放心,基本無劇透。
前日三八婦女節,大陸嘅院線用咗一種好特別嘅方式慶祝呢個節日,喺呢日首映一套萬眾期待嘅電影——經期隊長,真係應節到應嘞!
筆者為感恩世上婦女為地球帶來嘅貢獻,當然響應買飛入場,侍奉家中老闆剝花生遞果汁咬耳仔。一開場,見到Stan Lee,相當感觸,跟著睇咗大半粒鐘左右,弊!出現思覺失調,唔知點解一路好似聽到X檔案首主題音樂,可能係因為一路畫面、燈光、人物、劇情都係X檔案式發展,連D對白都似埋X檔案,仲要整一幕解剖外星人,就爭在唔係郭丹娜操刀唧,到咗後面,經期隊長解開封印使出龜波氣功,我先至發現D熟口熟面嘅外星人原來係笛子魔童!
荷里活雖然財雄勢大,但係題材橋段都係會有緊絀嘅一日,復仇者聯盟3裡面嘅滅霸魁隆,電影裡面嘅形象,活脫脫就係北斗之拳嘅拳王雷奧,而占士金馬倫就乾脆拍銃夢,就算係頂爺史提芬史匹堡上年嘅挑戰者1號,都要加入金田部戰車同埋高達嚟撐場,坦白講,call高達一幕,全院沸騰,跨年代嘅高度共鳴感瞬間攞返全部票價,而部戲整體嚟講只係OK。
雖然美國佬開始借日本仔橋拍嘢,但係又唔見得日本仔有幾好,上述所有借橋,都係70`s至90`s嘅日本動漫作品,係軟實力最鼎盛時期,2000年之後可以話乏善足陳,乃至於今日仲有龍珠電影上畫。
可悲嘅年代,令人生活舒適嘅科技高速發展,而撫慰心靈嘅娛樂文化水平就日漸膚淺衰落。