之明，領展今次供股，令到不少擁躉無端端唔見了一截身家，可以說是無妄之災，對於任何股票持有人來說，供股集資通知信等如一份死亡通告，希望上市公司領導人可以明白股民心態。
在地球另一面，美國
矽谷銀行宣布集資供股，令到股價大跌六成，美國監管機構二話不說立刻接管了矽谷銀行，這個結局的確出乎不少人意料之外，但這個當機立斷的決定，最少會令到有一段時間美國上市公司不敢集資供股，與此同時亦幫了耶倫，美資唔敢存放資金在銀行唯有買美債，所以在矽谷銀行出事之後，十年美債息率下跌，美匯同樣下跌，而最令大家開心的就是美聯儲局可能要為此而停止加息，亦有人認為矽谷銀行這隻黑天鵝可能是人工飼養，在有需要的時候就要劏咗佢。
App下載
