2025.01.01 新年祝願：涅槃重生 2024.01.01 新年祝願：風調雨順 2023.01.01 新年祝願：勿忘初心 2022.01.01 新年祝願：滿滿幸福 2021.01.01 新年祝願：幸運錦鯉 五、四、三、二、一 … 新年快樂！！ HAPPY NEW YEAR！！
今年又係我【
珍惜香港 】，踏正零時零分彈出嚟，率先為大家獻上新年祝願。今年寫祝願，感覺有啲吃力，可能因為兩個月前，先至啱啱發表咗過萬字嘅《
初心（平凡篇） 》，未唞順條氣又要再開筆。不過最大鑊嘅，連我自己都唔敢相信，就係個腦一片空白，唔知寫乜。
我唔係講笑，開筆頭三日，一個字都寫唔出。無他，過往一年，香港可以話冇乜點進步過，即係話，
上年果篇祝願 ，幾乎成篇抄返過嚟用都得，就算唔抄，我都諗唔到有乜嘢辦法，可以避免重覆上年嘅內容，你地話大唔大鑊？
逆水行舟 所謂，逆水行舟，不進則退，冇乜進步，即係退步，換句話講，今年香港嘅處境，將會比往年更嚴峻。記得我舊年送俾港府隻錦囊，即係果粒
START 掣呢，唔知阿超收唔收到？
我提出咗五招 ，話過一招都唔少得，你冇跟足，FINE！反正你成日掛响口邊話，以結果為標準嘛！START 掣嘅意思，
就係一季之內，樓價回升一成 ，做得到呢個目標嘅，我懶理你用乜嘢手段。
但結果呢？2024 全年樓價唔單止冇回升，
仲跌多咗 6.8% 。其實政府都唔係冇做嘢嘅，二月底，
全面撤辣取消壓測兼上調按揭一成 ，跟住乾等半年，見美國減咗息，香港跟住減埋，個樓市都仲未有起色，到十月中，先至捨得將所有種類用途物業嘅按揭，
一律提高上限至七成及供款入息比率上限至五成 ，同放埋個物業投資移民，
但門檻就要成五千萬 。坦白講，呢啲所謂招，極其量只係回復返一個自由市場，本來就應該具備嘅流動性，唔算得上救市，仲要係被動兼烏龜式，如果唔係負資產數字急升，再加埋出現 CALL LOAN 潮，啲中小企喊哂救命嘅話，你都仲未捨得去郁手。
我果然冇睇錯，
呢對夢幻組合 ，完全冇危機感，唔該你地睇清楚，我果粒
START 掣，係紅色。
紅色，即係 EMERGENCY ！記得當時有人寸我，兜兜轉轉，
即係叫政府托市 。YES！我就係叫政府托市，有咩問題？家陣全世界都行緊逆水，你仲响度等運到？唔好再同我講，話乜嘢年輕人唔飲唔食幾多年先至買到樓，
乜嘢樓價高企會削弱競爭力 。我想問，最近二手樓價，
從高位累跌近三成 ，依家香港比起樓價高企果陣，競爭力強咗定係弱咗？經濟好咗定係壞咗？零售、旅遊相對內地嘅性價比，高咗定係低咗？港府庫房裡面啲錢錢，多咗定係少咗？你地最關心，日日盯住果隻恆生指數呢，又有幾爭氣？要啲年輕人，一畢業出嚟做嘢就即刻買到樓？NO PROBLEM！香港人口 CUT 一半，
變返做漁港囉 ！
千斤撥四兩 講開人口，話說一個月前，
阿超提到香港要改革 ，仲話保持競爭力，就要有一千萬人口添。我好疑惑，七百幾萬人，
已經搞到千億財赤 ，你有乜嘢條件，憑乜嘢改革，去養起千萬人口？唔通係你成日強調果隻，
千斤撥四兩嘅盛事經濟 ？我無意潑你冷水，但實情係，內地好多城市，旅遊同消費方面嘅性價比，都已經超越香港。昔日你高人一等嘅優勢，永不復返，呢個係宏觀梗局，冇得救，唔好再抱埋哂啲不切實際嘅幻想。
不過話分兩頭，香港只係風光不再啫，又冇話旅遊同零售完全冇得搞，你做得到同內地城市平起平坐，已經係萬幸，但想靠呢方面食糊呢，就唔使旨意。所以點解仲要千斤撥四兩，係咁倒錢落海去玩補貼？你睇下人地舊年八月初，堪稱盛事典範嘅《
多啦A夢 》巡迴展，
洗鬼用你盛事基金一分一亳 ？所以點解我會响一連兩篇文章裡面，
大讚鄭志剛 ，仲話新世界發展，
係香港最有前景嘅地產財團 。政府嘅強項，係政策、基建、社區配套同人力資源，呢個係食腦嘅世界，
唔係一味靠俾錢就得 。你想撐經濟，
就要同業界勾結，同財團勾結 。通過政策，為行業拆牆鬆綁，通過基建，築起條康莊大道，俾啲食呢行飯嘅企業自由發揮，需要時，就提供現有嘅社區配套同人力資源，降低佢地嘅成本，而唔係送錢！
就好似香港有史以來最大型嘅體育基建項目，
啟德體育園 ，政府出資 319 億，係全權擁有成個基建，再交俾財團興建同營運，即係新世界發展成立嘅啟德體育園有限公司，
鄭志剛又記一功 。最近體育園舉行測試演練，
由警務處統籌 ，各方分工合作，
政府就出動公務員 ，呢啲都係現有嘅資源，使乜額外洗錢？講真，就算冇乜嘢盛事基金，香港每年都會舉辦一系列盛事，搞得掂果啲，根本就唔使資助，唔掂嘅，咪唔好搞囉！你有好嘅活動 IDEA，就舉你上去個盛事 LIST 度，政府極其量動用現有嘅渠道資源，幫你大肆宣傳，再唔係，就提供埋場地同人手，最多收順啲，咁已經係仁至義盡，點解仲要送埋錢？
千萬人口嘅規模 睇嚟阿超真係冇諗過，究竟千萬人口，係乜嘢概念。人口數目，即質量之中嘅量，係講求產業規模，咁香港要幾大嘅產業規模，先至養得起千萬人口？其實我已經將個答案，寫咗响兩個月前發表嘅《
初心（平凡篇） 》裡面。如果當年果件「
矽港計劃 」，即係今日嘅
SMIC（中芯國際） ，成功落戶香港，仲成為媲美甚至超越台積電，全球最先進同最具規模嘅晶圓代工，再加埋引申出嚟嘅龐大高科技產業鍊呢，就養得起你千萬人口啦！吓？使唔使咁誇張呀？唔信？
不如你睇下上海 ，截至 2022 年底，常住總人口 2,476 萬，但人地已經坐擁 N 個我啱啱提到果種產業規模。反觀香港，係一個都冇，
而且唔靠賣地 ，就連七百幾萬人都養唔起，仲講乜一千萬人？
其實我上年都已經提過，港府指望果「八大中心」，
只得一個 MONOPOLY ，仲要係現成嘅金融中心，而各中心之間，又冇足夠強大嘅相互連帶效應。咁即係話，就算俾你八個加埋，都唔會撐得出上一段提到果種產業規模。我知道阿茂已經盡哂力，尤其响創科方面，
係咁出去搶企業、搶人才 ，仲話吸引咗過百重點企業落戶香港，預計引入技術同幾百億投資，創造 1.7 萬個職位添。當然，我唔可以武斷話你開空頭支票，
但睇返引進辦拋出果堆籌碼裡面 ，惟香港獨尊嘅，就只得一個資金自由、低稅率嘅國際金融中心。換句話講，你响創科產業方面，係冇優勢，於是就用錢去吸引人地，而人地肯落踏，
都只係為咗錢 ，同埋借你香港，作為投資或參與大灣區，以及其他內地市場嘅踏腳石，即係所謂嘅，
超級聯繫人囉 ！
所以，就算佢地擺個 HQ 响香港，都唔等於會將個產業放埋响呢度。正如我早前話，
單靠金融 ，就可以撐出個創科中心嘅，咁莫講八大，百大中心都俾你撐得出嚟啦！同樣地，如果香港本身已經有產業優勢，你要搶人才，就應該向企業埋手，為佢地搭建平台出外面請人，而唔係有理冇理，
CALL 哂啲人才過嚟食自己 。好明顯，
你係想果十五萬幾高才 ，反過嚟幫你由冇優勢，變成有優勢。但都係果句，我唔可以武斷話你呢個算盤打唔響，我只能夠話，咁嘅做法，係本末倒置！
燃眉之急 不過我要強調，我冇話過唔支持香港搞「八大中心」，只係你想靠呢抽嘢食糊呢，就唔使旨意。吓？
盛事經濟唔得 、八大中心又唔得，咁點先至得？有時候，我都覺得幾無奈，早响 2022 年，阿超上任果刻，我就已經警告過，
政府再陷財赤邊緣 ，但唔知點解，當時冇乜人睬我。响上年果篇祝願裡面，我再提財赤，
仲推算三年後，香港可以埋單 。你話我危言聳聽？NO PROBLEM！話說半個月前，
美銀發表報告 ，話港府嘅財政儲備，只夠用兩至三年，睇下邊個危言聳聽？多年以來，
我嘅宏觀預言 ，逐步應驗；依家仲大鑊，連微觀預言都中埋，人地果然已經出定 REPORT，
等著幾時做你 。
當然，你大可以話美銀做爛條數，唱衰你香港，咁不如今年我又同你計計數。話說港府 2024-25 年度，截至上年十月底果七個月內，
累計財赤達 2,423 億 。我上年已經提醒過你，
借咗唔等於賺咗 ，所以唔好再同我講話得果 1,636 億。至於財政儲備呢，就淨番 5,709 億，
但翻睇政府嘅財務狀況公報 ，其實呢五千幾億裡面，有 2,711 億係借返嚟，即係果啲顏色債同基債。換言之，香港嘅財政儲備，實質上只得 2,998 億，
即係唔夠三千億 ！仲未計裡面有成 1,357 億嘅政府保證債項，包括截至上年十月中，壞賬已經超過一成嘅「
百分百擔保特惠貸款 」。有評論估計最壞情況，
個壞賬會高達 50% ，咁嘅話，香港距離借貸渡日，
就只係淨返唔夠二千五百億 ！！
我想反問各位，呢個情況，算唔算火燒眼眉？算唔算
EMERGENCY ？不過好奇怪，阿茂响上年度預算案諮詢之前，
發表果篇網誌裡面 ，都有係咁易敷衍大家，講下公務員編制零增長，同慳咗又重新調配洗返果 1% 經常開支。
但佢今個年度嘅網誌呢 ，就隻字不提，仲拋出一堆充量欠質嘅數字，總之明天會更好。而早前佢俾人問到赤字果陣，又搬返上年網誌啲慳咗等於冇慳嘅敷衍嘢出嚟，
話睇下有冇空間再做多啲喎 ！講到開源，都仲係旨意果八大中心，期望三幾年後達至收支平衡，要堅信明天會更好嘛！至於阿超呢？
半個月前上京述職 ，講到財赤，同阿茂一樣，又話會三至五年內力爭收支平衡，但轉個頭返到香港，
就即刻落區粉飾太平 ，展示佢重開一簽多行嘅成果。記得上年我已經強調過，
唔好再粉飾埋哂啲甜品都不如嘅東東 ！你究竟想帶出乜嘢訊息？又係明天會更好？
宏觀改革 但我可以好肯定話你知，香港，已經等唔到三至五年，明天，係唔會更好！越做得多呢啲粉飾嘢，你嘅施政將會越困難，個 PICTURE 粉飾得咁靚仔為乜？到你真係頂唔順果陣，就反轉豬肚，一刀劈爛佢？到時候民怨四起，萬箭穿心，我問你點收科！早知如此，點解唔老老實實，開大喇叭話俾全港市民知道，依家香港嘅情況，係非常嚴峻，大家要共渡時艱？你呢一刻肯出手，都未算太遲，仲有機會响開源節流嘅同時，唔傷及香港嘅競爭力，但如果你再拖落去嘅話，就難免觸動到香港嘅根基，
即係低稅率 ，呢個最重要嘅競爭力因素！
香港需要嘅，係宏觀改革，即係四兩撥千斤，一石激起千層浪果隻，而唔係你所講，千斤撥四兩，一味靠充量，總之充夠一千萬人口，就幻想明天自動會變好嘅所謂改革！ 你講嘅改革 ，其實只不過係叫班手下，多啲去跑 SHOW，盡早發現問題，及時去處理，呢啲唔係叫改革，係叫救火！作為特區最高領導人，施政理念要宏觀，要具前膽性，要預知問題，唔係發現問題。搞到要推班手下去做救火隊嘅，就即係個施政理念出咗問題，
咁就算你炒多幾個局長 ，都係無補於事，因為最根本嘅問題，未必响個執行者度。香港需要宏觀改革，即係施政理念嘅改革，要改革嘅，唔係你班手下，
而係你地呢對夢幻組合 ！
就好似一簽多行，一上任就應該盡快重開，拖咗成半屆先至肯放行，
你仲好意思攞嚟邀功 ？唔使點用錢，一個政策就激起千層浪嘅，就要去慢慢研究，咁算係乜嘢施政理念？個樓市一潭死水，都仲未肯去救，係咪慌死個市會調頭大升，破壞咗你地關顧年輕人買唔到樓呢個民粹形象？難道冇買樓嘅至係香港市民，買咗樓嘅就唔係香港市民？好啦，等到負資產數字急升，加埋出現 CALL LOAN 潮，中小企喊哂救命咁，
先至肯做返少少嘢 。反觀果堆千斤撥四兩，
大灑金錢嘅夜繽紛 、
盛事經濟呢 ，就諗多陣都嫌費事，果斷執行，真係好似幾千億未開頭咁。仲有，代表香港文化嘅景點，多不勝數，做乜又要亂花錢，去起埋哂啲「
打卡位 」？你 CALL 齊班公務員，揀啲現成嘅特色景點，POST 上去小紅書度，搞下啲低成本嘅民宣咪得囉！
因果關係 唔得嘅政策，就梗係直送狗頭鍘侍候，即刻止血。果隻垃圾徵費，本身就係一件垃圾，你上任果刻就應該要 CUT，
點解又嘥咁多錢 ，拖拖拉拉，仲要大堆頭大製作，
做埋個先行先試至肯停 ？因為怕樣衰做醜人，所以要向全世界證明咗真係唔得先至 CUT，好睇啲？施政唔係做 SHOW，我上年就已經提過，
唔好順應民粹擺高球場上枱 ，點解仲要死攬住唔放，
輸咗官司就走去賴上屆 ？仲有，取消強積金對沖呢單嘢，
你上任果刻 ，我就已經提過，
上年再叫你還原 ，又當我耳邊風。
你叫啲中小企，擺定幾十萬隨時攞嚟賠，本來就唔現實，生意好嘅，使鬼裁員？經濟差、生意差果陣，有乜錢都用哂嚟救急啦！強積金額外供果 5%，原意就係响薪酬以外，儲俾老闆嘅緩衝金，炒魷就用嚟賠俾打工仔，你自己辭職就送埋俾你。但唔知點解呢項德政，無啦啦俾人扭曲成乜嘢「自己賠俾自己」，
而當年嘅 CY 又受喎 ！於是額外果 5% 就全歸打工仔，即係變相全民追加 5% 人工，老闆當冇供過，要賠就再嘔過出嚟，真係咁都得。而政府呢，
就無啦啦洗多 330 億冤枉錢 ，同班僱主共渡 25 年時艱。我想問阿超，呢 330 億，慳唔慳得返？強積金對沖，可唔可以還原？
宏觀施政理念，講求嘅係大方向，同因果關係。一套入個因果關係，就知道強積金對沖，係唔應該取消。其實所謂宏觀，都只不過係有如「
人望高處，水向低流 」啲咁簡單嘅道理，根本就唔使花錢同時間去慢慢研究。我地祖國嘅人口，已經超過十四億，科技發展速度驚人，
今年高考生數目 ，幾乎係我地全港人口嘅兩倍。你睇下人地，經已用緊人臉識別認證考生、AI 閱卷同監考，就連防作弊都係用高科技，包括手機頻率壓制，甚至派出無人機响考場上空巡航。
我地嘅 DSE 又點 ？憑乜嘢話自己係創科中心？
想當年嘅亞洲高科技中心 ，經已變成一個遺址，
且永不超生 ！所謂因果循環，報應不爽，香港有優勢果陣，又唔好好珍惜，取長補短，淨係識得打呢個打果個，
搞埋一大堆消極施政 ，乜嘢辣招打樓市、打水貸、
廢一簽多行 、打私院、廢教育產業之類，
到依家大勢已去啦 ，就反轉頭去求返嚟，有 Q 用？
重質嘅大方向 香港發展嘅宏觀大方向，已經好明顯，產業規模，一定要重質，唔可以重量。
強行充量 ，只會浪費巨額資源，仲要輸埋機會成本，最終都係死路一條。淨係呢點，
果隻明日大嶼 ，就已經可以直送狗頭鍘侍候，火速止血，
點解仲要死攬住唔放 ？呢單嘢，
我上年都已經提過 ，又俾人當耳邊風。果然，歷任香港特首，
冇一個比得上老曾 。人地任內推出果「
十大基建 」，每項都係具明確定位同針對性，優化香港某特定角色或功能，重質而非量，或以質取量。
早前提過嘅啟德體育園 ，以及我多年前响《
緣結．天璣 》文中提到，
將深圳創科產業南移嘅河套區 ，都係嚟自十大基建，
就連最近落成嘅機場三跑 ，亦係老曾响佢卸任之前提出。
我再次強調，明日大嶼，一定要立即剎停！香港係絕對冇條件，去承受如此高度不確定性，單求充量而又欠具體定位嘅超巨額基建項目。隨著資產價格下跌，香港嘅整體經濟實力，已經大不如前，無論係財團、投資者、各行各業以致市民大眾，對前景都係欠缺信心。高調剎停明日大嶼，掃除政府財政壓力中最大嘅不確定性，以及土地同地產市場前景嘅不確定性，冇懸念鎖定未來房屋發展集中大西北，地產商先至會放心投地，投資者先至會放心投資，推動各行各業放心經營，市民亦會放心置業。
要回復市場信心，就要作出明確同具體嘅宏觀承諾，一石激起千層浪，
而唔係日日落區做 SHOW ，千斤都撥唔到一兩。正如我上年都提醒過阿茂，
唔好發債當食生菜 ，你係咁舉債充入個財政儲備度，但個財政儲備就係咁跌，
你對滅赤有冇作出過明確同具體嘅承諾 ？去年十月政府發銀債，反應良好，
每人平均認購廿幾萬 ，結果呢，
你就攞足人地廿幾萬 。乜銀債嘅原意，唔係等啲長者，係咁易參與下咩？所謂物以罕為貴，每次分少少，個遊戲就長玩長有，依家你咁狼死，會唔會嚇親班老人家先？兩個月後，
你再發 200 億基債 ，結果認購額唔夠，申請總額得 177.76 億，
你就攞足 177.3 億 。阿茂你究竟知唔知，呢個做法，等同將香港市民，可以借俾你嘅老本，全數起哂個底出嚟，仲要話埋俾市場知，你已經照單全收。我唔敢想像，呢粒石仔，會激起啲乜嘢浪，但總之就唔慌係好嘢。
特朗普 2.0 個半月前，
特佬贏咗美國總統大選 ，阿茂俾人問到，會唔會影響聯匯，
佢話無意改變聯匯 ，仲話唔使再推刺激樓市措施添，我真係服咗佢，最應該做嘅就話唔使做。講開美國大選，記得上次拜登贏咗特佬果陣，我都已經話過，
唔好以為一天都光晒 ，民主黨又好，共和黨又好，美國人都係唔妥我地中國人，特佬輸咗，西方聯盟只會更團結對付我地。結果呢？
咪又係俾我講中哂 ！大選結果未出之前，有朋友想同我輸賭，但最後都係賭唔成，無他，因為我地都一致猜特佬會贏囉！
賀錦麗做咗四年副總統 ，任內一事無成，完全係民主黨嘅傀儡，
一心諗住拜登幾時死自己頂上 ，咁都俾佢贏得大選嘅話，美國就真係可以收皮。
其實特佬上場，對世界嚟講都係一件好事，起碼啲實體戰爭會少啲。
就睇俄烏戰事 ，造成巨大傷亡，引發惡性通脹，重創全世界經濟，浪費咗幾多地球資源？其實烏克蘭、阿富汗、敘利亞，本質上都係一樣，自己人打自己人，而果啲大國就從中瓜分利益。你冇利用價值呢，就即刻變成棄卒，
就好似美國放棄阿富汗 、
俄羅斯放棄敘利亞咁 ，都係閃電式倒台。講真，如果唔係歐美瘋狂式軍援，烏克蘭早就輸咗，所以戲子佬响特佬面前，係冇任何籌碼。
既然特佬嘅反戰立場 ，已經係無可置疑，戰事應該好快會結束。
不過你地又唔好咁天真，以為人地反戰，係因為佢好人。特佬絕對係一隻大壞蛋，只不過佢著眼嘅，係錢，而打仗呢，就太嘥錢啦！所以佢上場之後，貿易戰、金融戰，當然唔少得，總之就係咁搶錢。但金錢戰爭，都總好過實體戰爭，前者只不過係資源嘅轉移，而後者就係資源嘅毀滅。況且佢嘅施政理念，係
AMERICA FIRST ，針對全世界，
就連 FRIEND 都冇情講 ，即係西方聯盟，將唔會好似拜登在位果陣咁團結，咁我地起碼唔使淪為眾矢之的。
真正嘅金融安全 話說上次特佬落台之後，飽受民主黨全方位打壓，
經四年官司纏身嘅歷練後 ，相信會比上次在位果陣更難應付。加上佢主打貿易戰、金融戰，而香港作為國際金融中心，全開放型經濟體，依家又身陷財赤，可謂食到應一應。我真係唔明白，
果對夢幻組合 ，點解仲可以咁腦定，
妄想明天會更好 ？上月初，阿茂強調，
香港要守好金融安全 ，又話冇安全，增長同發展就會淪為空談喎！於是我搜尋一下，搵到佢 2021 年 4 月中果篇網誌，原來佢話嘅所謂金融安全，
即係堅守聯繫匯率制度 ！OMG！我終於明白，點解阿茂會覺得，
財赤冇乜所謂 ，
發債當食生菜 。原來手握香港命脈、港府財政嘅掌舵人，竟然唔清楚乜嘢係金融安全！
守護香港金融安全嘅，係庫房，唔係聯繫匯率！ 其實所謂聯繫匯率 ，只不過係貨幣政策嘅一個懶人包，總之一味死跟美元，港幣跌到 7.85 就買，升到 7.75 就沽，呢個盤，莫講話 AI，就連 HI（HUMAN INTELLIGENCE）都唔使，真係阿茂都識得去操。難怪歷任金管局總裁，
余總 、
陳總 、
任總 ，都係千篇一律果句，行之有效。無他，咁都爆得鑊嘅，就真係炒得。不如我反問三位，如果港府庫房失守，
評級下調，發債觸礁 ，外匯基金臨危受命，咁你地話香港嘅金融，仲安唔安全？
我估你地梗係會話，唔使擔心！呢種情況唔會發生，或者發生嘅機率係非常之低。收到！原來又係果句，
明天會更好 。不過，我又可以好肯定話俾你地知，
明天，係唔會更好 ！香港嘅宏觀大趨勢，正係朝著呢個方向走，仲未計我早响
2020 年初就提出 ，一年前又再預言過，香港將會面臨嘅重大風險，
即係果隻金融核彈 ！金融核彈最恐怖嘅，係就算你有哂充足嘅外匯儲備，人地彈指之間，一個政策就可以 KO 你。不過聽阿茂講，美國禁你美元結算，
對自己都冇益啫 ！任總又話，美國限制我地用 SWIFT，
即係攞石頭打自己隻腳喎 ！咦？想當年，特佬打貿易戰、大搞關稅，
都被評為搬石頭砸自己隻腳 ，但結果呢？莫講話特佬，就連拜登都玩埋一份，仲越玩越過癮添！
今日，你攬住隻核彈，
但個掣就响人地果度 ，而你仲自我感覺行之有效，睇死人地唔敢去噤。原來，堪稱國際金融中心嘅財金官員，風險管理哲學就係：有風險？NO PROBLEM！當佢唔存在咪得囉！受教、受教，簡直係大開眼界！講真，個掣响人地度，人地就有 N 種方法玩你，就算唔禁你，都可以限你流通量，再唔係就擺你上枱，同你阿爺談判。單係出下口術，就可以搞到你股債大震倉，咁都唔覺得有問題？我諗起沙漠裡面，
有種叫鴕鳥嘅動物 ，遇到危險，會將個頭塞入啲沙度，乜都當睇唔到，就夠哂安全啦！
過時嘅聯匯制度 去年九月，
美國開始調頭減息 0.5 厘 ，當時阿茂話，
香港銀行唔一定跟 ，理由應該同金管局講嘅一樣，即係美國加息果陣，
香港滯後 ，依家減息，我地當然都會滯後啦！但結果呢？香港各大銀行即日就宣佈，
將最優惠利率減 0.25 厘 ，市場大跌眼鏡，
形容為罕有地即時跟隨 ，瑞銀仲話，
呢個係令人意外嘅禮物添 。個半月後，美國再減息 0.25 厘，
香港銀行再照跟 ，仲跟足 0.25 厘，
又一個意外 。無他，你地呢班書獃子，
淨係識得睇住條息差 CURVE ，又點會理解民間疾苦？
唔好以為香港嘅銀行，淨係識得玩兌換，同服侍個聯繫匯率，佢地本來就企响經濟嘅最前線。多年以嚟，我已經多次強調過，香港嘅經濟，
係冇條件加息 ，亦承受唔起加息，所以美國加息，就自然跟得慢，減息，就自然跟得快。
人望高處，水向低流 ，簡單道理，使乜睇 CURVE？世界各地嘅主要經濟體，都係通過貨幣政策，去調節甚至挽救經濟。就睇我地嘅祖國，
之前推出組合拳 ，都係大刀闊斧調節貨幣政策，同重點刺激樓市，阿茂憑乜嘢話，
我地兩樣都唔使做 ？你就算唔信我呢個小人物，
都聽下盛智文點講 ，人地係緊貼市場嘅文化旅遊界代表，都話頂唔順隻聯匯，仲呼籲必要時行 PLAN B 脫勾美元添。
其實唔單止本土經濟，就連香港嘅金融，都一樣頂唔順個聯繫匯率。多年前，中國以及其他第三世界國家，經濟尚未成熟，而美元又係國際貨幣，所以美國通過美元，調控本土經濟嘅同時，自然就直接調控埋全球經濟。港幣响聯匯之下，其實只不過係美元嘅影子貨幣，之所以行之有效，係因為當時我地嘅本土經濟，同世界各地一樣，都係同美國接軌。但時移世易，亞洲掘起，尤其係中國，已經成為全球第二大經濟體。世界經濟，特別係亞洲呢邊，同美國本土已經脫軌。人地經濟過熱，就加息抗通脹啫，但我地嘅經濟係寒冬喎！跟嚟做乜？最致命嘅，係美國 QE 多年，貨幣供應泛濫，人地一加息，大量資金即時回流。你港幣呢？只係人地九牛一毛，有幾吸引？
仲要頂住個聯匯玩收水 ！國際投資者，做乜要買你港幣去炒港股？不如返去炒美股，再唔係嘅，就梗係買平 YEN，或者借零息 YEN 去炒日股啦！
共同貨幣結算中心 所以响聯匯框架之下，港幣已經失去競爭力，既幫唔到經濟，又幫唔到金融，
仲隨時俾人引爆 。吓？咁點算好？同明日大嶼一樣，
直送狗頭鍘侍候囉 ！美國減息三次，香港跟足三次，但個經濟、樓市同金融市場，都仲未見起色，就算有少少，都只係曇花一現，點解？因為港幣唔單止要減息，仲要貶值！個世界已經唔同哂，唔好再死記住當年，越加息個樓價越升嘅輝煌日子。早响 2017 年頭，中美矛盾始現雛形果陣，
我就提出過改革聯匯 ，以港幣暫時充當國際貨幣嘅角色，三年後，我話改革聯匯，
已經變成燃眉之急 。到 2022 年中，任志剛响一個訪問裡面話，港幣要從美元轉錨去另一貨幣，
就要轉換三千億美元嘅流動資產 ，呢家嘢，唔簡單喎！
講到尾，咪即係嫌麻煩，懶得轉囉！乜唔係越麻煩嘅改革，就應該越早啟動咩？拖到行之冇效果日，你仲改得切？
守護金融安全嘅 ，從來都係大量嘅錢，唔係乜嘢聯繫匯率。就算你將港幣，同隻指數（INDEX）掛勾，只要隻指數相對全球貨幣嘅波動穩定，同具可預期性，就已經足夠保障我地貨幣體系嘅穩定同安全。對香港最有利嘅做法，就係好似新加坡咁，
奉行追蹤一籃子貨幣嘅政策 ，而港幣嘅籃子雛形，應該以人民幣同美元為主，當中各種貨幣嘅比重，就根據佢地對亞洲特別係本港嘅影響同參與性嚟擬訂，再配合埋香港本地經濟同金融狀況作微調，定期開會檢討。目標，就係將港幣打造成亞洲以致全球最安全穩定，最有利於任何國家、任何機構同投資者，停泊資金以及作短、長線投資嘅「共同貨幣」！
話說去年中，
金磚國家開始研究共同貨幣嘅概念 ，到十月底，金磚峰會就通過咗《
喀山宣言 》，支持建立一個共同嘅跨境支付系統。香港作為全球貨幣最自由流通嘅地方，港幣自然可以直接充當呢個角色，針對嘅當然唔單止係金磚國家，而係全世界。响改革聯匯嘅同時，香港亦必須推進港元數碼化，建立以港幣為基礎嘅數碼結算系統，以及流通國際嘅快速數碼支付系統，即係數碼港元版嘅 SWIFT，甚至比 SWIFT 更安全有效。到時候，本港嘅貨幣系統，就唔會受到任何國家嘅單邊政策影響，而香港唔單止會成為全球最具投資價值，
真正嘅國際金融中心 ，仲會係世上最安全穩定嘅「共同貨幣結算中心」！
大刀闊斧 不過，特佬曾經揚言，
會對付挑戰美元地位嘅國家 ，但我想反問各位，你唔改革，難道人地就唔會對付你？唔好咁天真啦！依家人地已經用把槍，指住你個頭，慢慢入緊子彈，
你仲响度等運到 ！一年前，我送俾港府嘅錦囊，
即係果粒 START 掣 ，就係要為一系列宏觀改革，創造有利嘅起始環境，跟手再一招接一招，見招拆招，即係所謂嘅，
一石激起千層浪 。但可惜呢，就俾人當做耳邊風，
如今庫房幾乎乾塘 ，特佬又上任在即，一切都已經太遲。
所以宏觀改革，刻不容緩，今年我送俾香港嘅 START 掣，唔單止係一粒，而係 N 粒，即係唔可以循序漸進，要一次過同步執行。港府必須向市場發出明確同具體嘅訊息，展示對宏觀改革嘅堅定決心，
重質而非量，或以質取量 。土地房屋方面，即時宣佈剎停明日大嶼，發還高球會已收土地，集中資源發展北部都會區，優化賣地及重建措施，加強刺激樓市政策。金融改革方面，物色財金界強人，啟動貨幣改革，推動港元數碼化，構建共同貨幣，以及制定防禦措施，應對地緣政治風險。
另外，港府必須大刀闊斧節流，以保住庫房呢個金融安全嘅防護盾，所以強積金對沖，必須立即還原，政府唔可以再洗埋哂啲冤枉錢。當年所謂「
理財新哲學 」，雖然由林鄭提出，
但阿茂先至係執行者 ，啲錢洗多咗响邊度，佢心知肚明。咁就定一個 KPI，將理財新哲學暴増咗嘅經常性開支，至少 CUT 返一半出嚟。非救助性福利開支，尤其係送贈性質果啲，
包括長者兩蚊乘車優惠 ，全 CUT！乜嘢提升幸福感、社區友善之類嘅撥款，全 CUT！你想要幸福感，定係加稅？至於使用率低又蝕錢嘅公共設施、康文署設施，一律打包出售，再唔係嘅就局部停擺，甚至完全停擺！
不過我都非常明白，
醜人唔易做 ，咁我就送埋最後一隻錦囊俾你。特首連同全體問責官員，以及所有立法會議員同區議員，一律減薪兩成，再凍薪直至完全滅赤為止。不過公務員呢，就當然唔受影響，費事外面啲企業乘機去跟。呢個做法，係要展示施政團隊對改革嘅決心同誠意，回復市場對港府治理財政嘅信心，順便堵住班民粹把口。
涅槃重生 話說澳門回歸廿五年，
財政儲備處於歷史高位 ，亦全無負債。習主席寄語港澳，
要互學互鑑 ，咁究竟邊個更值得學習，邊個要引以為鑑？記得响阿超上任果陣，我為佢寫咗《
初心（特首篇） 》，話對佢嘅期望，只得一個，
就係愛民 。愛民，唔係叫你順應民粹、取悅市民、粉飾太平，而係要為市民，
做真正應該做嘅事 。
今日，我為阿超，準備咗一首《
狄公訓 》。狄仁傑係唐朝、武周時期嘅著名宰相，話說當年有人對佢話：天下桃李，悉在公門矣。狄公就回覆：
舉賢為國，非為私也 ！無疑，
特首唔易做 ，因為香港呢個城市，與生俱來就係眾矢之的，
注定唔可以做鴕鳥 。我地嘅惟一出路，
就係化身成鳳凰 ，經歷烈火嘅煎熬，同痛苦嘅考驗，從而獲得重生。
响呢個元旦日，夜闌人靜嘅零時零分，我祝各位，身體健康，心想事成；願香港，排除萬難，涅槃重生！
狄公訓（點擊播放 ） 
App下載
